Tukaram Mundhe – अन्न व औषध प्रशासन विभागाच्या आयुक्तपदाचा पदभार धडाडीचे अधिकारी तुकाराम मुंडे यांनी स्वीकारल्यानंतर सुप्त अवस्थेत असलेला हा विभाग खडबडून जागा झाला आहे. एरवी फक्त दसरा आणि दिवाळी सणाच्या पार्श्वभूमीवर कारवाई करणारा विभाग आता सतर्क झाल्याचे पाहायला मिळत आहे. अन्न व औषध प्रशासनाकडून मागील काही दिवसांत भेसळयुक्त पदार्थ तयार करणारे कारखाने, गुटखा,

पानमसाल्याची विक्री करणारे आणि विनापरवाना व्यवसाय करणाऱ्यांविरुद्ध धडक कारवाई केली जात आहे. याचे नागरिकांकडून कौतुक होत आहे. मात्र, याआधी अशा कारवाई का झाल्या नाहीत, असा सवालही उपस्थित केला जात आहे. नागरिकांना स्वच्छ, भेसळमुक्त, दर्जेदार अन्न पदार्थ मिळावे, यासाठी अन्न व औषध विभाग कार्यरत आहे. बेकायदेशीरपणे व्यवसाय करणारे, नागरिकांच्या आरोग्याशी खेळणाऱ्या, तसेच अशा पदार्थांचे उत्पादन करणाऱ्यांवर कायदेशीर कारवाई करण्याची जबाबदारी या विभागाकडे आहे.

मात्र, याआधी फक्त कागदावरच कारवाई दाखविणारा हा विभाग आता मात्र अधिक जागरूकपणे काम करत असल्याचे मागील काही दिवसांच्या कारवाई वरून दिसत आहे. यापूर्वी फक्त गणपती उत्सव, दसरा आणि दिवाळी या सणांच्या पपार्श्वभूमीवर मिठाई तयार करणारे आणि दुधात भेसळ करणाऱ्यांविरुद्ध कारवाई करत होता. त्यानंतर मात्र अशा कारवायांमध्ये सातत्य दिसत नव्हते. मात्र, तुकाराम मुंडे यांनी हा विभागाचा पदभार स्वीकारल्यानंतर हा विभाग खडबडून जागा झाला असून, कारवाईमध्येही वाढ झाली आहे.