Abhijit Dipke : देशभरात चर्चेत असलेल्या नीट परीक्षा पेपरफुटी प्रकरणावरून विद्यार्थ्यांमध्ये संतापाची लाट उसळली असून, कॉकरोच जनता पार्टीने (CJP)  केंद्र सरकारविरोधात आक्रमक भूमिका घेतली आहे. केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीसाठी पक्षाने देशव्यापी आंदोलनाची हाक दिली आहे.

कॉकरोच जनता पार्टीचे संस्थापक अभिजित दीपके  (Abhijit Dipke)यांच्या नेतृत्वाखाली 6 जून रोजी दिल्लीतील जंतर-मंतर येथे मोठे आंदोलन करण्यात आले होते. या आंदोलनाला विद्यार्थ्यांचा उत्स्फूर्त प्रतिसाद मिळाल्याचा दावा पक्षाकडून करण्यात आला आहे. आता या आंदोलनाचा पुढचा टप्पा म्हणून पुण्यातही निदर्शने करण्यात येत आहेत.

पुण्यात आयोजित पत्रकार परिषदेत अभिजित दीपके यांनी एक मोठं वक्तव्य केले आहे. 20 जून रोजी दिल्लीत आणखी मोठे आंदोलन छेडण्याची घोषणा त्यांनी केली. ते म्हणाले “आम्ही सध्या पुण्यात आंदोलन करत आहोत. आमच्यासोबत पुणे विद्यापीठाचे विद्यार्थी आहेत, एमपीएससी, यूपीएससीची तयारी करणारे विद्यार्थी आहेत. तर 20 तारखेला सगळ्यांनी दिल्लीला जायचं अन् धर्मेंद्र प्रधान यांच्या राजीनाम्याशिवाय मागे हटायचं नाही.”   (Abhijit Dipke)

हेही वाचा : Aam Papad: एकदा खाल तर बाजारातील आमपापड विसरून जाल! घरच्या घरी बनवा ही भन्नाट रेसिपी

पुण्यातील आंदोलनाविषयी बोलताना दिपके म्हणाले की, सावित्रीबाई फुले पुणे विद्यापीठाचे विद्यार्थी, तसेच एमपीएससी आणि यूपीएससीची तयारी करणारे अनेक विद्यार्थी सहभागी होत आहेत. याशिवाय सामाजिक कार्यकर्ते विश्वंभर चौधरी आणि अॅड. असीम सरोदे यांनीही आंदोलनाला पाठिंबा दिला आहे.

यावेळी पक्षाकडून शिक्षणविषयक जाहीरनामाही प्रसिद्ध करण्यात येणार असल्याची माहिती त्यांनी दिली. तसेच, पर्यावरणवादी कार्यकर्ते सोनम वांगचुक हे देखील आंदोलनात सहभागी होणार असल्याचे अभिजीत दिपकेंनी सांगितले.

पुण्यानंतर नागपुरात आंदोलन   (Abhijit Dipke)

पुणे हे शिक्षणाचे माहेरघर असल्याचे सांगत दीपके यांनी पुढील आंदोलन नागपुरातही होणार असल्याचे स्पष्ट केले. “आम्ही सरकारशी चर्चेसाठी तयार आहोत, मात्र आमची सोशल मीडिया खाती बंद करण्याचा प्रयत्न केला जात आहे. ही लोकशाही पद्धत नाही,” असा आरोपही त्यांनी केला.

“हे आंदोलन कोणत्याही राजकीय पक्षाविरोधात नसून विद्यार्थ्यांच्या भविष्यासाठी आहे. NEET पेपरफुटी प्रकरणात न्याय मिळवून देण्यासाठी आम्ही लढत आहोत,” असे सांगत 20 जूनच्या दिल्ली आंदोलनासाठी देशभरातील विद्यार्थ्यांना सहभागी होण्याचे आवाहन त्यांनी केले.

हेही वाचा : Excise Duty: आनंदाची बातमी! पेट्रोलवरील उत्पादन शुल्क रद्द ; आता तुम्हाला प्रति लिटर किती होणार फायदा?