Wai Weekly Market – वाई शहरातील आठवडी बाजाराच्या दिवशी गणपती मंदिराशेजारील पुलाच्या खालच्या बाजूस नदीपात्रातील अस्वच्छ पाण्यात भाजी धुतली जात असल्याचा प्रकार समोर आला आहे. याामुळे नागरिकांच्या आरोग्याशी खेळण्याचा गंभीर प्रश्न ऐरणीवर आला असून, संबंधित प्रशासनाच्या कार्यपद्धतीवर नागरिकांकडून प्रश्नचिन्ह उपस्थित केले जात आहे. वाई शहरात दर सोमवारी आठवडी बाजार भरतो.

या बाजारात शहरासह परिसरातील मोठ्या प्रमाणात भाजीपाला विक्रीसाठी आणला जातो. या पार्श्वभूमीवर गणपती मंदिराशेजारील पुलाखाली नदीपात्रात एका व्यक्तीकडून अस्वच्छ पाण्यात भाजी धुतली जात असल्याचे निदर्शनास आले. नदीपात्रातील पाण्यात मोठ्या प्रमाणात घाण व कचरा असल्याने अशा पाण्याचा भाजी धुण्यासाठी वापर होत असल्यास त्या भाजीपाल्याच्या स्वच्छतेचे काय असा गंभीर प्रश्न निर्माण झाला आहे.

भाजीपाला हा नागरिकांच्या आहाराचा भाग असल्याने तो कोणत्या पाण्यात धुतला जातो, त्याची स्वच्छता कशी केली जाते आणि विक्रीपूर्वी आरोग्याच्या दृष्टीने आवश्यक खबरदारी घेतली जाते का, याची तपासणी करणे आवश्यक आहे. विशेषतः आठवडी बाजाराच्या दिवशी या परिसरात मोठी गर्दी असते. अशा वर्दळीच्या ठिकाणी उघडपणे अस्वच्छ पाण्याचा वापर होत असतानाही संबंधित यंत्रणांचे याकडे दुर्लक्ष कसे झाले, असा सवाल नागरिकांकडून उपस्थित केला जात आहे.

बाजार परिसरातील स्वच्छता, भाजीपाला विक्रेत्यांकडून वापरले जाणारे पाणी तसेच विक्रीपूर्वी भाजीपाल्याची केली जाणारी स्वच्छता यांची संबंधित विभागाने तातडीने तपासणी करावी, अशी मागणी नागरिकांमधून होत आहे. नदीपात्राचा असा वापर करणार्‍यांवर योग्य ती कारवाई करून भविष्यात अशा घटना घडणार नाहीत, याची दक्षता घ्यावी, नागरिकांच्या आरोग्याशी संबंधित हा विषय गांभीर्याने घेऊन प्रशासनाने आठवडी बाजारात स्वच्छता व आरोग्यविषयक नियमांची काटेकोर अंमलबजावणी करावी, अशी अपेक्षा व्यक्त होत आहे.