आडवे तिडवे झोपल्यामुळे, हात दाबून झोपल्यामुळे, सोफ्यावर मागे मान टेकून झोपल्याने, खूप जास्त वेळ फोनवर बोलणे किंवा उंच उशी घेऊन झोपल्यामुळे मान आणि खांदे यांमध्ये वेदना होऊ लागतात. अनेकदा स्नायू किंवा नसांवर दबाव येतो. त्यामुळेही मान दुखते.

फोनवर बोलताना इअरफोन लावा – खूप जास्त वेळ फोनवर बोलावे लागत असेल तर फोन हातात पकडून, गाल चिकटवून बोलण्यापेक्षा हेडफोन्स किंवा इअरफोन्स वापरावेत. त्यामुळे मोबाइलच्या रेडिएशनमुळे बचाव होईल.

वाकून काम करू नका – ऑफिसमध्ये काम करताना कॉम्प्युटरवर काम करत असाल तर शरीर झुकवून काम करू नये. आपल्या कॉम्प्युटर स्क्रीनची उंची डोळ्याच्या उंचीइतकी ठेवावी. शरीर आणि मान खालच्या बाजूला वाकू नये. वाकून काम केल्याने मानेच्या वेदना होतातच, पण भविष्यात मणक्‍याच्या हाडांशी निगडित समस्या निर्माण होतात.

उंच उशीचा वापर नको – झोपताना उंच उशीचा वापर करीत असाल तर मानदुखी होऊ शकते. वेदना होत असल्यास झोपताना उशी घेऊ नये. उशी वापरायची असेल तर विशेष स्वरूपाच्या सर्व्हायकल उशांचा वापर करावा. ही उशी देखील अतिउंच नसावी किंवा अतिपातळ पण नसावी. या उशीचा वापर करून मानेला आराम मिळाला पाहिजे.

योग्य पद्धतीने बसा – खुर्ची आणि सोफ्यावर आडवे तिडवे बसू नका. त्यामुळे मानेच्या समस्या होतात. खुर्ची किंवा सोफ्यावर बसताना योग्य पद्धतीने बसावे. शक्‍यतो कायम ताठ बसावे तसेच खुर्चीवर एकाच पद्धतीने बराच काळ बसू नये. मानेच्या स्नायूंना आराम मिळावा यासाठी अधूनमधून थोडा वेळ आराम करावा, मानेचे व्यायाम करावेत.

मान दुखू लागल्यास बर्फाने शेकावे – मानदुखीमध्ये बर्फाने शेकल्यास लवकर आराम पडतो. त्यासाठी बर्फाचे तुकडे कापडात बांधून वेदना होणाऱ्या जागी शेकावे. त्यामुळे सूज कमी होते. जमल्यास कॉलरचा वापर करावा.