Akshay Kumar : बॅालिवूडचा खिलाडी कुमार अभिनेता अक्षय कुमारच्या कारवर जम्मू पोलिसांनी कारवाई केली आहे. जम्मूमधील एका कार्यक्रमस्थळी अक्षय कुमार आपल्या एसयूव्ही कार घेऊन आला होता, पण वाहतूक पोलिसांनी त्याची कार जप्त केली आहे. वाहतूक नियमांचं उल्लंघन केल्याप्रकरणी जम्मूच्या वाहतूक पोलिसांनी ही कारवाई केली आहे. सोशल मीडियावर वाहतूक पोलीस त्याच्या कारवर कारवाई करतानाचा व्हिडीओ व्हायरल झाला आहे.

जम्मू पोलिसांनी दिलेल्या माहितीनुसार, बॉलिवूड अभिनेता अक्षय कुमारच्या कारला काळ्या काचा होत्या. जे जम्मूमधील मोटार वाहन कायद्याच्या नियमांविरुद्ध आहे. कायदा सर्वांसमाठी समान आहे, मग तो सामान्य नागरिक असो वा सेलिब्रिटी. नियमांचं उल्लंघन करणाऱ्यांवर कठोर कारवाई सुरूच राहील, असं जम्मू पोलिसांंकडून सांगण्यात आलं आहे. मात्र, याबाबत अद्यापर्यंत अक्षयने आपली प्रतिक्रिया दिलेली नाही.

खिलाडीकुमार जम्मूला कशासाठी गेला?

अक्षय कुमार सेलिब्रिटी असल्यानं त्याला कार्यक्रमांच्या उद्घाटनासाठी आमंत्रण देण्यात येतात. असंच एक आमंत्रण जम्मूमधील एका खाजगी ज्वेलरी शोरूमच्यासाठी देण्यात आलं होतं. त्याच्या हस्ते या शोरूमचं उद्घाटनाचा कार्यक्रम पार पडला. कार्यक्रमस्थळी पोहचण्याअगोदर अक्षयनं जम्मूपर्यंत ज्या एसयूव्हीनं प्रवास केला, त्या रेंज रोव्हरच्या खिडक्यांना काळी फिल्म लावण्यात आलेली, हीच कार जम्मू वाहतूक पोलिसांनी जप्त केली आहे. दरम्यान, जम्मू पोलिसांनी केलेली कारवाई सध्या चर्चेचा विषय ठरत आहे.

मीडिया रिपोर्टनुसार, अक्षय कुमारनं कार्यक्रमस्थळ डोगरा चौक ते जम्मू विमानतळ असा प्रवास या कारने केला. वाहतूक पोलिसांनी डोगरा चौकाजवळ गाडी थांबवली. कारच्या खिडक्यांवर जास्त काळी फिल्म लावलेली पोलिसांना आढळून आली.  वाहतूक कर्मचाऱ्यांनी चालकाकडे काळी फिल्म लावण्याच्या परवानगीशी संबंधित कागदपत्रं मागितली. पण, तो कोणतेही वैध कागदपत्र सादर करू शकला नाही. त्यानंतर पोलिसांनी ही कार जप्त केली आहे.

हेही वाचा : Pimpri : थाय बॉक्सिंग स्‍पर्धा उत्‍साहात