Donald Trump : रशियाच्या तेलाची खरेदी करणाऱ्या पाच मोठ्या देशांमधून अमेरिकेत आयात केल्या जाणाऱ्या उत्पादनांवरील १०० टक्के आयात शुल्क अमेरिकेचे अध्यक्ष डोनाल्ड ट्रम्प यांनी हटवले आहे. रशियाला लक्ष्य करण्याच्या उद्देशाने नवीन कायद्याला अनुसरून घातलेले निर्बंध देखील ट्रम्प यांनी हटवले आहेत. अमेरिकेते राष्ट्रीय हित लक्षात घेऊन हे निर्बंध हटवण्याच्या कार्यकारी आदेशांवर ट्रम्प यांनी शुक्रवारी रात्री स्वाक्षरी केली.

लिंडसे ओ ग्राहम सँक्शन्स रशिया ऍन्ड इराण कायद्यांतर्गत घातलेले निर्बंध, नियंत्रण आणि आयात शुल्क ट्रम्प यांनी रशियाशी अमेरिका आणि जागतिक बाजारपेठेत डीझेल पुरवठ्याचा करार झाल्यानंतर लगेच हटवले आहेत. अमेरिकेच्या राष्ट्रीय हितासाठी यावेळी हे निर्बंध हटवण्याबाबातचे प्रमाणपत्र आपण संसदेला सादर केले असल्याचेही ट्रम्प यांनी सांगितले.

हे निर्बंध हटवण्याच्या ट्रम्प यांच्या निर्णयावर सिनेटर ब्लूमेंथल यांनी टीका केली आहे. या सवलतीचा आपल्या राष्ट्रीय सुरक्षेशी काहीही संबंध नाही. सर्वकाही केवळ पुतीन यांच्या लांगूलचालनासाठी सुरू आहे. या भ्याडपणाचा निषेध रिपब्लिकन नेत्यांकडूनही केला जाईल, अशी आपल्याला आशा असल्याचे ब्लेंथेल यांनी सोशल मीडियावरच्या पोस्टमध्ये म्हटले आहे.

लिंडसे ओ ग्राहम कायद्यानुसार रशियावर निर्बंध आणि रशियाचे तेल खरेदी करणाऱ्या देशांमधून अमेरिकेत आयात होणाऱ्या उत्पादनांवर १०० टक्के आयात शुल्क लावण्याचा अधिकार अध्यक्ष ट्रम्प यांना मिळाला आहे. यामध्ये भारत आणि चीनचाही समावेश आहे. हा कायदा अमेरिकेच्या संसदेमध्ये १६ सप्टेंबर रोजी मंजूर झाला आणि दोन दिवसांनी ट्रम्प यांची स्वाक्षरी झाल्यावर त्याचे कायद्यात रुपांतर देखील झाले.

मात्र आता रशियाचे तेल, नैसर्गिक गॅस खरेदी करणाऱ्या देशांवर आयात शुल्कातून सवलत दिली जाणार आहे. मात्र याव्यतिरिक्त या देशांवर लावलेल्या आयात शुल्कावर काहीही परिणाम होणार नाही. ट्रम्प यांनी भविष्यात या देशांकडून सवलतीचा बाबत काही कारवाई करता येऊ शकेल, यासाठी अमेरिकेच्या व्यापार प्रतिनिधींना या देशांकडून होणाऱ्या तेल खरेदीवर देखरेख करण्याची सूचनाही केली आहे. अमेरिकेचे परराष्ट्र मंत्री मार्को रुबिओ भारतभेटीवर आले असतानाच ट्रम्प यांनी आयात शुल्क हटवण्याचा निर्णय घेतला आहे.