Ujjian Shahi Masjid Clash:  मध्य प्रदेशातील उज्जैन येथील अब्दालपुरा भागात ६०० वर्ष जुन्या शाही मशिदीचा एक भाग हटवण्याच्या कारवाईवरून तणाव निर्माण झाला आहे. मागील दोन दिवसांपासून शाही मशिदीचा काही भाग पाडला जाणार असल्याची बातमी पसरताच स्थानिक नागरिक आणि मुस्लिम समाजातील लोक मोठ्या संख्येने मशिदीबाहेर जमून निदर्शने करत होते.

रविवारी रात्री प्रचंड पोलीस बंदोबस्तासह जेसीबी आणि पोकलँड मशीन्स घटनास्थळी दाखल झाले. त्यानंतर जमाव रस्त्यावर उतरला आणि त्यांनी पोलीस प्रशासनाविरोधात जोरदार घोषणाबाजी सुरू केली.

अश्रूधुराच्या नळकांड्या फोडल्या

तर आज सोमवारी मुस्लिम समुदायातच यावरून वाद निर्माण झाला आहे. एका गटाने मशिदीचा भाग पाडण्यास सहमती दर्शवली आहे. मात्र दुसऱ्या गटाने या कारवाईचा निषेध नोंदवत आंदोलन सुरू केलं आहे. एवढंच नाही तर जे पोलीस या ठिकाणी आले त्यांच्यावर दगडफेकही केली. ज्यानंतर पोलिसांनी वातावरण नियंत्रणात आणण्यासाठी अश्रूधुराच्या नळकांड्या फोडल्या आहेत. सध्या परिस्थिती नियंत्रणात असून पाडकाम सुरू झाल्याचे वृत्त आहे.

परिस्थितीचे गांभीर्य लक्षात घेऊन प्रशासनाने घटनास्थळी तब्बल २००० पोलिसांचा ताफा तैनात केला आहे. सुरक्षेचा उपाय म्हणून मशिदीच्या ५०० मीटरचा परिसर बॅरिकेडिंग लावून बंद करण्यात आला आहे. या आंदोलनात महिलांचाही मोठा सहभाग दिसून आला. पोलीस आणि प्रशासकीय अधिकाऱ्यांनी मध्यस्थी करत जमावाला शांत केले होते. Ujjian Shahi Masjid Clash

रात्रभर चाललेल्या तणावानंतर सोमवारी सकाळी समाजातील लोक स्वतःहून पुढे येऊन परस्पर सहमतीने मशिदीचा विवादित भाग हटवतील असे म्हटले जात होते. मात्र, सोमवारी सकाळी तणाव वाढल्याचे दिसून आले. या दरम्यान संतप्त जमावाने पोलिसांवर तुफान दगडफेक केली, त्यादरम्यान पोलिसांनी जमावाला पांगवण्यासाठी अश्रूधुराच्या नळकांड्या फोडल्या.

रुंदीकरणाच्या टप्प्यात ७ धार्मिक स्थळे

दरम्यान, उज्जैनमध्ये २०२८ ला महाकुंभमेळा होणार आहे. यासाठी जी तयारी चालली आहे त्या अनुषंगाने शहरात विकासकामं होत आहेत. आगामी सिंहस्थ कुंभमेळ्याच्या पार्श्वभूमीवर कंठाल चौकापासून ते गोपाळ मंदिरापर्यंतचा सुमारे ९०० मीटर लांबीचा रस्ता १५ मीटर रुंद केला जात आहे. या रुंदीकरणाच्या टप्प्यात एकूण ७ धार्मिक स्थळे येत होती.

त्यापैकी बहुतांश स्थळे प्रशासनाने परस्पर सहमतीने हटवली आहेत. मात्र, खडे हनुमान मंदिर ते गोपाळ मंदिर दरम्यान असलेली एक मजार, खडे हनुमान मंदिर आणि शाही मशीद या ३ धार्मिक स्थळांबाबत सध्या अत्यंत संवेदनशील परिस्थिती निर्माण झाली आहे. Ujjian Shahi Masjid Clash

हेही वाचा: 

Ramdas Athawale : ‘ज्ञानेश कुमार यांनी कोणाच्याही दबावाखाली राजीनामा देऊ नये’; रामदास आठवलेंचे विधान