टोरांटो :- कॅनडाचे यशस्वी उद्योजक तसेच शीख संघटनांचे प्रतिनिधी रिपुदमन सिंग मलिक यांच्या हत्येप्रकरणी कॅनडाच्या पोलिसांनी दोघांना अटक केली आहे. दोन्ही आरोपींवर खुनाचा गुन्हा दाखल करण्यात आला आहे. मलिक यांची 15 जुलै रोजी ब्रिटिश कोलंबिया, कॅनडात गोळ्या घालून हत्या करण्यात आली होती.

अॅबॉट्सफोर्ड येथील 21 वर्षीय टान्नर फॉक्स आणि न्यू वेस्टमिंस्टर येथील 23 वर्षीय जोस लोपेज यांना मंगळवारी अटक करण्यात आली. ब्रिटीश कोलंबियातील सरे येथे बुधवारी पोलिसांनी ही माहिती प्रसारमाध्यमांना दिली. टोरंटो स्टार वृत्तपत्राने वृत्त दिले की पोलिसांनी आरोपींबाबत मौन बाळगले आहे. दोघांनाही शांततेने अटक करण्यात आल्याचे फक्त सांगितले.

कॅनडात शीख नेते ‘रिपुदमन सिंग मलिक’ यांची निर्घृण हत्या

दरम्यान, रिपुदमन सिंग हे कॅनडाचे यशस्वी उद्योजक तसेच शीख संघटनांचे प्रतिनिधी होते. 1985 मध्ये एअर इंडियाच्या विमानाचे अपहरण करून त्यात स्फोट घडवल्याचा आरोप त्यांच्यावर होता. मॉन्ट्रियलहून नवी दिल्लीला येणाऱ्या विमानात हा स्फोट घडवून आणण्यात आला होता. या दुर्घटनेत 329 प्रवाशांचा मृत्यू झाला होता. या प्रकरणात रिपुदमन सिंग 2005 पर्यंत कॅनडात तुरुंगात होते आणि नंतर त्यांची निर्दोष मुक्तता झाली. रिपुदमन सिंग हे आधी खलिस्तानचे समर्थक होते. पण नंतर त्यांची विचारधारा बदलली. शेवटच्या क्षणापर्यंत ते शीख समाजातील लोकांना फुटीरतावादी नेत्यांपासून दूर राहण्याची प्रेरणा देत राहिले.