Vaishnavi Hagawane : वैष्णवी हगवणे आत्महत्या प्रकरणात पुणे पोलिसांनी पाच जणांना अटक केली असून, यामध्ये कर्नाटकातील माजी मंत्र्यांचा मुलगा प्रितम वीरकुमार पाटील याचाही समावेश आहे. यापूर्वी वैष्णवीचा पती, सासू, नणंद आणि फरार सासरे राजेंद्र हगवणे व दीर सुशील हगवणे यांना अटक झाली होती.

आता राजेंद्र आणि सुशील यांना १७ ते २२ मे दरम्यान पळून जाण्यासाठी आणि लपण्यास मदत करणाऱ्या पाच जणांना बावधन पोलिसांनी ताब्यात घेतले आहे. या सर्वांना आज (२७ मे) न्यायालयात हजर करण्यात आले.

अटक करण्यात आलेल्यांमध्ये मोहन भेगडे, मोहन बंडू फाटक, अमोल जाधव आणि राहुल जाधव आणि प्रितम वीरकुमार पाटील यांचा समावेश आहे. प्रितम हा कर्नाटकातील काँग्रेस नेते आणि माजी मंत्री वीरकुमार पाटील यांचा मुलगा आहे.

वैष्णवीच्या शवविच्छेदन अहवालातून धक्कादायक खुलासे झाले आहेत. तिच्या अंगावर मारहाणीचे २९ व्रण आढळले, त्यापैकी ५ ते ६ ताजे होते. सासरच्या जाचाला कंटाळून वैष्णवीने आत्महत्या केल्याचे पोलिसांनी नमूद केले.

तिचा सासरकडून सातत्याने छळ झाल्याची माहिती पोलिसांनी न्यायालयात सादर केली. या प्रकरणाने पुणे शहरात खळबळ उडाली असून, पोलिसांनी तपास तीव्र केला आहे.

दरम्यान, वैष्णवीच्या लग्नात नक्की किती खर्च आला? हेही समोर आलं आहे. लाखो रुपयांची उधळण लग्नात करण्यात आली. वैष्णवीच्या वडिलांना हगवणे कुटुंबियांनी लग्नाचा अवाढव्य खर्च करण्यास भाग पाडलं. हा खर्च नेमका किती होता? हे देखील पाहुयात…

वैष्णवीने पती शशांकसह प्रेमविवाह केला होता. त्यांच्या लग्नाचे बरेच व्हिडीओ मृत्यू प्रकरणानंतर समोर आले. व्हिडीओमध्येच लग्नासाठी किती खर्च केला असावा? याचा अंदाज येत आहे. लग्नासाठी रिसॉर्ट बूक करण्यात आलं होतं.

तसेच पाहुण्यांचा पाहुणचारही राजेशाही थाटातच झाला पाहिजे असा हगवणे कुटुंबियांचा अट्टाहास होता. त्याचप्रकारे कस्पटे कुटुंबियांकडून खर्च करवून घेण्यात आला. तब्बल दीड कोटी रुपये कस्पटे कुटुंबियांनी लग्नासाठी खर्च केले असल्याचे समोर आलं आहे.

‘वैष्णवी-शशांक’च्या लग्नासाठी महत्त्वाचे खर्च :

१) वैष्णवीचं जिथे लग्न झालं त्या रिसॉर्टचं भाडंच १० लाख रुपयांपेक्षा अधिक होतं. तिथेच पाहुण्यांना राहण्याची सोय करण्यात आली होती.

२) लग्नासाठी जो स्टेज बांधण्यात आला होता त्यासाठीच २२ लाख रुपये खर्च करण्यात आले होते.

३) पाच हजार पाहुण्यांना जेवणासाठी बोलावलं होतं. एक हजार रुपये जेवणाची एक प्लेट म्हणजे जेवणावरच ५२ लाख रुपयांचा खर्च झाला.

४) पाहुण्यांचा पाहुणचार, सत्कार आणि कपड्यांचाही खर्च लाखो रुपयांच्याच घरात होता.

५) लग्न कार्यक्रम नीट पार पडावा म्हणून व्यवस्था पाहण्यासाठी इव्हेंज मॅनेजमेंट कंपनीला सगळी जबाबदारी देण्यात आली.

लग्नाचा हा संपूर्ण खर्च कस्पटे कुटुंबियांनी केला असल्याचं समोर आलं आहे. त्याचबरोबरीन ५१ तोळे सोनं, फॉर्च्युनर गाडी तसेच इतर महागड्या वस्तूही देण्यात आल्या आहेत.