Municipal Corporation: दिवाळीपूर्वी कंत्राटी कामगारांच्या हातात पगार मिळावा, यासाठी महापालिका प्रशासनाने पावले उचलली आहेत. कंत्राटदारांनी ऑक्टोबर महिन्याचे वेतन ३० ऑक्टोबरपर्यंत अदा करावे, तसेच कामगारांच्या भविष्य निर्वाह निधीचा (ईपीएफ) भरणाही विहित मुदतीत करावा, असे आदेश अतिरिक्त महापालिका आयुक्त प्रजित नायर यांनी दिले आहेत.

महापालिकेच्या विविध विभागांमध्ये ठेकेदारांमार्फत कंत्राटी कामगारांची सेवा घेतली जाते. या कामगारांचे वेतन संबंधित विभागातील पर्यवेक्षकीय अधिकाऱ्यांच्या नियंत्रणाखाली नोंदवलेल्या हजेरीनुसार दिले जाते.

यंदा दिवाळीचा सण ५ नोव्हेंबरपासून सुरू होत असल्याने कामगारांना सणापूर्वी वेतन मिळावे, यासाठी प्रशासनाने हे निर्देश दिले आहेत. ऑक्टोबर महिन्यातील १ ते २० तारखेपर्यंतची प्रत्यक्ष हजेरी आणि २१ ते ३१ तारखेपर्यंतची संभाव्य हजेरी विचारात घेऊन पूर्ण महिन्याचे वेतन ३० ऑक्टोबरपर्यंत देण्यास सांगण्यात आले आहे. त्यामुळे महिना संपण्यापूर्वीच कामगारांना वेतन मिळणार आहे.

बोनस नाहीच
महापालिका कर्मचाऱ्यांना केंद्राच्या नियमानुसार वेतनवाढ देण्यात आल्यानंतर अनेक कामगारांचे वेतन २१ हजारांच्या पुढे गेले आहे. त्यामुळे या कामगारांचा ईएसआयसीचा लाभ गेला आहे. शिवाय, वेतनात वाढ झाल्याने त्यांना महापालिकेडून देण्यात येणारा बोनसही रद्द झाला आहे. परिणामी, यंदा या कामगारांना बोनस मिळणार नसला, तरी किमान वेतन दिवाळीच्या आधी मिळणार असल्याने त्यांची दिवाळी गोड होणार आहे.