Kamal Haasan : दाक्षिणात्य चित्रपटसृष्टीतील ज्येष्ठ अभिनेते कमल हसन हे त्यांच्या आगामी ‘ठग लाइफ’ या चित्रपटामुळे चर्चेत आहेत. या चित्रपटाचे जोरदार प्रमोशन करण्यात येत आहे. चित्रपटाच्या एका इव्हेन्टमध्ये कमल हसन यांनी केलेल्या विधानामुळे त्यांच्यावर जोरदार टीका करण्यात येत आहे. तसेच ठग लाइफ या चित्रपटावर बंदी घालण्यात यावी, अशी देखील मागणी जोर धरू लागली आहे.

‘कन्नड भाषेचा जन्म तमीळ भाषेतूनच झाला’ असे वादग्रस्त विधान कमल हसन यांनी केल्याने त्यांच्यावर टीका केली जात आहे. हे विधान त्यांनी ठग लाइफ या चित्रपटाच्या प्रमोशन दरम्यान चैन्नई येथील एका कार्यक्रमात केले आहे. त्यांनी केलेल्या विधानावरून त्यांनी माघार घेऊन माफी मागवी अन्यथा चित्रपटावर बंदी घालण्याचा विचार केला जाईल, असा थेट इशारा कन्नड संघटनांनी दिला आहे. यावर माझ्या विधानाचा विपर्यास केल्याचे कमल हसन यांनी स्पष्टीकरण दिले आहे.

नेमकं काय म्हणाले कमल हसन?

कमल हसन हे त्यांच्या आगामी ठग लाइफ या चित्रपटामुळे चर्चेत आहेत. या चित्रपटाचा म्युझिक लाँन्च सोहळ्याचे आयोजन चैन्नईत करण्यात आले होते. या कार्यक्रमात ते व्यासपीठावर उपस्थित असलेल्या कन्नड अभिनेता शिवराजकुमार याच्याकडे पाहून म्हणाले शिवराजकुमार म्हणजे दुसऱ्या राज्यात राहणारे माझे कुटुंबच आहे. तुमची भाषा तमीळमधूनच जन्माला आली आहे. त्यामुळे तुम्हीही याच गटात समाविष्ट होता. या विधानानंतर त्यांच्यावर टीका केली जात आहे.

कर्नाटकात निर्दर्शने 

कमल हसन यांनी केलेल्या विधानानंतर कर्नाटकातील विविध संघटनांनी त्यांच्या विधानाचा निषेध नोंदविला. तसेच त्यांच्या विरोधात बेळगाव येथे निर्दर्शने देखील करण्यात आली. त्यांच्या चित्रपटाचे पोस्टर फाडण्यात आली. कर्नाटकचे मुख्यमंत्री सिद्धरामय्या यांनी देखील हसन यांच्या विधानावर टीका केली आहे. कन्नड भाषेला अत्यंत प्राचीन आणि समद्ध इतिहास आहे. मात्र, हसन यापासून अनभिज्ञ आहेत, असे सिद्धरामय्या म्हणाले.