Vinesh Phogat : विनेश अपात्र ठरल्यानंतर अवघा भारत हळहळला.! पीएम मोदी, राहुल गांधींसह अनेकांनी दिल्या प्रतिक्रिया; जाणून घ्या, कोण-काय म्हणालं ‘ते’ फक्त एका क्लिककर…
Vinesh Phogat Paris Olympics Disqualification :- ऑलिम्पिक स्पर्धेसाठी रवाना होण्याआधी विनेशने कुस्ती महासंघाचे तत्कालिन अध्यक्ष ब्रिजभूषण सिंह यांच्याविरोधातील आंदोलनात सक्रीय सहभाग नोंदवला होता. या आंदोलनात विनेश आणि तिच्या सहकाऱ्यांवर राजकीय हेतूने आंदोलनात सहभागी झाल्याचेही आरोप झाले होते. देशातील आंदोलनाची पार्श्वभूमी मागे ठेवून विनेश पॅरिस ऑलिम्पिकसाठी पात्र ठरत तिने अंतिम फेरीत धडकही मारली. विनेशचा फॉर्म पाहता ती सुवर्ण पदकाची दावेदार मानली जात होती. अवघा भारत आज सुवर्ण पदकाची वाट पाहत होता. या ऐतिहासिक विजयाच्या उंबरठ्यावर असताना जिंकलेल्या विनेशला पुन्हा नशिबाने हरवले. फक्त 100 ग्रॅम वजन जास्त भरल्याने तिला स्पर्धेतून अपात्र ठरविल्याने अवघ्या देशातून हळहळ व्यक्त करण्यात आली.
कुस्तीत 50 किलो वजनी गटाच्या अंतिम फेरीत स्थान निश्चित करणारी भारताची कुस्तीपटू विनेश फोगटला १०० ग्रॅम वजन जास्त भरल्याने अपात्रतेचा सामना करावा लागला. अंतिम फेरीत पोहचल्याने भारताला सुवर्ण किंवा रौप्य पदक मिळाले असते, मात्र ती आता थेट अपात्रच ठरल्याने भारताचे पदक देखील दुरावले आहे. या घटनेनंतर मात्र विनेशला अंतिम फेरीत पोहचून देखील पदकाविनाच मायदेशी परतावे लागणार आहे. पॅरिसमध्ये झालेल्या या घटनेचे प्रखर पडसाद भारतामध्ये उमटले आहेत. त्यामुळे अनेक उलट-सुलट चर्चांना सुरुवात झाली आहे. यामध्ये भर म्हणून विनेशच्या कुटुंबियांकडून देखील आक्षेप घेण्यात आले आहेत. या आक्षेपामुळे राजकीय वातावरण देखील तापले आहे.
कुटुंबाकडून आरोपांच्या फैरी…
विनेश फोगटचे सासरे राजपाल भाटी यांनी काही दिवसांपूर्वी एका मुलाखतीमध्ये विनेशने आपल्या विरोधात षडयंत्र रचण्यात येईल अशी आशंका व्यक्त केली असल्याचे म्हटले आहे. या षड्यंत्रात केंद्र सरकार आणि फेडरेशनचा हात असल्याचा दावा करताना भाटी यांनी विनेशची सपोर्टींग स्टाफने दिशाभूल केली असल्याचा दावा देखील त्यांनी केला आहे. त्यांच्या दाव्यामुळे खळबळ उडाली असून यावरून राजकारण देखील मोठ्या प्रमाणात तापले आहे.
पंतप्रधान नरेंद्र मोदी काय म्हणाले?
तुम्ही विजेत्या आहात. तुम्ही भारताचा अभिमान असून प्रत्येक भारतीयांसाठी प्रेरणा आहात. आजचा धक्का त्रासदायक असला तरी मला खात्री आहे की, तुम्ही हे आव्हान पेलून पुन्हा जोरात परत येणार. आम्ही सर्व तुमच्या पाठीशी आहोत अशी प्रतिक्रिया पंतप्रधान नरेंद्र मोदी यांनी दिली.
आम्हाला मोठा धक्का बसला – महावीर फोगट
विनेश अपात्र झाल्याने आम्हाला मोठा धक्का बसला आहे. विनेश हार मानणारी मुलगी नाही. ती पुन्हा एकदा मैदानात उतरून भारतासाठी पदक आणेल, असा विश्वास विनेशचे काका महावीर फोगट यांनी व्यक्त केला. महावीर फोगट यांनी गीता आणि बबिता या बहिणांना कुस्तीचे धडे देताना भारताला आंतरराष्ट्रीय स्पर्धामध्ये पदक मिळवून दिले होते.
राहुल गांधी काय म्हणाले?
“विश्वविजेत्या कुस्तीपटूंना पराभूत करून अंतिम फेरीत पोहोचलेल्या भारताची शान विनेश फोगाटला काही कारणास्तव अपात्र ठरवण्यात आले हे दुर्दैवी आहे. भारतीय ऑलिम्पिक संघटना या निर्णयाला जोरदार आव्हान देईल आणि देशाच्या कन्येला न्याय देईल, अशी आम्हाला पूर्ण आशा आहे. विनेश हिम्मत हारणारी नाही, ती आणखी मजबूतपणे रिंगणात परतेल असा आम्हाला विश्वास आहे. विनेश तुम्ही नेहमीच देशाचा अभिमान वाढवला आहेस. आजही संपूर्ण देश तुमची ताकद म्हणून तुमच्या पाठीशी उभा आहे.
भारतीय ऑलिम्पिक संघटनेचे स्पष्टीकरण
विनेश अपात्र ठरल्यानंतर भारतात मोठ्या प्रमाणात गोंधळ निर्माण झाला आहे. त्यामुळे भारतीय ऑलिम्पिक संघटनेने यावर स्पष्टीकरण दिले आहे. विनेश फोगटला महिलांच्या ५० किलो स्पर्धेतून अपात्र करण्यात आले आहे. रात्रभर प्रयत्न करून देखील तिचे वजन काही ग्रॅम जास्त भरले आहे. त्यामुळे तिला या अपात्रतेचा सामना करावा लागला आहे. यासंदर्भात अधिक टिप्पणी केली जाणार नाही. विनेशच्या प्रायव्हसीचा आदर करून संघाला इतर स्पर्धांवर लक्ष केंद्रित करू द्यावे, असे आयओएने म्हटले आहे.
क्रिकेटपटूसह इतर माजी कुस्तीपटूंच्या प्रतिक्रिया…..
हे अत्यंत दुर्दैवी आणि चुकीचेही आहे. मला आशा आहे की, भारतीय अधिकारी याची दखल घेतील आणि तीव्र निषेध व्यक्त करतील, कारण हा प्राथमिक फेरीचा सामना नव्हता. हा पदकफेरीचा आणि त्यात सुवर्णपदकासाठीचा सामना होता. त्यामुळे, भारतीय ऑलिम्पिक संघटना किंवा भारत सरकारने याला कडाडून विरोध करायला हवा.
– सुनील गावसकर, माजी क्रिकेटपटू
मी खूप दुःखी आहे. सध्या विनेश कुठल्या मनस्थितीतून जात असेल याची कल्पनाही कोणी करू शकत नाही. तरीही तिने खचून जावू नये, कारण, ‘लंबी है गम की शाम मगर शाम ही तो है’.
– साक्षी मलिक, कांस्यपदक विजेती, रिओ ऑलिम्पिक
हे षडयंत्र असू शकते. शंभर ग्रॅम, म्हणजे, हा विनोद आहे का? आम्ही खेळाडू एका रात्रीत पाच ते सहा किलो वजन कमी करू शकतो. आपली भूक आणि तहान कशी नियंत्रित करायची हे आम्हाला चांगले माहित आहे. खेळातील भारताचा वाढता दर्जा पाहून लोकांना आनंद होत नाही, हाच या कटाचा अर्थ आहे. विनेशने इतके दु:ख सोसले आहे की, याप्रसंगानंतर अत्यंत वाईट वाटले.
– विजेंदर सिंग, माजी भारतीय बॉक्सर
आपल्या देशासाठी हे अत्यंत दुर्दैवी आहे की, इतकी चांगली कुस्ती खेळूनही आणि अंतिम फेरीसाठी पात्र ठरल्यानंतरही 100 ग्रॅम जास्त वजनामुळे विनेशला अपात्र ठरवण्यात आले. भारत सरकारने विनेशला प्रशिक्षक, पोषणतज्ञ आणि फिजिओ दिले आहेत. ते सर्व क्रीडाग्रामात तिच्यासोबत आहेत. तिचे वजन 2 दिवस स्थिर होते पण ते एका रात्रीत वाढले, त्याचे कारण फक्त तिचे पोषणतज्ञ आणि प्रशिक्षकच सांगू शकतात.
– संजय सिंग, अध्यक्ष, भारतीय कुस्ती महासंघ
कुस्तीपटू विनेश फोगटवर भारत सरकारने किती पैसे खर्च केले? क्रीडामंत्र्यांनी लोकसभेत दिला पूर्ण हिशोब
विनेशचे अपात्र होणे, हे देशाचे नुकसान आहे. भारतीय कुस्ती महासंघ याबाबत काय करू शकतो, याचा विचार करेल व त्यासाठी नक्कीच कार्यवाही करेल.
– खा.करण भूषण सिंह, ब्रिजभूषण यांचा मुलगा
दरम्यान, 50 किलो वजनी गटाच्या अंतिम सामन्यापूर्वी जास्त वजन आढळल्याने पॅरिस ऑलिम्पिकसाठी अपात्र ठरलेली कुस्तीपटू विनेश फोगट हिला न्याय मिळावा, या मागणीसाठी राज्यसभेतील विरोधी सदस्यांनी घोषणाबाजी केली आणि त्यांना नकार दिल्यानंतर सभागृहातून बाहेर पडले. राज्यसभेचे अध्यक्ष जगदीप धनखर यांनी विरोधी पक्षनेते मल्लिकार्जुन खर्गे यांच्यासह विरोधी सदस्यांच्या वर्तनावर टीका केली आणि त्यांनी अध्यक्षांवर प्रश्न केल्याचा आणि त्यांच्या घटनात्मक कर्तव्यातून बाहेर पडण्याचा आरोप केला.
