केळवडे: पुणे-सातारा महामार्गावर केळवडे हद्दीत शिवापूर टोलनाक्याच्या दिशेने भरधाव जात असलेला क्रेशेन्डने भरलेला डंपर मागून आलेल्या मालवाहू ट्रकने जोरदार धडक दिल्याने जागेवर पलटी झाला. धडक इतकी तीव्र होती की डंपरचा डावीकडील टायर फुटून वाहन उलटले. सुदैवाने या दुर्घेटनेत कोणतीही जीवितहानी झालेली नाही, मात्र क्रेशेन्ड रस्त्यावर सांडल्यामुळे वाहतूक काही काळ विस्कळीत झाली होती. या अपघातानंतर स्थानिक नागरिकांत संतापाची लाट उसळली आहे. परिसरातील हॉटेल्ससमोरच्या सर्विस रोडवर असलेले डिव्हायडर्स बेकायदेशीररित्या फोडून काही ठिकाणी थेट महामार्गावर प्रवेश मिळवणारे रस्ते तयार करण्यात आले आहेत. त्यामुळे हॉटेलमधून बाहेर पडणाऱ्या वाहनांना थेट महामार्गावर उतरण्याची संधी मिळते आणि मागून येणाऱ्या वेगात असलेल्या वाहनांना ब्रेक लावण्याची संधी न मिळाल्याने अनेकदा अपघात होत आहेत. स्थानिकांचा गंभीर आरोप बेकायदेशीरपणे फोडलेले डिव्हायडर्स तात्काळ बंद करावेत,हॉटेलसमोरून थेट महामार्गावर जाणारे अप्रमाणित रस्ते हटवावेत, महामार्गावरील फ्लेक्स, होर्डिंग्ज काढून टाकावेत आणि टोल प्रशासन तसेच संबंधित अधिकाऱ्यांवर कठोर कारवाई करावी. “टोल प्रशासन वेळेत पावले उचलत नाही, परिणामी नागरिकांचे प्राण धोक्यात येत आहेत,” असा गंभीर आरोप स्थानिकांनी प्रभात प्रतिनिधींशी बोलताना केला.
