Udayanraje Bhosale – सातारानगरीचे प्रथम लोकनियुक्त नगराध्यक्ष आमचे वडील श्रीमंत छत्रपती प्रतापसिंह महाराज भोसले यांची आज पुण्यतिथी आहे. आदरणीय महाराजांनी आम्हास दिलेला आदर्श जनसेवेचा वसा व केलेले संस्कार हे आमच्या आयुष्याची सर्वात मोठी शिदोरी असल्याची भावना खा. उदयनराजे भोसले यांनी व्यक्त केले. यावेळी ते भावनिक झाले होते. डोळ्यातील आसवांनी आदरांजली वाहत त्यांनी पित्याला अभिवादन करताना उपस्थित सर्वजणच भावूक झाले होते. निमित्त होते श्रीमंत छत्रपती प्रतापसिंह महाराज भोसले यांच्या पुण्यतिथीचे. कोडोली येथील छत्रपती प्रतापसिंह महाराज आयुर्वेदिक उद्यानात श्रीमंत छत्रपती प्रतापसिंह महाराजांचे प्रेरणादायी शिल्प उभारण्यात आलेले आहे. आज पुण्यतिथीच्या निमित्ताने खा. उदयनराजे यांच्यासह विविध मान्यवरांनी शिल्पास अभिवादन केले. आयुवेर्दिक गार्डन येथे आयोजित करण्यात आलेल्या या कार्यक्रमास नगराध्यक्ष अमोल मोहिते, उपनगराध्यक्ष अॅड. दत्ता बनकर, प्रभाग क्रमांक 16 च्या नगरसेविका सौ. वैशाली राजेभोसले तसेच सातार नगर परिषदेचे आजी, माजी नगरसेवक, राजकीय, शैक्षणिक आर्थिक, सामाजिक क्षेत्रातील नागरिक मोठ्या प्रमाणावर उपस्थित होते. सातार्याच्या ऐतिहासिक भूमीत आज भावनांचा एक हळवा क्षण अनुभवायला मिळाला. छत्रपती प्रतापसिंह महाराज आयुर्वेदिक उद्यानात श्रीमंत छत्रपती प्रतापसिंह महाराज यांच्या शिल्पास पुष्पहार अर्पण करून त्यांना आदरांजली वाहण्यात आली. यावेळी खासदार उदयनराजे भोसले स्वतः उपस्थित होते. शिल्पासमोर उभे राहून वडिलांच्या स्मृतींना नमन करताना त्यांच्या डोळ्यातील अश्रू अनावर झाले. काही क्षण ते निःशब्द उभे राहिले. त्या क्षणी एक खासदार नव्हे, तर आपल्या वडिलांची आठवण काढणारा मुलगा दिसत होता. यावेळी संपूर्ण वातावरणात एक भावनिक शांतता पसरली होती. प्रतापसिंह महाराजांची परंपरा, त्यांचा वारसा आणि त्यांची शिकवण पुढे नेण्याचा निर्धार करत उदयनराजेंनी वडिलांना अभिवादन केले. नगराध्यक्ष अमोल मोहिते म्हणाले, ज्येष्ठ नागरीकांनी दादा महाराजांच्या आठवणी सांगितल्या तसेच सातारच्या विकासासाठी दादा महाराजांनी घेतलेले निर्णय हे काळाच्या पुढचे होते. सौ. वैशाली राजेभोसले म्हणाल्या, दादा महाराज हे राजे होते तरी ते सर्वसामान्यांसाठी देवदूत होते व खऱ्या अर्थाने रयतेचे राजे होते साताऱ्याच्या विकासासाठी दादा महाराज अहोरात्र प्रयत्नशील होते.
