Hair Care Tips: केसांची काळजी घेण्यासाठी आपण अनेकदा महागडे शॅम्पू, कंडिशनर, तेल आणि हेअर मास्क वापरतो. केस स्वच्छ धुणे आणि त्यांना योग्य पोषण देणे महत्त्वाचे आहेच. मात्र, केसांची निगा राखताना आपल्या रोजच्या सवयींकडेही लक्ष देणे गरजेचे आहे. विशेषतः रात्री झोपताना आपण केसांची कशी काळजी घेतो, याचा त्यांच्या स्थितीवर परिणाम होऊ शकतो.

दिवसभर काम करताना, प्रवास करताना किंवा केस विंचरताना केसांवर घर्षण होते. रात्री झोपताना उशीवर डोके सतत फिरल्यामुळेही केसांमध्ये घर्षण होऊ शकते. त्यामुळे केस गुंतणे आणि तुटणे यांचा त्रास वाढू शकतो. म्हणूनच झोपण्यापूर्वी केसांची योग्य काळजी घेणे आवश्यक आहे. यासाठी काही सोप्या टिप्स तुमच्या उपयोगी पडू शकतात.

१. ओल्या केसांनी झोपण्याची सवय टाळा

रात्री केस धुण्याची सवय असेल, तर झोपण्यापूर्वी ते व्यवस्थित वाळले आहेत की नाही, याकडे लक्ष द्या. ओले केस कोरड्या केसांच्या तुलनेत अधिक नाजूक असतात. त्यामुळे त्यांना विंचरताना किंवा उशीवर घासले जाताना केस तुटण्याची शक्यता वाढू शकते.

ओल्या केसांनी झोपल्यामुळे केसांचा गुंता होऊ शकतो. तसेच टाळू बराच वेळ ओलसर राहिल्यास काही लोकांमध्ये बुरशीजन्य संसर्गाचा धोका वाढू शकतो. त्यामुळे शक्यतो झोपण्यापूर्वी केस नैसर्गिकरीत्या वाळू द्या. केस लवकर वाळवण्यासाठी हेअर ड्रायर वापरत असाल, तर कमी उष्णतेचा पर्याय निवडा. खूप गरम हवा केसांवर सोडणे टाळा. केस ओले असताना जोरात विंचरणेही टाळावे.

२. झोपण्यापूर्वी केसांची सैल वेणी घाला

झोपताना आपण कुशी बदलतो, त्यामुळे केस उशीवर घासले जाऊ शकतात. यामुळे केसांचा गुंता होण्याची आणि ते तुटण्याची शक्यता वाढते. ही समस्या कमी करण्यासाठी झोपण्यापूर्वी केसांची सैल वेणी घालू शकता.

वेणीमुळे केस एकत्र राहतात आणि त्यांचा गुंता कमी होण्यास मदत होऊ शकते. मात्र, वेणी खूप घट्ट बांधू नका. घट्ट वेणी किंवा केसांना सतत ताण देणाऱ्या हेअरस्टाइलमुळे केसांच्या मुळांवर ताण येऊ शकतो.

केस बांधण्यासाठी मऊ आणि केस न ओढणारा हेअर टाय वापरा. केस कुरळे किंवा लांब असतील, तर त्यांना हलक्या हाताने व्यवस्थित करून झोपणे अधिक सोयीचे ठरू शकते. प्रत्येकाच्या केसांचा प्रकार वेगळा असल्यामुळे त्यानुसार योग्य पद्धत निवडावी.

३. उशीच्या कव्हरकडेही लक्ष द्या

केसांची निगा राखताना उशीच्या कव्हरचा विचार अनेकजण करत नाहीत. मात्र, झोपताना केस आणि उशी यांच्यात सतत घर्षण होते. त्यामुळे केस गुंतणे, विस्कटणे आणि तुटणे यांचा त्रास होऊ शकतो.

रेशीम किंवा सॅटिनसारख्या गुळगुळीत कापडाच्या उशीच्या कव्हरमुळे घर्षण कमी होण्यास मदत होऊ शकते. त्यामुळे केसांचा गुंता आणि कुरळ्या केसांमधील फ्रिझ कमी होण्यास फायदा होऊ शकतो. विशेषतः कुरळ्या आणि सहज गुंतणाऱ्या केसांसाठी हा पर्याय उपयोगी ठरू शकतो. उशीचे कव्हर नियमितपणे स्वच्छ ठेवणेही महत्त्वाचे आहे. घाम, धूळ आणि त्वचेवरील तेल यांचा त्यावर साठा होऊ शकतो. त्यामुळे स्वच्छतेकडे दुर्लक्ष करू नका.

केस निरोगी ठेवण्यासाठी आणखी काय कराल?

केसांची काळजी घेण्यासाठी केवळ शॅम्पू आणि तेल पुरेसे नाही. केसांच्या प्रकारानुसार योग्य शॅम्पू आणि कंडिशनर वापरा. केस ओले असताना त्यांना जोरात घासणे, वारंवार उष्णतेचा वापर करणे आणि केस घट्ट बांधणे टाळा. संतुलित आहार घ्या आणि केसांमध्ये होणारे बदल लक्षात ठेवा. केस खूप गळत असतील, सतत तुटत असतील किंवा टाळूला खाज आणि जळजळ होत असेल, तर त्वचारोगतज्ज्ञांचा सल्ला घ्या.

लक्षात ठेवा रात्री झोपण्यापूर्वीच्या छोट्या सवयी केसांचा गुंता आणि तुटणे कमी करण्यास मदत करू शकतात. त्यामुळे केसांची निगा राखताना दिवसभरासोबतच रात्रीच्या काळजीलाही महत्त्व द्या.