Uddhav Thackeray : उद्धव बाळासाहेब ठाकरे पक्षाचे पक्षप्रमुख उद्धव ठाकरे यांच्यावर 2012 मध्ये मानेच्या दुखण्यावरील उपचारांसाठी शस्त्रक्रिया करण्यात आली होती. त्यानंतर आता पुन्हा एकदा त्यांच्यावर अँजिओप्लास्टी करण्यात आली आहे. एका आठवड्यापूर्वीच त्यांना रुग्णालयातून घरी सोडण्यात आलं आहे.

मात्र, सध्या विधानसभा निवडणूक तोंडावर असल्याने उद्धव ठाकरे पुन्हा एकदा अॅक्शन मोडवर आले आहेत. उद्धव ठाकरे यांनी आजारपणातून बाहेर पडत पुन्हा पक्षासोबत जोमाने काम करण्यास सुरुवात केली आहे.

आज दीपक साळुंखे यांच्या पक्षप्रवेशावेळी माध्यमांसमोर आले. यावेळी त्यांनी कार्यकर्त्यांना मार्गदर्शन केलं. यावेळी बोलताना ठाकरे म्हणाले की, “दसऱ्यानंतर आज पहिल्यांदा मी तुमच्यामध्ये आलेलो आहे. मधल्या काळात हॉस्पिटलची एक वारी करावी लागली.

डॉक्टर म्हणाले आराम करा. पण आता आराम करायचा तरी किती? आधी हरामांना घालवायचं आहे. त्यामुळे आता आराम नाही. पण आज कामाला सुरुवात केली. मुहूर्त चांगला लाभला आहे.

आबासाहेब मजबूत गडी ते शिवसेना परिवारात सामील झाले आहेत. आबा तुमच्या हातात मशाल दिलेली आहे. त्याचा अर्थ ज्याने त्याने समजून घ्यावा. आता ही मशाल कशी पेटवायची आणि कुणाला चटके द्यायचे हे तुम्ही ठरवायचं आहे”, असं उद्धव ठाकरे म्हणाले.

आदित्य ठाकरेंनी काय म्हटलं होतं?

आदित्य ठाकरे एक्स या मायक्रोब्लॉगिंग साईटवर पोस्ट करत म्हणाले, “सोमवारी सकाळी उद्धव ठाकरे यांची सर एचएन रिलायन्स रुग्णालयात पूर्व नियोजित तपासणी झाली.

तुमच्या शुभेच्छांमुळे सर्व काही ठीक आहे. आणि ते कामावर परतण्यासाठी आणि लोकांची सेवा करण्यास पूर्णपणे तयार आहेत.” असं ट्विट त्यांनी केलं होत.

मानेच्या उपचारांसाठी रुग्णालयात भरती : 

मानेच्या दुखण्यावरील उपचारांसाठी उद्धव ठाकरे यांच्यावर 12 नोव्हेंबर 2021 रोजी एच. एन. रिलायन्स रुग्णालयात शस्त्रक्रिया करण्यात आली होती.

त्यांच्यावर सर्व्हायकल स्पाईन संबंधित शस्त्रक्रिया करण्यात आली होती. त्यानंतर उद्धव ठाकरेंची फिजिओथेरेपी सुरू करण्यात आली. या दुखण्यातून सावरण्यासाठी त्यांना अनेक आठवडे लागले होते.