UNGA 2025: अमेरिकेचे राष्ट्राध्यक्ष डोनाल्ड ट्रम्प यांनी संयुक्त राष्ट्र महासभेच्या (UNGA) 80व्या सत्रात भारत आणि चीनवर रशिया-युक्रेन युद्धाला निधी पुरवल्याचा गंभीर आरोप केला. या दोन्ही देशांनी रशियन तेल खरेदी करून युद्धाला प्रत्यक्ष-अप्रत्यक्षपणे बळ दिल्याचा दावा त्यांनी केला. याशिवाय, त्यांनी नाटो देशांनाही रशियाकडून तेल आणि ऊर्जा उत्पादनांची खरेदी तातडीने थांबवण्याची मागणी केली. ट्रम्प म्हणाले, “भारत आणि चीन रशियन तेल खरेदी करून युद्धाला निधी पुरवत आहेत. विशेष म्हणजे, नाटो देशांनीही रशियन ऊर्जा आणि उत्पादनांची खरेदी फारशी थांबवलेली नाही. मला दोन आठवड्यांपूर्वी याची माहिती मिळाली आणि मी खूश नव्हतो. विचार करा, ते स्वतःच्याच विरोधात युद्धाला निधी देत आहेत.” त्यांनी पुढे सांगितले, “ही नाटो देशांसाठी लज्जास्पद बाब आहे. जेव्हा मला याची माहिती मिळाली, तेव्हा त्यांच्यासाठी ही खूपच लाजिरवाणी गोष्ट होती. युरोपीय देशांनी तातडीने रशियाकडून सर्व ऊर्जा खरेदी बंद करावी, अन्यथा आपण सर्व वेळ वाया घालवत आहोत.” युक्रेन युद्धाबाबत निराशा – युक्रेन युद्ध अजूनही सुरू असल्याबद्दल ट्रम्प यांनी निराशा व्यक्त केली. त्यांनी सांगितले की, सुरुवातीला त्यांना वाटले होते की हे युद्ध “सर्वात सोपे” असेल. निवडणूक प्रचारादरम्यान त्यांनी एका दिवसात युद्ध संपवण्याचा दावा केला होता. ते म्हणाले, “सर्वांना वाटले होते की रशिया तीन दिवसांत हे युद्ध जिंकेल, पण तसे झाले नाही. ही एक छोटीशी चकमक मानली जात होती. रशियासाठी हे चांगले दिसत नाही.” त्यांनी पुढे नमूद केले की, रशियाचा प्रारंभिक हल्ला “काही दिवसांत, निश्चितपणे एका आठवड्यापेक्षा कमी वेळात पूर्ण व्हायला हवा होता, पण ते साडेतीन वर्षांपासून लढत आहेत.” संयुक्त राष्ट्रांवर टीका – ट्रम्प यांनी संयुक्त राष्ट्रांवर (UN) टीकास्त्र सोडताना सांगितले की, गेल्या सात महिन्यांत त्यांनी संयुक्त राष्ट्रांच्या मदतीशिवाय “सात अंतहीन युद्धे” संपवली. ते म्हणाले, “मला संयुक्त राष्ट्रांच्या जागी युद्धे संपवावी लागली. संयुक्त राष्ट्रांमध्ये खूप संभावना आहे, पण ते त्यांच्या क्षमतेच्या जवळपासही पोहोचले नाहीत. ते फक्त कठोर पत्र लिहितात आणि त्या शब्दांवर कोणतीही कारवाई करत नाहीत.” नाटो देशांना इशारा ट्रम्प यांनी नाटो देशांना रशियाकडून ऊर्जा खरेदी बंद करण्याचा इशारा देताना सांगितले की, असे न केल्यास युद्धाला थांबवण्याचे प्रयत्न व्यर्थ ठरतील. त्यांच्या या वक्तव्याने आंतरराष्ट्रीय राजकारणात नव्या चर्चेला तोंड फोडले आहे. भारत आणि चीन यांनी या आरोपांवर अद्याप कोणतीही अधिकृत प्रतिक्रिया दिलेली नाही. सात युद्धे संपवली- महासभेला संबोधित करताना ट्रम्प म्हणाले, “मी सात युद्धे संपवली. कोणत्याही पंतप्रधान, राष्ट्राध्यक्ष किंवा देशाने असा पराक्रम केलेला नाही किंवा त्याच्या जवळपासही पोहोचलेला नाही. मी हे अवघ्या सात महिन्यांत साध्य केले. यापूर्वी असा प्रयत्न कधीच झाला नव्हता आणि मला याचा अभिमान आहे.” यापूर्वीही ट्रम्प यांनी अनेकदा युद्धविरामाचे श्रेय घेतले आहे. मात्र, भारताने स्पष्ट शब्दांत सांगितले आहे की, भारत-पाकिस्तान यांच्यातील युद्धविराम हा दोन्ही देशांमधील थेट चर्चेनंतर झाला असून यात कोणत्याही तृतीय पक्षाची भूमिका नव्हती.
