नवी दिल्ली – उपराष्ट्रपतीं धनखड यांनी राष्ट्रविरोधी नॅरेटीव्हची तुलना कोविडच्या विषाणुशी केली असून अशा राष्ट्रविरोधी शक्ती संपुष्टात आणाव्या लागतील असे त्यांनी म्हटले आहे. कुरूक्षेत्र विद्यापीठात आंतरराष्ट्रीय गीता महोत्सवाच्या संदर्भात आयोजित करण्यात आलेल्या एका कार्यक्रमात प्रमुख पाहुणे म्हणून ते बोलत होते.

धनखड म्हणाले की एका योजनेनुसार किंवा समज कमी असल्यामुळे असेल काही मंडळी राष्ट्रविरोधी गोष्टी पसरवण्याचे काम करतात. मात्र असे व्हायला नको. असल्या प्रकारांचा आपण विरोध केला पाहिजे. ही कोविडच्या विषाणुसारखी गोष्ट असून तिचे निराकरण करावे लागेल. हरियाणाचे मुख्यमंत्री मनोहरलाल खट्टर, गीता मनीषी स्वामी ज्ञानानंद आणि राज्यसभा सदस्य सुधांशु त्रिवेदी उपस्थित होते.

उपराष्ट्रपती म्हणाले की गीतेचे ज्ञान हा भारतीय सभ्यता आणि संस्कृतीचा आधार आहे. वर्तमान काळात निष्पक्षता, पारदर्शकता, समानता, सर्वंकष बंधुभावाच्या प्रति कटीबध्दता भारताचा आत्मा असून आज आपण विविध क्षेत्रांत वेगाने प्रगती करत आहोत. आपण एक जागतिक शक्ती असून आपण शांततेचा पुरस्कार करतो. आपल्याला वैश्‍विक स्थिरता हवी आहे. २०४७ मध्ये आपण जेंव्हा आपल्या स्वातंत्र्याचा शताब्दी महोत्सव साजरा करू तेंव्हा भारताला शिखरावर नेलेले आपल्याला पाहायचे आहे.

रशिया- युक्रेन, इस्त्रायल- हमास संघर्षाचा उल्लेख करून उपराष्ट्रपती म्हणाले, दुसऱ्या महायुध्दानंतर जगाने एवढ्या वेदना कधी अनुभवल्या नाहीत. आपण आज एका ज्वालामुखीवर बसलो आहोत. अशा काळात गीतेचे सार आजही जगाच्या दृष्टीने पूर्वी कधी नव्हते एवढे महत्वाचे आहे. जगासमोर जेंव्हा दोन महत्वाचे प्रश्‍न होते तेंव्हा पंतप्रधान नरेंद्र मोदी म्हणाले होते की, चर्चा आणि मुत्सद्देगिरीच्या माध्यमातून युध्द टाळण्याचे शक्य ते सगळे प्रयत्न केले गेले पाहिजेत. त्यांनी गीतेतूनच हा बोध घेतला होता.

महाभारताचा संदर्भ देत धनखड म्हणाले की युध्द टाळण्यासाठी तेंव्हाही भगवान श्रीकृष्णांनी शक्य ते सगळे प्रयत्न केलेत. मात्र युध्द जेंव्हा अपरिहार्य असल्याचे त्यांना वाटले तेंव्हा त्यांनी अर्जुनाला ज्ञान दिले. त्यावरही आपण आज विचार करण्याची आवश्‍यकता आहे. कर्तव्याचा मार्ग सोडू नकोस असे श्रीकृष्णाने अर्जुनाला सांगितले होते. पंतप्रधान तेच करत आहेत.