Weather Update : आज (दि. १४) संपूर्ण देश होळीच्या रंगात रंगून गेला असून, होळीपूर्वी गुरुवारी संध्याकाळपासून दिल्ली-एनसीआरच्या अनेक भागात पाऊस पडला, त्याचबरोबर थंड वारेही वाहत होते. आता होळीच्या दिवशी म्हणजेच १४ मार्च रोजी दिल्लीत हलका पाऊस आणि ढगाळ हवामान राहण्याची शक्यता आहे. हवामान खात्याच्या म्हणण्यानुसार, पुढील दोन दिवस दिल्लीत पाऊस पडेल आणि ढगाळ वातावरण राहील. यानंतर राजधानीचे हवामान पुन्हा बदलेल असं देखील सांगण्यात आलं आहे. तसेच, जम्मू-काश्मीर, लडाख, अरुणाचल प्रदेश, हिमाचल प्रदेश आणि उत्तराखंडच्या काही भागात पाऊस आणि बर्फवृष्टीची शक्यता आहे. १४ मार्च रोजी ईशान्य भारत आणि पश्चिम बंगाल, सिक्कीमच्या भागात कोरडे हवामान राहण्याची शक्यता आहे. पुढील दोन दिवस पंजाब, हरियाणा, उत्तर प्रदेश आणि राजस्थानमध्ये मेघगर्जनेसह हलका पाऊस पडण्याची शक्यता आहे. हिमवृष्टीची शक्यता : दि. १५ आणि १६ मार्च रोजी हिमाचल प्रदेशात आणि १६ मार्च रोजी उत्तराखंडमध्ये बर्फवृष्टीची शक्यता आहे. पूर्व बांगलादेशवर चक्राकार वाऱ्याचा प्रदेश कायम आहे. पुढील तीन दिवसांत आसाम, मेघालय, नागालँड, मणिपूर, मिझोरम आणि त्रिपुरामध्ये जोरदार वाऱ्यांसह पाऊस पडण्याची शक्यता आहे. होळीच्या दिवशी आसाम, नागालँड, मणिपूर, मिझोरम आणि त्रिपुरामध्ये काही ठिकाणी गारपीट होण्याची शक्यता आहे. तापमानात बदल होईल : पुढील २४ तासांत वायव्य भारतातील मैदानी भागात कमाल तापमानात कोणताही महत्त्वपूर्ण बदल होण्याची शक्यता नाही. यानंतर २-३ अंश सेल्सिअसने तापमानात घट होऊ शकते. पुढील ३ दिवसांत पूर्व भारतातील कमाल तापमानात सुमारे २-३ अंश सेल्सिअसने वाढ होण्याची शक्यता आहे. यानंतर कोणताही महत्त्वाचा बदल होणार नाही. गुजरात, छत्तीसगड, ओडिशा, झारखंड, आंध्र प्रदेश आणि पश्चिम बंगालमध्ये तीन दिवस उष्णतेची लाट कायम राहण्याची शक्यता आहे. इथे हवामान खूप गरम असणार आहे. राजस्थानमधील काही ठिकाणी किमान तापमान सामान्यपेक्षा (५.१°C किंवा त्याहून अधिक) लक्षणीयरीत्या जास्त आहे. दिल्ली, उत्तर प्रदेश, मध्य प्रदेश, गुजरात आणि गोवा येथे काही ठिकाणी तापमान सामान्यपेक्षा लक्षणीयरीत्या जास्त (३.१ °C ते ५.० °C) आहे. हिमाचल प्रदेश, उत्तराखंड, पंजाब, बिहार आणि हरियाणामधील काही ठिकाणी तापमान सामान्यपेक्षा जास्त आहे. शिमलामध्ये पावसाचा इशारा : रविवारपर्यंत हिमाचल प्रदेशात मुसळधार पाऊस आणि बर्फवृष्टीचा अंदाज आहे. हवामान खात्याने पुढील दोन दिवस चंबा, कांगडा आणि कुल्लू जिल्ह्यांमध्ये काही ठिकाणी मुसळधार पाऊस, गडगडाटी वादळ आणि विजांचा कडकडाट होण्याची शक्यता आहे. रविवारी मंडीमध्ये मुसळधार पाऊस आणि शनिवारी लाहौल-स्पितीमध्ये मुसळधार बर्फवृष्टीची शक्यता आहे. हवामान खात्याने मनाली, नारकंडा, कुफरी, सोलांग व्हॅली, सिसू आणि आसपासच्या पर्यटन स्थळांमध्ये बर्फवृष्टी आणि शिमलामध्ये पाऊस पडण्याची शक्यता वर्तवली आहे. तसेच, पुढील दोन दिवसांत राज्यातील १० जिल्ह्यांमध्ये हलका पाऊस पडू शकतो यामध्ये सिरमौर, शिमला, मंडी, सोलन, हमीरपूर, बिलासपूर, उना, कांगडा, चंबा आणि कुल्लू यांचा समावेश आहे.
