पिंपरी – शहरात उच्च न्यायालयाच्या नियमांची पायमल्ली करत आणि नागरिकांच्या आरोग्याशी खेळत बेकायदेशीरपणे कानठळ्या बसवणारे डीजे आणि डॉल्बी सिस्टीम वाजवणाऱ्या गणेश मंडळांसह डीजे मालकांवर पिंपरी-चिंचवड पोलिसांनी कारवाईचा जबदस्त बडगा उचलला आहे.

गणेशोत्सवाच्या काळात आगमन दिनापासून म्हणजेच १४ सप्टेंबर ते २६ सप्टेंबर दरम्यान पोलिसांनी अवघ्या काही दिवसांत तब्बल ९१ गुन्हे दाखल केले असून, ८६ प्रकरणांमध्ये लाखोंचे डीजे साहित्य आणि यंत्रसामग्री थेट जप्त केली आहे. पोलिसांच्या या धडक व आक्रमक मोहिमेमुळे नियम धाब्यावर बसवणाऱ्या गणेश मंडळांचे कार्यकर्ते आणि मुजोर डीजे चालकांचे धाबे चांगलेच दणाणले आहेत.

दहीहंडीतही १६ मंडळांवर कारवाई
सण-उत्सवाच्या नावाखाली सर्वोच्च व उच्च न्यायालयाच्या ध्वनिमर्यादेच्या आदेशांचे उल्लंघन करणाऱ्यांची आता खैर नाही, असा सज्जड दमच पोलीस प्रशासनाने दिला आहे. गणेशोत्सवापूर्वी पार पडलेल्या दहीहंडी उत्सवातही नियमांचे उल्लंघन करून बेधडक डीजे वाजवणाऱ्या १६ दहीहंडी मंडळांवर पोलिसांनी धडक गुन्हे दाखल केले होते. वारंवार सूचना आणि नोटिसा देऊनही नियमांकडे दुर्लक्ष करणाऱ्यांना पोलिसांनी थेट दणका देण्यास सुरुवात केली आहे.

आवाजाची पातळी मोजून थेट गुन्हे
नागरिक, ज्येष्ठ नागरिक, रुग्ण आणि लहान बालकांच्या आरोग्याला गंभीर धोका निर्माण करणाऱ्या अशा आवाजी दणदणाटाविरुद्ध पोलिसांनी विशेष मोहीम हाती घेतली आहे. शहरातील संवेदनशील भाग, चौक आणि मिरवणूक मार्गांवर ध्वनीप्रदूषणाची पातळी मोजून पोलिसांनी थेट गुन्हे नोंदवत साहित्य जप्तीची कडक कारवाई केली.

कारवाईची टांगती तलवार कायम
शहरात कायदा व सुव्यवस्था अबाधित ठेवण्यासाठी आणि नागरिकांना शांततापूर्ण वातावरण देण्यासाठी ही कारवाई यापुढेही अशीच सुरू राहणार असल्याचा स्पष्ट इशारा पिंपरी-चिंचवड पोलिसांनी दिला आहे.

आगामी काळात येणाऱ्या विविध महापुरुषांच्या जयंत्या, सण-उत्सव, मिरवणुका किंवा कोणत्याही सार्वजनिक कार्यक्रमांमध्ये अशा प्रकारे मर्यादेबाहेर डीजेचा दणदणाट अजिबात खपवून घेतला जाणार नाही. त्यामुळे कोणीही डीजे आणि डॉल्बी सिस्टीमचा वापर करू नये, अन्यथा थेट फौजदारी गुन्हे आणि साहित्य जप्तीला सामोरे जावे लागेल, असा सक्त इशारा पोलिसांनी दिला आहे.

सिलिंडरवरही बंदी घाला
ढोलताशा पथकाचा आवाज ऐकताना आनंदच वाटतो. मात्र त्‍यासाठी काही पथकांसोबत कानठाळ्या बसविणारा सिलिंडरचा आवाज त्रासदायक ठरतो. चिंचवडमध्‍ये काही ढोलताशा पथकांकडून एका पथकासोबत तीन सिलिंडर आणि लोखंडी हातोडीने सहाजण त्‍यावर जोरजोरात ठोके घालत होते. काही पथकांकडून होणारा हा प्रकार पोलिसांनी थांबविला. मात्र त्‍यावर बंदीच घाला, अशी मागणी गणेशभक्‍तांकडून केली जात आहे.

आकडे बोलतात…
कार्यक्षेत्र ध्‍वनीप्रदुषण    दाखल गुन्‍ह्यांची संख्‍या     जप्‍त मुद्‌देमाल
परिमंडळ एक                    २९                                     २८
परिमंडळ दोन                   ४४                                     ४४
परिमंडळ तीन                   ०८                                     ०८
परिमंडळ चार                   १०                                      ०६

हेही वाचा: 

Lalita Tarakh : तुम्ही कसे उपोषण केले, हे वेळ आल्यावर सांगेन! जरांगेंना थेट इशारा; ‘या’ गंभीर आरोपामुळे खळबळ