Anand Shinde Gurupurnima : लोकगीतांचे बादशहा, महागायक आणि अखिल भारतीय मराठी चित्रपट महामंडळाचे उपाध्यक्ष आनंद प्रल्हाद शिंदे यांच्या गुरुपौर्णिमेनिमित्त पुण्यातील बालगंधर्व रंगमंदिर येथे ‘आनंद गुरुपौर्णिमा महोत्सवा’चे भव्य आयोजन करण्यात आले. आनंद शिंदे यांचे पट्टशिष्य प्रसिद्ध गायक अमर पुणेकर यांच्या संकल्पनेतून साकारलेला हा महोत्सव सकाळी १० ते मध्यरात्री १२ वाजेपर्यंत उत्साहात पार पडला. (Anand Shinde Gurupurnima)

महाराष्ट्राच्या विविध भागांतून आलेल्या हजारो शिष्यांनी सकाळपासूनच बालगंधर्व रंगमंदिरात गर्दी करत आपल्या गुरूंना वंदन केले. सकाळी ११ वाजता पुणे महानगरपालिकेचे उपमहापौर परशुराम वाडेकर यांच्या उपस्थितीत आनंद शिंदे यांच्या हस्ते छत्रपती शिवाजी महाराज, क्रांतिसूर्य महात्मा ज्योतिबा फुले आणि भारतरत्न डॉ. बाबासाहेब आंबेडकर यांच्या पुतळ्यांना पुष्पहार अर्पण करून अभिवादन करण्यात आले. यानंतर कार्यक्रमाला सुरुवात झाली. (Anand Shinde Gurupurnima)

दुपारी १२ वाजता अखिल भारतीय मराठी चित्रपट महामंडळाचे अध्यक्ष मेघराज राजेभोसले यांच्या उपस्थितीत गुरुवर्य आनंद शिंदे आणि त्यांच्या मातोश्री रुक्मिणीबाई प्रल्हाद शिंदे यांचे शिष्य परिवाराच्या वतीने गुरुपूजन करण्यात आले. त्यानंतर सांस्कृतिक कार्यक्रमाला सुरुवात झाली. (Anand Shinde Gurupurnima)

शिष्यांनी सादर केली आनंद शिंदेंची गाजलेली गाणी

सांस्कृतिक महोत्सवात आनंद शिंदे यांच्या विविध गाण्यांचे सादरीकरण करण्यात आले. प्रसिद्ध गायक आदर्श शिंदे, डॉ. उत्कर्ष शिंदे, अमर पुणेकर, समर्थक शिंदे, आल्हाद शिंदे, कोमल पाटोळे, संतोष चव्हाण, देवा जगताप, चेतन लोखंडे, बबन दीपके, रागिनी गोडबोले, रवी भद्रे यांच्यासह अनेक शिष्यांनी विविध गीतप्रकार सादर करत उपस्थितांची मने जिंकली. (Anand Shinde Gurupurnima)

‘स्वरसम्राट प्रल्हाद शिंदे स्मृती सन्मान २०२६’ प्रदान

सायंकाळी विविध क्षेत्रातील मान्यवरांच्या उपस्थितीत ‘स्वरसम्राट प्रल्हाद शिंदे स्मृती सन्मान २०२६’ प्रदान करण्यात आले. केंद्रीय सामाजिक न्याय राज्यमंत्री रामदास आठवले, महाराष्ट्राचे सांस्कृतिक राज्यमंत्री ॲड. आशिष शेलार, उद्योग व मराठी राजभाषा मंत्री उदय सामंत, उपमहापौर परशुराम वाडेकर, मेघराज राजेभोसले, शिवसेना उपनेते इरफान सय्यद, भाजप महाराष्ट्र प्रदेश सरचिटणीस संजय पांडे, नगरसेवक धीरज घाटे आणि नगरसेवक अमर आवळे यांच्या हस्ते विविध मान्यवरांचा सन्मान करण्यात आला. (Anand Shinde Gurupurnima)

यामध्ये ज्येष्ठ अभिनेते, निर्माते, गायक व दिग्दर्शक सचिन पिळगावकर, लेखक-दिग्दर्शक-अभिनेते प्रविण तरडे, संगीतकार अमितराज, राष्ट्रपती पारितोषिक विजेत्या मंगला बनसोडे, लेखक-गीतकार क्षितिज पटवर्धन, दिग्दर्शक सतीश राजवाडे, भारूड कलाकार लक्ष्मण राजगुरू, शाहिर सुरेश जाधव, उद्योजक विक्रम विठ्ठल कामत, सौरभ सदानंद चांदेकर आणि लोककलावंत मीरा उमप यांचा समावेश होता. (Anand Shinde Gurupurnima)

‘शिंदे कुटुंबाने लोकगीतांतून देशाला आनंद दिला’

सन्मान स्वीकारल्यानंतर सचिन पिळगावकर यांनी प्रल्हाद शिंदे आणि आनंद शिंदे यांच्या लोकगीत क्षेत्रातील योगदानाचे कौतुक केले. शिंदे कुटुंबाने महाराष्ट्रासह संपूर्ण देशाला लोकगीतांच्या माध्यमातून निखळ आनंद दिला असून, त्यांच्याप्रती आपण कायम ऋणी असल्याचे त्यांनी सांगितले. (Anand Shinde Gurupurnima)

सांस्कृतिक मंत्री आशिष शेलार यांनीही शिंदे कुटुंबाच्या योगदानाचे कौतुक केले. ‘महाराष्ट्रातील प्रत्येक माणसाला शिंदेशाहीने कायम मनमुराद आनंद दिला. गीतगायनाच्या माध्यमातून महापुरुषांचे विचार तळागाळापर्यंत पोहोचवले आणि लोकगीतांमधून जनतेला मानसिक समाधान दिले,’ असे ते म्हणाले. (Anand Shinde Gurupurnima)

‘पुढील वर्षापासून महाराष्ट्रातील विविध जिल्ह्यांत महोत्सव’

‘आनंद गुरुपौर्णिमा महोत्सवा’चे हे पहिलेच वर्ष असून पुण्यातून या महोत्सवाची सुरुवात झाल्याचा आनंद असल्याचे गायक अमर पुणेकर यांनी सांगितले. पुढील वर्षापासून दरवर्षी महाराष्ट्रातील विविध जिल्ह्यांमध्ये या महोत्सवाचे आयोजन करण्यात येणार असल्याचे त्यांनी स्पष्ट केले. (Anand Shinde Gurupurnima)

महोत्सव यशस्वी करण्यासाठी आनंद शिंदे यांचे शिष्य सुप्रसिद्ध गायक अमर गफूरभाई पुणेकर, रशीद पुणेकर, शीतल माने, संदीप चित्ते, गरुडा गुलिग, कोमल पाटोळे, विशाल चव्हाण, संगीता भंडारे, गौतम हराळ, समर्थक शिंदे, अनिल गायकवाड, विशाल सोनवणे, प्रफुल्ल सोनवणे आणि आशिष गायकवाड यांच्यासह बालगंधर्व परिवार ट्रस्टच्या कार्यकारिणीने आणि शिष्य परिवाराने परिश्रम घेतले. (Anand Shinde Gurupurnima)