Tukaram Mundhe : अन्न व औषध प्रशासन विभागाचे आयुक्त तुकाराम मुंढे यांनी पदभार स्वीकारल्यानंतर अन्न भेसळ आणि अस्वच्छतेविरोधात कारवाईचा धडाका सुरू केला आहे. हॉटेल, रेस्टॉरंट आणि खाद्यपदार्थ विक्री करणाऱ्या आस्थापनांची अचानक तपासणी करून नियमांचे उल्लंघन आढळल्यास कठोर कारवाई केली जात आहे. आता मालाड पश्चिमेतील ‘दिल्ली स्वीट अँड भेळपुरी हाऊस’वर एफडीएने मोठी कारवाई केली आहे. (Tukaram Mundhe)

अस्वच्छता आढळल्याने परवाना निलंबित

तुकाराम मुंढे यांच्या निर्देशानुसार एफडीएच्या अधिकाऱ्यांनी या आस्थापनाची तपासणी केली. यावेळी अन्नसुरक्षा आणि स्वच्छतेशी संबंधित अनेक गंभीर त्रुटी आढळून आल्या. त्यानंतर संबंधित आस्थापनाचा FSSAI परवाना तत्काळ निलंबित करण्यात आला. (Tukaram Mundhe)

तपासणीदरम्यान उघड्या गटाराची दुर्गंधी आणि साचलेल्या पाण्याच्या संपर्कात न शिजवलेले समोसे ठेवण्यात आल्याचे आढळले. स्वयंपाकघरातील भिंतींचे प्लॅस्टर गळालेले होते, तर अन्न तयार करण्याच्या ठिकाणी उघडे बल्ब असल्याचेही निदर्शनास आले. (Tukaram Mundhe)

पाण्याच्या टाकीपासून कर्मचाऱ्यांच्या नखांपर्यंत अनेक त्रुटी

आस्थापनातील साफसफाई न केलेल्या पाण्याच्या टाकीतील पाणी फिल्टर न करता स्वयंपाक आणि पिण्यासाठी वापरले जात असल्याचे तपासणीत समोर आले. तसेच लस्सी, मिठाई, पनीर, फ्रँकी आणि फरसाण यांचे परवान्याच्या श्रेणीबाहेर उत्पादन किंवा री-पॅकिंग केल्याचेही आढळले. (Tukaram Mundhe)

एफडीएच्या अधिकाऱ्यांना लेबल नसलेले पनीर आणि मुदत समाप्तीची तारीख नसलेली लस्सीही आढळली. याशिवाय 36 पैकी 26 अन्न हाताळणाऱ्या कर्मचाऱ्यांकडे आवश्यक वैद्यकीय प्रमाणपत्र नसल्याचे स्पष्ट झाले. (Tukaram Mundhe)

काही कर्मचाऱ्यांची नखे वाढलेली होती. तसेच हातावर जखमा असतानाही त्यावर योग्य पट्टी न बांधता कर्मचारी अन्न हाताळत असल्याचे आढळले. अन्न आणि पाण्याच्या आवश्यक NABL-मान्यताप्राप्त प्रयोगशाळेच्या चाचणी अहवालांचाही अभाव असल्याचे तपासणीत समोर आले. (Tukaram Mundhe)

व्यवसाय पूर्णपणे बंद ठेवण्याचे आदेश

या सर्व त्रुटींच्या पार्श्वभूमीवर एफडीएने आस्थापनाचा परवाना निलंबित केला असून, निलंबनाच्या काळात व्यवसाय पूर्णपणे बंद ठेवण्याचे आदेश दिले आहेत. अन्नाची खरेदी, उत्पादन, साठवणूक, विक्री आणि वितरणावरही बंदी घालण्यात आली आहे. (Tukaram Mundhe)

सर्व त्रुटी दूर करून Compliance Audit पूर्ण झाल्यानंतरच व्यवसाय पुन्हा सुरू करण्याबाबत विचार केला जाणार आहे. आदेशाचे उल्लंघन केल्यास फौजदारी कारवाईचा इशाराही देण्यात आला आहे. संबंधित व्यवसायधारकाला या आदेशाविरोधात 15 दिवसांच्या आत अपील करण्याचा अधिकार आहे. (Tukaram Mundhe)