Tukaram Munde : अन्न व औषध प्रशासनाचे नवे आयुक्त तुकाराम मुंढे यांनी पदभार स्वीकारताच राज्यभरातील अवैध गुटखा, पानमसाला आणि भेसळयुक्त अन्नपदार्थांच्या व्यवसायाविरोधात आक्रमक मोहीम सुरू केली आहे. त्यांच्या थेट आदेशानुसार २९ मे रोजी राज्यातील विविध विभागांमध्ये एकाचवेळी धडक कारवाई करण्यात आली. या मोहिमेत ३३ आरोपींना अटक करण्यात आली असून २८ आस्थापना सील करण्यात आल्या आहेत. (Tukaram Munde)

अन्न व औषध प्रशासनाच्या पथकांनी बृहन्मुंबई, कोकण, पुणे, नाशिक आणि छत्रपती संभाजीनगर विभागात प्रतिबंधित गुटखा, पानमसाला विक्रेते तसेच नियमांचे उल्लंघन करणाऱ्या आस्थापनांवर कारवाई केली. या कारवाईत सुमारे ६ लाख १७ हजार रुपयांचा मुद्देमाल जप्त करण्यात आला आहे. (Tukaram Munde)

कोकण विभागात सर्वाधिक कारवाई करण्यात आली. येथे २० आस्थापनांवर छापे टाकून २१ जणांना अटक करण्यात आली. पुणे विभागात ८ ठिकाणी कारवाई करून ८ आरोपींना अटक करण्यात आली. बृहन्मुंबईत दोन ठिकाणी छापे टाकून दोघांना अटक करण्यात आली, तर नाशिक आणि छत्रपती संभाजीनगर विभागात प्रत्येकी एका कारवाईत दोन जणांना ताब्यात घेण्यात आले. (Tukaram Munde)

या प्रकरणांमध्ये भारतीय न्याय संहितेतील कलम १२३, २२३, २७४, २७५ तसेच अन्न सुरक्षा व मानके कायद्यातील विविध कलमांनुसार गुन्हे दाखल करण्यात आले आहेत. संबंधित आरोपींविरोधात पुढील कायदेशीर कारवाई सुरू आहे. (Tukaram Munde)

दरम्यान, आयुक्त तुकाराम मुंढे यांनी जनतेच्या आरोग्याशी खेळ करणाऱ्यांना कडक इशारा दिला आहे. नागरिकांना सुरक्षित आणि शुद्ध अन्न मिळणे हा त्यांचा मूलभूत अधिकार असून भेसळ, प्रतिबंधित पदार्थांची विक्री किंवा उत्पादन करणाऱ्यांविरुद्ध यापुढे आणखी कठोर कारवाई केली जाईल, असे त्यांनी स्पष्ट केले. (Tukaram Munde)

याशिवाय, नागरिकांच्या तक्रारी तत्काळ नोंदवण्यासाठी अन्न व औषध प्रशासनाकडून स्वतंत्र मोबाईल अॅप विकसित केले जात आहे. तसेच लवकरच टोल-फ्री हेल्पलाइनही सुरू करण्यात येणार असल्याची माहिती प्रशासनाने दिली आहे. (Tukaram Munde)

अन्नपदार्थांच्या गुणवत्तेबाबत शंका असल्यास नागरिकांनी थेट प्रशासनाशी संपर्क साधावा, असे आवाहन करण्यात आले आहे. तक्रार करताना संबंधित ठिकाणाचा अचूक पत्ता, भेसळ होणाऱ्या पदार्थाची माहिती आणि संपर्क तपशील देण्याचे आवाहनही करण्यात आले आहे. (Tukaram Munde)