Vidarbha Rain : विदर्भात ऑगस्ट महिन्यात पावसाने पाठ फिरवल्याने पावसाचे संकट अधिक गडद झाले आहे. संपूर्ण विदर्भात ऑगस्ट महिन्यात अपेक्षित पावसाच्या तुलनेत तब्बल ५८ टक्के पावसाची तूट नोंदवण्यात आली आहे. याचा थेट परिणाम शेतीसह जलसाठ्यांवर होण्याची शक्यता आहे. (Vidarbha Rain)

हवामान विभागाच्या आकडेवारीनुसार, ऑगस्ट महिन्यात विदर्भात सरासरी २९७ मिलिमीटर पाऊस अपेक्षित होता. मात्र, प्रत्यक्षात केवळ १२५ मिलिमीटर पावसाची नोंद झाली. त्यामुळे ऑगस्टमध्ये विदर्भात ५८ टक्के पावसाची तूट राहिली आहे. (Vidarbha Rain)

या पावसाच्या तुटीचा सर्वाधिक फटका अकोला जिल्ह्याला बसला आहे. अकोल्यात ऑगस्ट महिन्यात तब्बल ८४ टक्के, तर अमरावतीत ८२ टक्के पावसाची तूट नोंदवण्यात आली. यवतमाळमध्ये ७८ टक्के, वर्ध्यात ७३ टक्के, नागपुरात ७१ टक्के आणि वाशिममध्येही ७१ टक्के पाऊस कमी झाला आहे. (Vidarbha Rain)

जून ते ऑगस्टदरम्यानही पावसाची २२ टक्के तूट

ऑगस्ट महिन्यातील परिस्थिती चिंताजनक असतानाच, जूनपासून ऑगस्टअखेरपर्यंतची आकडेवारीही समाधानकारक नाही. या तीन महिन्यांच्या कालावधीत विदर्भात सरासरी ७८१ मिलिमीटर पाऊस अपेक्षित होता. मात्र, प्रत्यक्षात ६०७ मिलिमीटर पाऊस झाला. त्यामुळे या कालावधीत एकूण २२ टक्के पावसाची तूट नोंदवण्यात आली आहे. (Vidarbha Rain)

जून आणि जुलैमध्ये काही भागांत चांगला पाऊस झाल्यानंतर ऑगस्टमध्ये मात्र पावसाने अचानक दडी मारली. त्यामुळे पावसावर मोठ्या प्रमाणात अवलंबून असलेल्या विदर्भातील शेतीसमोर संकट निर्माण झाले आहे. (Vidarbha Rain)

पुढील काही दिवसांत पावसाची शक्यता

दरम्यान, प्रादेशिक हवामान विभागाच्या नागपूर केंद्राने २ ते ४ सप्टेंबरदरम्यान विदर्भातील काही जिल्ह्यांमध्ये मध्यम ते दमदार पावसाची शक्यता व्यक्त केली आहे. त्यामुळे पुढील काही दिवसांत होणाऱ्या पावसामुळे ऑगस्टमध्ये निर्माण झालेली तूट काही प्रमाणात भरून निघते का, याकडे शेतकरी आणि प्रशासनाचे लक्ष लागले आहे. हवामानातील बदलांचा मान्सूनवर परिणाम होत असून, एल निनोच्या प्रभावामुळे पावसाच्या वितरणावरही परिणाम होण्याची शक्यता व्यक्त केली जात आहे. (Vidarbha Rain)

ऑगस्टमधील विदर्भातील पावसाची स्थिती

अपेक्षित पाऊस – २९७ मिमी
प्रत्यक्ष पाऊस – १२५ मिमी
पावसाची तूट – ५८%

१ जून ते ऑगस्टअखेर

अपेक्षित पाऊस – ७८१ मिमी
प्रत्यक्ष पाऊस – ६०७ मिमी
पावसाची तूट – २२%

जिल्हानिहाय पावसाची तूट

अकोला – ८४%
अमरावती – ८२%
यवतमाळ – ७८%
वर्धा – ७३%
नागपूर – ७१%
वाशिम – ७१%
संपूर्ण विदर्भ – ५८%