मुंबई : शिवसेना (UBT) नेते आणि खासदार संजय राऊत यांनी एकनाथ शिंदे गटावर गंभीर आणि सनसनाटी आरोप केला आहे. शिंदे गटाचे नेते आणि मंत्री भरत गोगावले यांच्या घरी अघोरी पूजा झाल्याचा दावा करणारा व्हिडिओ सोशल मीडियावर व्हायरल झाल्यानंतर राऊत यांनी शिंदे गटावर हल्ला चढवला.

राऊत यांनी दावा केला की, शिंदे गटातील काही नेते अघोरी विद्या आणि अंधश्रद्धेच्या माध्यमातून मुख्यमंत्री देवेंद्र फडणवीस यांना ‘एलिमिनेट’ करून स्वतःच्या नेत्याला मुख्यमंत्रीपदावर बसवण्याचा कट रचत आहेत. या आरोपांनी महाराष्ट्राच्या राजकारणात खळबळ उडाली आहे.

व्हायरल व्हिडिओमुळे वादाला तोंड

सध्या सोशल मीडियावर व्हायरल होत असलेल्या व्हिडिओत शिंदे गटाचे नेते आणि मंत्री भरत गोगावले यांनी त्यांच्या घरी अघोरी पूजा केल्याचा दावा केला जात आहे. हा व्हिडिओ महायुतीतील सहकारी पक्ष असलेल्या राष्ट्रवादी काँग्रेस (अजित पवार गट) चे प्रवक्ते सूरज चव्हाण यांनी त्यांच्या सोशल मीडिया अकाउंटवर शेअर केला आहे.

यापूर्वी ठाकरे गटाचे नेते वसंत मोरे यांनीही असाच एक व्हिडिओ शेअर करत शिंदे गटावर निशाणा साधला होता. या व्हिडिओच्या पार्श्वभूमीवर संजय राऊत यांनी शिंदे गटावर अंधश्रद्धा आणि अघोरी विद्येचा वापर केल्याचा गंभीर आरोप लावला आहे.

राऊतांचा शिंदे गटावर हल्ला

संजय राऊत यांनी पत्रकार परिषदेत बोलताना सांगितलं, “शिंदे गटातील एक पंथ आहे, जो अघोरी विद्येतून निर्माण झाला आहे. अघोरींचा गट हा धर्म, समाज आणि राजकारणात सर्वत्र आहे. त्यांच्याकडे गांभीर्याने पाहण्याची गरज नाही, कारण ते दिवस-रात्र अघोरी विद्येत रमलेले असतात.

दुसऱ्याचं आणि राज्याचं नुकसान कसं होईल, याचाच ते विचार करतात.” राऊत यांनी पुढे म्हटलं की, “महाराष्ट्राने अंधश्रद्धेविरुद्ध आणि धर्मांधतेविरुद्ध कायम लढा दिला आहे. पण आता अशी कृत्यं समोर येत आहेत, जी शाहू-फुले-आंबेडकर आणि प्रबोधनकार ठाकरे यांच्या पुरोगामी महाराष्ट्राला काळीमा फासणारी आहेत.”

मुख्यमंत्र्यांना ‘एलिमिनेट’चा कट?

राऊत यांनी आपल्या आरोपांना आणखी धार देताना म्हटलं, “शिंदे गटातील अघोरी विद्या ही महाराष्ट्राच्या मुख्यमंत्र्यांना ‘एलिमिनेट’ करण्यासाठी वापरली जात आहे. हा शब्द मी मुद्दाम वापरतोय, कारण इराण-इज्राईल युद्धातही ‘एलिमिनेट’ हा शब्द वापरला गेला आहे.

शिंदे गटाला आपला नेता मुख्यमंत्रीपदी बसवायचा आहे, आणि त्यासाठी ते अशा अंधश्रद्धेच्या मार्गाचा अवलंब करत आहेत.” राऊत यांनी थेट फडणवीसांनाही सावध राहण्याचा इशारा देत म्हटलं, “देवेंद्र फडणवीस यांनी मंत्रिमंडळ बैठकीआधी आपली खुर्ची तपासावी. त्यांच्या कॅबिनेटमध्ये कोणत्या प्रकारचे लोक आहेत, हे त्यांनी पाहावं.”

मंत्रिमंडळाच्या मानसिकतेवर प्रश्नचिन्ह

राऊत यांनी शिंदे गटातील मंत्र्यांच्या मानसिकतेवरही प्रश्न उपस्थित केले. “या राज्याचं मंत्रिमंडळ कोणत्या मानसिकतेत आहे? जनतेच्या कल्याणाशी यांना काही देणं-घेणं नाही. लोकशाही आणि विचार यांच्याशी यांचा संबंध नाही. मुख्यमंत्रीपदावर बसलेल्या व्यक्तीला ‘एलिमिनेट’ करण्याचा विचार करणारे हे लोक आहेत. अशा लोकांच्या हातात महाराष्ट्राचं राजकारण आहे, हे पुरोगामी महाराष्ट्राचं दुर्दैव आहे,” असं राऊत म्हणाले.

पुरोगामी महाराष्ट्राला डाग?

राऊत यांनी या घटनेचा थेट संबंध महाराष्ट्राच्या पुरोगामी परंपरेशी जोडत टीका केली. “महाराष्ट्राने अंधश्रद्धेविरुद्ध कायम लढा दिला आहे. पण अशा घटना समोर येतात तेव्हा आपल्या पुरोगामीपणाला डाग लागतो. देवेंद्र फडणवीस यांनी आपल्या मंत्र्यांची तपासणी करावी. अघोरी विद्येत रमलेले हे लोक महाराष्ट्राचं भलं करू शकत नाहीत,” असं राऊत म्हणाले. त्यांनी फडणवीस यांना मंत्र्यांचे पर्सनल असिस्टंट (PA) तपासण्याबरोबरच मंत्र्यांचीही तपासणी करण्याचा सल्ला दिला.

राजकीय वर्तुळात खळबळ

राऊत यांच्या या आरोपांनी महाराष्ट्राच्या राजकारणात खळबळ उडाली आहे. ठाकरे गट आणि शिंदे गट यांच्यातील वैर यापूर्वीही अनेकदा समोर आलं आहे. मात्र, ‘अघोरी विद्या’ आणि ‘एलिमिनेट’सारख्या शब्दांचा वापर करत राऊतांनी या वादाला नवं वळण दिलं आहे. सोशल मीडियावरही या व्हिडिओ आणि राऊतांच्या आरोपांवरून जोरदार चर्चा सुरू आहे. काहींनी राऊतांच्या या वक्तव्याला ‘खळबळजनक’ ठरवलं, तर काहींनी याला ‘राजकीय स्टंट’ म्हणून हिणवलं.