Vaibhav Taneja | Elon Musk : डोनाल्ड ट्रम्प यांच्याशी टक्कर घेतल्यानंतर जगातील सर्वात प्रसिद्ध अब्जाधीश आणि टेस्लाचे मालक एलोन मस्क यांनी त्यांचा नवीन राजकीय पक्ष ‘अमेरिका पार्टी’ जाहीर केला तेव्हा सर्वांच्या नजरा त्यांच्या पुढील पावलावर खिळल्या होत्या. आता मस्क यांनी या पक्षात भारतीय वंशाचे ‘वैभव तनेजा’ यांना एक महत्त्वाची जबाबदारी दिली आहे. ‘वैभव तनेजा’ हे टेस्ला कंपनीचे सीएफओ देखील आहेत.

मस्क यांच्या पक्षात कोषाध्यक्ष म्हणून वैभव यांची नियुक्ती ४ जुलै रोजी अमेरिकन संघीय निवडणूक आयोगाकडे (FEC) नोंदणीकृत झाली. ट्रम्प यांच्या ‘बिग ब्युटीफुल’ कायद्याच्या निषेधार्थ एलोन मस्क यांनी नवीन पक्षाची घोषणा केली आहे.

ट्रम्प सरकारचा हा नवीन कायदा केवळ श्रीमंतांचे खिसे भरेल, तर मध्यमवर्गीय आणि गरीब अमेरिकन लोकांचे नुकसान करेल असा मस्क यांचा आरोप आहे. मस्क यांनी नवीन पक्ष अमेरिकेतील मध्यमवर्गीय लोकांना समर्पित केला आहे.

वैभव तनेजा कोण आहे?
‘वैभव तनेजा’ सध्या टेस्लाचे मुख्य वित्तीय अधिकारी (सीएफओ) आहेत. ते २०१७ मध्ये टेस्लामध्ये रुजू झाले आणि २०२३ मध्ये ते सीएफओ झाले. याआधी ते कंपनीचे मुख्य लेखा अधिकारी होते. वैभव मूळचा भारतातील आहे.

त्याने दिल्ली विद्यापीठातून शिक्षण घेतले आहे आणि तो चार्टर्ड अकाउंटंट आहे. त्याने पीडब्ल्यूसी (प्राइसवॉटरहाऊसकूपर्स) मधून आपल्या कारकिर्दीची सुरुवात केली. त्यानंतर तो सोलरसिटी कंपनीत सामील झाला, जी नंतर टेस्लाने विकत घेतली.

वैभव तनेजा यांच्या वैशिष्ट्यपूर्ण बाबी :
टेस्ला सारख्या मोठ्या आणि गुंतागुंतीच्या कंपनीची आर्थिक जबाबदारी सांभाळणारे तनेजा हे फारच कमी भारतीयांपैकी एक आहेत.
एलोन मस्क यांच्यासोबत काम करणाऱ्या वरिष्ठ भारतीय अधिकाऱ्यांमध्ये त्यांचा समावेश होतो. ते वित्तीय धोरण, गुंतवणूक नियंत्रण, आणि जागतिक करार यात निपुण मानले जातात.

वैभव तनेजा यांची नवी जबाबदारी :
तनेजा पक्षाची आर्थिक पारदर्शकता, देणगी व्यवस्थापन आणि कायदेशीर अनुपालन यावर देखरेख करतील. पक्षाच्या प्रचार खर्च, निवडणूक देणग्या आणि एफईसी अहवालाची जबाबदारी त्यांच्याकडे असेल.

२०२६ च्या मध्यावधी निवडणुकीत मस्कचा प्रवेश :
या महिन्यात, एलोन मस्कने अमेरिका पार्टी नावाच्या एका नवीन राजकीय पक्षाची घोषणा केली. ट्रम्पच्या बिग ब्युटीफुल लॉला विरोध म्हणून मस्कने हा पक्ष स्थापन करण्यामागील कारण सांगितले आहे. हा पक्ष स्वतःला रिपब्लिकन आणि डेमोक्रॅट या दोन पारंपारिक पक्षांपेक्षा वेगळा असल्याचे वर्णन करतो.

पक्षाचे लक्ष अभिव्यक्ती स्वातंत्र्य, नवोपक्रमाला प्रोत्साहन आणि कमी सरकारी हस्तक्षेप यावर केंद्रित आहे. २०२६ च्या मध्यावधी निवडणुकीपूर्वी एलोन मस्कचे पाऊल अमेरिकन राजकारणात एक नवीन पर्याय म्हणून पाहिले जात आहे.

पक्ष का स्थापन केला?
त्यांच्या घोषणेत मस्क यांनी सध्याच्या राजकीय व्यवस्थेवर टीका केली आणि म्हणाले, ‘जेव्हा कचरा आणि भ्रष्टाचाराने आपला देश दिवाळखोरीत काढण्याचा विचार येतो तेव्हा आपण लोकशाहीत नव्हे तर एक-पक्षीय व्यवस्थेत राहत आहोत.’ असे म्हटले. त्यांनी असेही म्हटले की, “अमेरिका पार्टीची स्थापना तुमचे गमावलेले स्वातंत्र्य परत मिळवण्यासाठी करण्यात आली आहे.”

४ जुलै रोजी अमेरिकेच्या स्वातंत्र्यदिनाच्या समारंभात मस्क यांनी त्यांच्या सोशल मीडियावर एक पोल पोस्ट केला, ज्यामध्ये त्यांनी त्यांच्या अनुयायांना विचारले – ‘स्वातंत्र्य दिन हा तुम्हाला दोन-पक्षीय (काही लोक याला एक-पक्षीय म्हणतात) व्यवस्थेपासून स्वातंत्र्य हवे आहे का हे विचारण्यासाठी सर्वोत्तम वेळ आहे! आपण अमेरिका पार्टी स्थापन करावी का?’