Farmers’ Movement : दुष्काळग्रस्त शेतकऱ्यांना तातडीने आर्थिक मदत द्यावी, या मागणीसाठी शिवसेना (उद्धव बाळासाहेब ठाकरे) गटाने वाशिममध्ये आंदोलन केले. आमदार नितीन देशमुख यांच्या नेतृत्वाखाली शेलू बाजार परिसरातील समृद्धी महामार्गावर रास्तारोको करण्याचा प्रयत्न करण्यात आला. यावेळी मोठ्या संख्येने शेतकरी आणि शिवसैनिक सहभागी झाले होते.

दुष्काळामुळे शेतकऱ्यांचे मोठे नुकसान झाले आहे. त्यामुळे सरकारने मदत वाढवून सरसकट हेक्टरी एक लाख रुपये मदत द्यावी, अशी मागणी आंदोलकांनी केली.

आंदोलक समृद्धी महामार्गावर जाण्याचा प्रयत्न करत असताना पोलिसांनी अकोला-आर्णी मार्गाखाली बॅरिकेड्स लावून त्यांना रोखले. यावेळी पोलीस आणि कार्यकर्त्यांमध्ये झटापट झाली. परिस्थिती नियंत्रणात ठेवण्यासाठी पोलिसांनी आमदार नितीन देशमुख यांच्यासह अनेक कार्यकर्ते आणि पदाधिकाऱ्यांना ताब्यात घेतले.

आंदोलनाच्या पार्श्वभूमीवर परिसरात मोठा पोलीस बंदोबस्त तैनात करण्यात आला होता. काही काळ तणावाचे वातावरण निर्माण झाले होते.