Lok Sabha Election 2024 – देशात सध्या लोकसभा निवडणुका होत आहेत. लोकसभा निवडणुकीच्या प्रक्रियेचे आतापर्यंत चार टप्पे पूर्ण झाले आहेत. पाचव्या फेरीचा निवडणूक प्रचार शनिवारी संपला आहे. या टप्प्यासाठी २० मे रोजी मतदान होणार आहे. या टप्प्यात आठ राज्ये आणि केंद्रशासित प्रदेशांमधील ४९ जागांसाठी मतदान होणार आहे.

या राज्यांमधून ६९५ उमेदवार निवडणूक रिंगणात आहेत. प्रत्येक लोकसभा मतदारसंघात उमेदवारांची सरासरी संख्या १४ आहे. ज्या उमेदवारांचे भवितव्य पणाला लागले आहे त्यात संरक्षण मंत्री राजनाथ सिंह, माजी काँग्रेस अध्यक्ष राहुल गांधी, केंद्रीय मंत्री स्मृती इराणी, माजी मुख्यमंत्री ओमर अब्दुल्ला यांच्यासह अनेक दिग्गज चेहऱ्यांचा समावेश आहे.

राजनाथ सिंह: लखनौ
उत्तर प्रदेशातील लखनौ लोकसभा मतदारसंघ या निवडणुकीत लोकप्रिय जागा राहिली आहे. संरक्षणमंत्री राजनाथ सिंह भाजपच्या वतीने येथून निवडणूक लढवत आहेत. येथे सपाने रविदास मेहरोत्रा ​​यांना उमेदवारी दिली आहे. मंत्री राहिलेले मेहरोत्रा ​​सध्या लखनौ मध्य विधानसभा मतदारसंघातून सपा आमदार आहेत.

बसपने लखनौमध्ये सरवर मलिक यांना उमेदवारी दिली आहे. २०१९ च्या लोकसभा निवडणुकीत राजनाथ सिंह यांनी या जागेवर विजय मिळवला. त्यावेळी लखनौच्या जागेवर ५४.७८% मतदान झाले होते.

राहुल गांधी: रायबरेली
रायबरेली लोकसभा सीट ही उत्तर प्रदेशातील सर्वाधिक चर्चेत असलेली जागा आहे. २०१९ मध्ये काँग्रेसने जिंकलेली राज्यातील ही एकमेव जागा आहे. त्यानंतर सोनिया गांधी येथून विजयी होऊन लोकसभेत पोहोचल्या होत्या. सोनिया आता राज्यसभेवर निवडून आल्या आहेत.

प्रदीर्घ प्रतिक्षेनंतर काँग्रेसने राहुल गांधींना रायबरेलीतून उमेदवारी दिली आहे. भाजपने येथे दिनेश प्रताप सिंह यांना उमेदवारी जाहीर केली आहे. एमएलसी दिनेश प्रताप सध्या योगी सरकारमध्ये मंत्री आहेत.

२०१९ मध्ये काँग्रेसच्या सोनिया गांधी यांनी रायबरेलीच्या जागेवर भाजपचे दिनेश प्रताप यांचा पराभव केला. मागील निवडणुकीत येथे ५४.०८% मतदान झाले होते.

स्मृती इराणी: अमेठी
केंद्रीय मंत्री आणि अमेठीच्या विद्यमान खासदार स्मृती इराणी पुन्हा एकदा भाजपच्या तिकीटावर येथून निवडणूक लढवत आहेत. उमेदवारी अर्जाच्या शेवटच्या दिवशी काँग्रेसने गांधी घराण्याच्या जवळचे किशोरीलाल शर्मा यांना उमेदवारी दिली.

बसपाने येथे नन्हे सिंह चौहान यांना उमेदवारी दिली आहे. २०१९ मध्ये भाजपच्या उमेदवार स्मृती इराणी यांनी तत्कालीन काँग्रेस अध्यक्ष राहुल गांधी यांचा पराभव केला होता. मागील निवडणुकीत येथे ५४.०८% लोकांनी मतदानाचा हक्क बजावला होता.

चिराग पासवान: हाजीपूर
बिहारमधील हाजीपूर लोकसभा जागा या निवडणुकीतील एक लोकप्रिय जागा आहे. येथून एलजेपी (आर) चे चिराग पासवान एनडीएकडून निवडणूक लढवत आहेत. हाजीपूर जागेवर आरजेडीने शिवचंद्र राम यांना तिकीट दिले आहे. शिवचंद्र हे बिहार सरकारमध्ये आमदार आणि मंत्री राहिले आहेत.

२०१९ च्या निवडणुकीत एलजेपीच्या पशुपती पारस यांनी हाजीपूर मतदारसंघातून विजय मिळवला होता. मागील निवडणुकीत येथे ५५.२६% मतदान झाले होते.

ओमर अब्दुल्ला : बारामुल्ला
काश्मीरच्या खोऱ्यातील डोंगरांवर बर्फ पडत असला तरी येथील राजकीय तापमान तापले आहे. माजी मुख्यमंत्री ओमर अब्दुल्ला हे काश्मीरमधील बारामुल्ला मतदारसंघातून निवडणूक लढवत असल्याने ही जागा खास बनली आहे.

उमर यांचा सामना मेहबूबा मुफ्ती यांच्या पीडीपी पक्षाकडून फैयाज अहमद यांच्याशी आहे. गेल्या निवडणुकीत ही जागा नॅशनल कॉन्फरन्सचे अकबर लोन यांनी जिंकली होती. २०१९ च्या निवडणुकीत येथे ३४.६% मतदान झाले होते.