भारतीय संघाचा मधल्या फळीतील फलंदाज सूर्यकुमार यादव ( Suryakumar Yadav ) आजकाल त्याच्या फलंदाजीमुळे तुफान चर्चेत राहिला आहे. सध्या सूर्यकुमार टीम इंडियासोबत न्यूझीलंड दौऱ्यावर आहे. त्याच्या या ३ सामन्यांच्या टी-२० मालिकेतील दमदार कामगिरीसाठी त्याला मालिकावीर पुरस्काराने सन्मानित केले. त्यानंतर आता न्यूझीलंडविरुद्धच्या पहिल्या एकदिवसीय सामन्यात सूर्या फलंदाजीत अपयशी राहिला मात्र, पुढच्या दोन सामन्यांमध्ये त्याला शांत ठेवणे न्यूझीलंडच्या गोलंदाजांची कठीण असणार आहे. या वनडे मालीकेतील दुसरा सामना रविवारी (२७ नोव्हेंबर) खेळला जाणार आहे. दरम्यान, सूर्यकुमार यादवने विराट कोहलीबाबत मोठा वक्तव्य केले आहे.
विराट कोहली नेहमीच सूर्यकुमार यादवच्या ( Suryakumar Yadav ) कामगिरीला प्रोत्साहन देताना दिसला आहे. सूर्यकुमार जेव्हाही चांगली खेळी करतो तेव्हा विराट सोशल मीडियावरून त्याचे कौतुक करत असतो. न्यूझीलंडविरुद्धच्या टी-२० मालिकेतील दुसऱ्या सामन्यात सूर्यकुमार यादवने नाबाद १११ धावांची खेळी केली तेव्हाही विराट कोहलीने ट्विट करत त्याचे कौतुक केले. विराटने ट्विट केले की,”मला सामना पाहताना सूर्यकुमार एखाद्या व्हिडिओ गेम पात्रासारखा वाटत होता”. दरम्यान, सूर्यकुमार यादवला विचारण्यात आले की, विराट कोहलीचे कौतुक करणारा त्याचा फ्रेम केलेला फोटो तुम्हाला कोणी भेट दिला, तर तुम्ही तो कुठे ठेवणार. यावर सूर्यकुमारने उत्तर दिले की, “मी तो माझ्या ट्रॉफी रूममध्ये ठेवेन आणि रोज उठून पाहीन.”
भारतीय कर्णधार रोहित शर्मासोबत सूर्यकुमार यादव ( Suryakumar Yadav ) बऱ्याच काळापासून आयपीएलमध्ये खेळत आहे. भारतीय संघात खेळण्यापूर्वी सूर्यकुमार यादव मुंबई इंडियन्स संघात रोहित शर्माच्या नेतृत्वाखाली अनेक सामने खेळला आहे. सूर्यकुमार यादवला त्याच्या खेळण्याच्या शैलीवरून 360 डिग्री फलंदाज म्हटले जात आहे. सूर्यकुमारकडे सर्व प्रकारचे शॉट्स खेळण्याचे कौशल्य आहे. सूर्यकुमारला जेव्हा विचारले गेले की त्याला इतर कोणत्या फलंदाजाचा कोणता शॉट चोरावा वाटतो. त्यावर त्याने सांगितले की,’मला रोहित शर्माचा पुल शॉट चोरायला आवडेल.’
