V. D. Satheesan : मुख्य निवडणूक आयुक्त ज्ञानेश कुमार यांनी भारतीय लोकशाहीला मृत्यूदंड सुनावला आहे. त्यांनी आहे त्या पदावर राहू नये. एक प्रकारे त्यांनी भाजपचे एजंट म्हणून काम केले आहे, असा आरोप केरळमचे मुख्यमंत्री व्ही. डी. सतीशन (V. D. Satheesan) यांनी केला आहे. निवडणूक आयोगाच्या अन्य दोन सदस्यांनी ज्ञानेश कुमार यांच्याविरोधी मते नोंदवल्याचे प्रकरण ताजे असताना हा आरोप करण्यात आला आहे.

सतीशन (V. D. Satheesan) पुढे म्हणाले की, केरळचे माजी मुख्य सचिव जिजी थॉमसन यांनी मुख्य निवडणूक आयुक्तांबद्दल केलेले दावे अत्यंत गंभीर आहेत. थॉमसन यांनी दावा केला होता की, २०१६ मध्ये ते आयएएस अधिकारी म्हणून कार्यरत असताना ज्ञानेश कुमार यांनी त्यांना भाजपमध्ये सामील होण्यासाठी आग्रह केला होता.त्यामुळे ज्ञानेश कुमार यांनी भाजपचे एजंट म्हणून काम केले हे सिद्ध करण्यासाठी आणखी कोणत्याही पुराव्याची गरज नाही.

ज्ञानेश कुमार यांनी भाजपच्या वतीने लोकशाहीला कमकुवत करणारे किंवा तिला सुरुंग लावणारा घटक म्हणून काम केले आहे. निवडणूक आयोगाची विश्वासार्हता भाजपच्या पदरात टाकणाऱ्या कुमार यांची नोंद इतिहास अशी व्यक्ती म्हणून करेल जिने भारतीय लोकशाहीला मृत्यूदंड सुनावला. त्यांनी पुढे सांगितले की, राज्यघटनेने निवडणूक प्रक्रियेची शुद्धता आणि पावित्र्य यांवर भर दिला आहे.

ज्ञानेश कुमार यांनी गुन्हेगारी वृत्ती बाळगली असून पूर्णपणे स्वतंत्रपणे काम करणे अपेक्षित असलेल्या निवडणूक आयोगाला राष्ट्रीय स्वयंसेवक संघ परिवाराच्या दावणीला बांधले आहे. त्यांचे या पदावर कायम राहणे भारतीय लोकशाहीसाठी अत्यंत धोकादायक आहे. त्यांनी निवडणूक आयोगाची पारदर्शकता, सचोटी, निष्पक्षता आणि उच्च लोकशाहीवादी भावना नष्ट केली आहे.
– व्ही. डी. सतीशन, केरळमचे मुख्यमंत्री