US Flights :  अमेरिकेची हवाई वाहतूक अचानक बंद करण्यात आली आहे. देशभरातील क्षेत्रीय एअर ट्रॅफिक कंट्रोल केंद्रांमध्ये संवादाशी संबंधित गंभीर तांत्रिक बिघाड झाल्याने फेडरल एव्हिएशन एडमिनिस्ट्रेशनने अमेरिकेतील सर्व विमानांच्या उड्डाणांवर तात्काळ बंदी घालत देशव्यापी ‘ग्राउंड स्टॉप’ लागू केला आहे.

या निर्णयामुळे हजारो प्रवासी अडकून पडले आहेत. तसेच या व्यत्ययामुळे अमेरिकेतील १३,००० विमान उड्डाणांवर परिणाम झाला.

एफएएने जारी केलेल्या अधिकृत निवेदनानुसार, असामान्य परिस्थिती आणि प्रवाशांच्या सुरक्षिततेचा विचार करून हा निर्णय घेण्यात आला आहे. या आदेशानंतर केवळ आकाशात असलेल्या विमानांना सुरक्षित लँडिंगची परवानगी देण्यात आली, तर जमिनीवरील सर्व उड्डाणे थांबवण्यात आली आहे.

अमेरिकेचे परिवहन सचिव सीन डफी यांनी सांगितले की, या तांत्रिक समस्येचा फटका देशभरातील २२ क्षेत्रीय एअर ट्रॅफिक कंट्रोल केंद्रांना बसला आहे. ही केंद्रे विविध विमानतळांदरम्यान उड्डाण करणाऱ्या विमानांना दिशादर्शन करत असतात.

दरम्यान, अमेरिकेने देशभरातील विमान उड्डाणांमधील व्यत्ययामागे सायबर हल्ला किंवा एआय असण्याची शक्यता फेटाळून लावली आहे. राष्ट्राध्यक्ष डोनाल्ड ट्रम्प यांनी शुक्रवारी याला दुजोरा दिला.

नेमका बिघाड कशामुळे झाला?
मिळालेल्या माहितीनुसार, एअर ट्रॅफिक कंट्रोल केंद्रांना एकमेकांशी जोडणारे टेलिकम्युनिकेशन नेटवर्क चालवणाऱ्या ‘L3Harris’ या कंपनीच्या सिस्टिममध्ये एक तांत्रिक अपडेट करण्यात आले होते.

मात्र, हे अपडेट अयशस्वी ठरल्याने एफएएची संपूर्ण टेलिकम्युनिकेशन प्रणाली रिबूट झाली आणि पुन्हा सुरू होताच ती क्रॅश झाली.  या घटनेमुळे देशभरातील ४,००० हून अधिक उड्डाणे रद्द करावी लागली तर १०,००० हून अधिक विमानांना उशीर झाला. US Flights

दरम्यान, या तांत्रिक बिघाडामध्ये ४ तासांहून अधिक काळ थांबलेली अमेरिकेतील हवाई वाहतूक हळूहळू पूर्वपदावर येत असल्याची माहिती समोर आली आहे.

हेही वाचा: 

Methi Laccha Paratha: थंडीत नाश्त्यासाठी बनवा कुरकुरीत मेथी लच्छा पराठा; दही आणि चटणीसोबत लागेल भन्नाट!