नवी दिल्ली : पश्चिम बंगालमध्ये नुकत्याच पार पडलेल्या ग्रामपंचायत निवडणुकांचे कल समोर आले आहेत. दरम्यान, या निवडणुकीत त्रिशंकू लढाईत तृणमूल काँग्रेसने बाजी मारली आहे. दार्जिलिंग आणि कालिम्पाँग वगळता प्रत्येक जिल्ह्यात तृणमूलचा झेंडा फडकला आहे. तर, राज्यात तृणमूलनंतर भाजपा क्रमांक दोनचा पक्ष ठरला आहे. डावे आणि काँग्रेस आघाडी तिसऱ्या क्रमांकावर आहे. त्यामुळे आता विरोधीपक्षाच्या खुर्चीत भाजपला बसावे लागणार आहे. शनिवारी ८ जुलै रोजी पश्चिम बंगालच्या ७३ हजार ८८७ ग्रामपंचायत जागांपैकी ६४ हजार ८७४ जागांवर मतदान प्रक्रिया पार पडली. उरलेल्या ९ हजार १२ जागांवर बिनविरोध निवडणूक झाली. या बिनविरोध निवडणुकीत सर्वाधिक म्हणजे ८ हजार ८७४ जागांवर तृणमूल काँग्रेसचा विजय झाला आहे. मंगळवारी रात्री १० वाजेपर्यंत आलेल्या निकालानुसार, TMC ने एकूण ६३ हजार २२९ पैकी २९ हजार ६६५ ग्रामपंचायतीच्या जागांवर विजय मिळवला आहे. भाजप ८ हजार २१, सीपीएम २ हजार ४७२ आणि काँग्रेस २ हजार ९४ जागांवर विजयी ठरले आहेत. सुरुवातीला मुर्शिदाबाद आणि मालदा जिल्ह्यांमध्ये काँग्रेस आणि सीपीआय यांची युती आघाडीवर होती. जानेवारीत झालेल्या मुर्शिदाबाद सागरदिघी विधानसभा पोटनिवडणुकीत काँग्रेसने विजय मिळवला होता. त्यामुळे येथील ग्रामपंचायतही काँग्रेसच मिळवेल अशी अपेक्षा होती. परंतु, सुरुवातीच्या ट्रेंडमध्ये, टीएमसी दोन्ही जिल्ह्यांमध्ये विरोधकांच्या पुढे होती. इंडियन सेक्युलर फ्रंट (आयएसएफ) बंगालमध्ये नव्याने उदयास येत असून या पक्षाने भांगर मतदारसंघात चांगली कामगिरी केली आहे. ISF ने CPI(M) आणि भूसंपादन विरोधी समितीसोबत युती करून भांगरच्या काही ब्लॉक्समध्ये तृणमूल विरोधात कडवी झुंज दिली. याच भागात मतदानावेळी हिंसाचार घडला होता. पंचायत समित्यांमध्ये, तृणमूलने रात्री १० वाजेपर्यंत ९ हजार ७४० जागांपैकी २ हजार १५५ जागा जिंकल्या आहेत. भाजपने २१४ पंचायत समित्या जिंकल्या, तर डाव्या आघाडीला ४७ आणि काँग्रेसला ३८ जागा मिळाल्या आहेत. अपक्ष उमेदवारांनी ५८ जागा जिंकल्या असून काहींचे निकाल अजूनही हाती आलेले नाहीत. रात्री १० वाजेपर्यंत राज्यभरातील एकूण ३४१ पंचायत समित्यांपैकी पैकी १२९ जागा तृणमूलने जिंकल्या आहेत. भाजपला ९ आणि डाव्या आघाडीला ३ जागा मिळाल्या आहेत. ग्रामपंचायत, पंचायत समितीसह जिल्हा परिषदेतही तृणमूलच पुढे आहे. सायंकाळी सहा वाजेपर्यंत झालेल्या मतमोजणीत ९२८ जाागांपैकी ७७ जागा तृणमूलने जिंकल्या आहेत. भाजपा १० जागांवर आघाडीवर आहे, तर सीपीआय (एम) ५ जागांवर विजयी झाली असून काही जागांचा निकाल येणे बाकी आहे.
