Vinod Kambli Biopic : भारतीय क्रिकेट विश्वात एकेकाळी आपल्या तुफानी फलंदाजीने भल्याभल्या गोलंदाजांना घाम फोडणारा स्टार फलंदाज विनोद कांबळी (Vinod Kambli Biopic) याचे आयुष्य नेहमीच चर्चेचा आणि गूढाचा विषय राहिले आहे.

मैदानातील दैदिप्यमान यश, अचानक आलेली घसरण आणि वैयक्तिक आयुष्यातील वादळं आता कोणत्याही चित्रपटाच्या मर्यादेत न अडकता थेट एका भव्य वेब सीरिजच्या माध्यमातून जगभरातील प्रेक्षकांसमोर उलगडणार आहेत.

दिग्दर्शक अभिजीत देशपांडे यांनी कांबळी (Vinod Kambli Biopic) यांच्या आयुष्यातील अनेक अज्ञात पैलूंवर प्रकाश टाकण्यासाठी ‘कांबळी’ या बहुप्रतिक्षित हिंदी वेब सीरिजची घोषणा केली असून, या सीरिजची निर्मिती ‘200 नॉट आऊट प्रोडक्शन्स’चे रवी भागचंदका करत आहेत. ही सीरिज लवकरच एका नामांकित डिजिटल प्लॅटफॉर्मवर दाखल होणार आहे.

दिग्दर्शक अभिजीत देशपांडे यांनी २०१९ मध्येच कांबळी यांच्या जीवनप्रवासावर सखोल संशोधन आणि कथालेखन सुरू केले होते. सुरुवातीला यावर एक मराठी चित्रपट बनवण्याचा विचार होता, परंतु अभ्यासादरम्यान कांबळींची जीवनकथा, त्यांची अफाट गुणवत्ता आणि चढ-उतार इतके विस्तृत असल्याचे समोर आले की अवघ्या दोन-अडीच तासांच्या चित्रपटात त्याला न्याय देणे अशक्य होते. त्यामुळेच प्रेक्षकांना या वादळी प्रवासाचा प्रत्येक टप्पा सविस्तर अनुभवता यावा म्हणून वेब सीरिजचा मोठा कॅनव्हास निवडण्यात आला.

ही कथा केवळ कांबळींचे (Vinod Kambli Biopic) क्रिकेट किंवा त्यांच्याभोवती फिरणारे वाद यापुरती मर्यादित नसेल, तर एक क्रिकेटपटू म्हणून आणि त्याहूनही अधिक एक माणूस म्हणून त्यांनी अनुभवलेला संघर्ष यात मांडला जाईल. यासोबतच क्रिकेट जगताला भुरळ घालणारी मास्टर ब्लास्टर सचिन तेंडुलकर आणि विनोद कांबळी यांच्यातील ऐतिहासिक मैत्रीचे बंध आणि त्यातील विविध पैलूही या मालिकेतून पहिल्यांदाच वेगळ्या नजरेतून उलगडणार आहेत.

या महत्त्वाकांक्षी भूमिकेसाठी निर्माते कोणत्याही प्रस्थापित मोठ्या सुपरस्टारचा चेहरा न वापरता अशा एका नव्या चेहऱ्याच्या शोधात आहेत, जो हुबेहूब कांबळी यांची देहबोली, स्वॅग आणि व्यक्तिमत्त्व पडद्यावर जिवंत करू शकेल.

सीरिजच्या चित्रीकरणाची अधिकृत तारीख निश्चित झालेली नसली तरी येत्या नोव्हेंबर २०२६ मध्ये एकाच सलग शेड्युलमध्ये ३ ते ४ महिन्यांत चित्रीकरण पूर्ण करण्याचे नियोजन सुरू आहे. ‘कांबळी’चे काम पूर्ण झाल्यानंतर दिग्दर्शक अभिजीत देशपांडे पुन्हा ज्येष्ठ चित्रपट निर्माते व्ही. शांताराम यांच्या बायोपिकवर लक्ष केंद्रित करतील.