Ashok Chavan : मुदखेड आणि मुखेड हे नांदेड जिल्ह्यातील दोन्ही तालुके जाहीर झालेल्या दुष्काळग्रस्त तालुक्यांच्या यादीत समाविष्ट झालेले नाहीत. मात्र या तालुक्यांचा दुष्काळग्रस्त यादीत समावेश करण्यासाठी मुख्यमंत्र्यांना सविस्तर निवेदन सादर करण्यात आल्याचे अशोक चव्हाण यांनी सांगितले आहे.

आमदार श्रीजया चव्हाण आणि आमदार तुषार राठोड यांच्याशी माझं बोलणं झालं आहे. त्यानंतर मी प्रत्यक्ष मुख्यमंत्र्यांशी संपर्क साधून याबाबत त्यांना कल्पना दिली आहे, अशी प्रतिक्रिया अशोक चव्हाण यांनी विरोधकांच्या टीकेनंतर दिली आहे.

“‘ट्रिगर-१’ मुखेड आणि मुदखेड या दोन्ही तालुक्यांना लागू झालेला नाही. मात्र, पावसाचा खंड आणि इतर बाबी लक्षात घेता, तसेच इतर तालुक्यांची परिस्थिती पाहता, मुखेड आणि मुदखेड तालुक्यांची परिस्थिती वेगळी नाही. तांत्रिक बाबींमध्ये न जाता मुख्यमंत्र्यांशी संपर्क साधून या दोन्ही तालुक्यांचा दुष्काळग्रस्त यादीत समावेश करण्याबाबत चर्चा केली आहे.

ही अंतिम यादी नसून माझं आवाहन जनतेला आणि विशेषतः शेतकऱ्यांना आहे की, कृपया तातडीने कोणत्याही निर्णयाचा अर्थ लावू नका. मी तुमच्यासाठी आहे आणि तुमच्या प्रश्नांकडे माझं लक्ष आहे,” असे अशोक चव्हाण यांनी सांगितले आहे.

तर विरोधकांवर निशाणा साधत चव्हाण म्हणाले, “विरोधकांनी आता उद्योग सुरू केला आहे. जे मध्यंतरी गायब झाले होते, ते आता बिळातून बाहेर आले आहेत आणि लोकांना हुसकावण्याचं काम सुरू केलं आहे. त्यांच्या नादी लागू नका. यापूर्वीही आपण पीक विमा मिळवून दिला आहे. ज्या काही उणीवा असतील, त्याकडेही आपलं लक्ष आहे. जी मंडळी या उद्योगाला लागली आहेत, त्यांना तुमच्या फायद्यासाठी नव्हे, तर स्वतःच्या राजकारणासाठी हे उद्योग करायचे आहेत, हे लक्षात घ्या,” असे चव्हाण म्हणाले.

Eknath Shinde: “देशाच्या जनतेची माफी मागावी”; एकनाथ शिंदेंचा राहुल गांधींवर हल्लाबोल