नवी दिल्ली – उदयपुर येथे एका टेलरची अलिकडेच गळा चिरून हत्या झाली आहे, त्याचे देशभर पडसाद उमटत आहेत. या घटनेतील दोन आरोपींपैकी एक जण भाजपचाच सदस्य असल्याचा आरोप कॉंग्रेस पक्षाने केला आहे. त्यामुळेच हे प्रकरण एनआयएकडे हस्तांतरीत करण्याची घाई केंद्र सरकारने केली आहे काय असा प्रश्‍नही कॉंग्रेसने उपस्थित केला आहे.

कॉंग्रेस मुख्यालयात पत्रकार परिषदेला संबोधित करताना पक्षाचे मीडिया विभाग प्रमुख पवन खेरा म्हणाले की, उदयपूरच्या घटनेच्या संदर्भात एका मीडिया ग्रुपने अतिशय खळबळजनक खुलासा केला आहे की ज्यात या प्रकरणातील आरोपी रियाझ अटारी हा भाजपचा कार्यकर्ता असल्याचे नमूद करण्यात आले आहे.

अमरावती : नुपूर शर्मा समर्थनार्थ पोस्ट टाकणाऱ्या केमिस्ट हत्या प्रकरणात थेट गृहमंत्री शहांनी घातले लक्ष; केली मोठी घोषणा

काही अहवालांमध्ये आरोपीचा उल्लेख रियाझ अख्तरी असाही करण्यात आला आहे. पत्रकार परिषदेनंतर खेरा यांनी ट्‌विटमध्ये म्हटले आहे की, कन्हैया लालचा मारेकरी रियाझ अटारी हा भाजपचा सदस्य आहे. खेरा यांनी अटारी हा भाजप नेते इर्शाद चैनवाला आणि मोहम्मद ताहिर यांच्याशी संबंधीत असल्याची छायाचित्रे आणि पोस्ट्‌सही उद्धृत केल्या आहेत.

रियाझ अटारी आणि त्याचा साथीदार घौस मोहम्मद हे दोन आरोपी सध्या न्यायालयीन कोठडीत आहेत. आरोपी रियाझ अटारी हा अनेकदा राजस्थान भाजप नेते आणि माजी मंत्री गुलाबचंद कटारिया यांच्या कार्यक्रमांमध्ये सहभागी होत असल्याचेही त्यांनी पत्रकारांपुढे आणले.

महाराष्ट्र हादरला! अमरावतीत नुपूर शर्माच्या समर्थनार्थ पोस्ट टाकणाऱ्या केमिस्टची निर्घृण हत्या

इतकेच नाही तर मुख्य आरोपी रियाझ अटारी भाजपच्या राजस्थान अल्पसंख्याक युनिटच्या बैठकींना उपस्थित राहण्याचे चित्रही जगासमोर आहे, असा दावाही खेरा यांनी केला.