Weather Update: देशभरात मान्सून पुन्हा सक्रिय झाला असून अनेक राज्यांमध्ये मुसळधार ते अतिमुसळधार पावसाची शक्यता आहे. भारतीय हवामान विभागाने (IMD) 30 जुलैसाठी विशेष हवामान बुलेटिन जारी करत महाराष्ट्र आणि मध्य प्रदेशातील काही भागांसाठी अतिमुसळधार पावसाचा गंभीर इशारा दिला आहे.

याशिवाय दिल्ली, उत्तर प्रदेश, राजस्थान, पंजाब, हरियाणा, बिहारसह 20 हून अधिक राज्यांमध्ये मुसळधार पाऊस, वादळी वारे आणि विजांच्या कडकडाटाचा अलर्ट देण्यात आला आहे.

हवामान विभागाच्या माहितीनुसार, मध्य छत्तीसगड आणि लगतच्या उत्तर अंतर्गत ओडिशावर तयार झालेला खोल दाबाचा पट्टा पश्चिमेकडे सरकत असून पुढील 24 तासांत तो छत्तीसगडमार्गे पूर्व मध्य प्रदेशात पोहोचण्याची शक्यता आहे. या प्रणालीच्या प्रभावामुळे देशातील अनेक भागांत हवामान बिघडणार आहे.

महाराष्ट्र आणि मध्य प्रदेशात अतिमुसळधार पावसाचा इशारा –

IMD ने 30 जुलै रोजी मध्य महाराष्ट्र आणि पश्चिम मध्य प्रदेशात काही ठिकाणी अतिमुसळधार पावसाचा इशारा दिला आहे. काही भागांत 21 सेंटीमीटरपेक्षा अधिक पावसाची नोंद होण्याची शक्यता व्यक्त करण्यात आली आहे. त्यामुळे सखल भागांत पाणी साचणे, नद्यांच्या पाणीपातळीत वाढ आणि पूरस्थिती निर्माण होण्याचा धोका वाढला आहे.

17 राज्यांमध्ये अतिवृष्टीची शक्यता –

हवामान विभागाने खालील राज्यांमध्ये काही ठिकाणी अतिमुसळधार पावसाचा अंदाज व्यक्त केला आहे.

मध्य आणि पश्चिम भारत: पूर्व मध्य प्रदेश, विदर्भ, मराठवाडा, कोकण-गोवा, गुजरात आणि पूर्व राजस्थान.

उत्तर भारत: हिमाचल प्रदेश, उत्तराखंड आणि पंजाब.

दक्षिण भारत: किनारी कर्नाटक, दक्षिण अंतर्गत कर्नाटक, केरळ, माहे आणि तेलंगणा.

पूर्व आणि ईशान्य भारत: आसाम-मेघालय, अरुणाचल प्रदेश तसेच उप-हिमालयीन पश्चिम बंगाल आणि सिक्कीम.

दिल्ली-यूपीसह अनेक राज्यांमध्ये मुसळधार पावसाचा इशारा –

IMD च्या अंदाजानुसार दिल्ली, हरियाणा आणि चंदीगड, पश्चिम उत्तर प्रदेश, पश्चिम राजस्थान, जम्मू-काश्मीर आणि लडाख, छत्तीसगड, नागालँड, मणिपूर, मिझोराम आणि त्रिपुरा, उत्तर अंतर्गत कर्नाटक, तामिळनाडू, पुद्दुचेरी आणि कराईकल, लक्षद्वीप भागांत मुसळधार पावसाची शक्यता आहे.

ताशी 40 ते 50 किमी वेगाने वाहणार वारे –

हवामान विभागाने महाराष्ट्रातील विदर्भ, मराठवाडा आणि मध्य महाराष्ट्र, तसेच कोकण-गोवा, पश्चिम मध्य प्रदेश, केरळ, कर्नाटक, तामिळनाडू, लक्षद्वीप आणि अंदमान-निकोबार बेटांमध्ये ताशी 40 ते 50 किलोमीटर वेगाने वारे वाहण्याचा अंदाज व्यक्त केला आहे. या भागांत मेघगर्जनेसह विजांचा कडकडाट होण्याचीही शक्यता आहे.

याशिवाय बिहार, झारखंड, गंगेच्या खोऱ्यातील पश्चिम बंगाल, ओडिशा, राजस्थान, जम्मू-काश्मीर, गुजरात, अरुणाचल प्रदेश, आसाम-मेघालय तसेच ईशान्येकडील इतर राज्यांमध्येही वादळी वाऱ्यासह विजांचा इशारा देण्यात आला आहे.

नागरिकांना सतर्क राहण्याचे आवाहन –

मुसळधार पावसाचा इशारा लक्षात घेता नागरिकांनी अनावश्यक प्रवास टाळावा, नदी-नाल्यांच्या परिसरात जाणे टाळावे आणि स्थानिक प्रशासन तसेच हवामान विभागाने जारी केलेल्या सूचनांचे पालन करावे, असे आवाहन करण्यात आले आहे. किनारी भागात समुद्र खवळलेला राहण्याची शक्यता असल्याने मच्छीमारांनीही आवश्यक ती खबरदारी घ्यावी.