इंदापूर : बिजवडी (ता. इंदापूर) येथील कर्मयोगी शंकरराव पाटील सहकारी साखर कारखान्याकडे सन २०२५-२६ च्या गळीत हंगामातील ऊस वाहतूक व तोडणीची देयके थकीत असल्याने ऊस वाहतूकदार, ट्रॅक्टर मालक, शेतकरी सभासद आणि कामगार आक्रमक झाले आहेत. थकीत रकमेच्या मागणीसाठी मंगळवारी (दि. २) कारखाना परिसरात ठिय्या आंदोलन रात्री उशिरापर्यंत छेडण्यात आले. यावेळी आंदोलकांनी कारखाना प्रशासनाविरोधात जोरदार घोषणाबाजी करत, मुक्काम ठोकत संताप व्यक्त केला.

कर्मयोगी साखर कारखाना सध्या ओंकार ग्रुपकडे सहयोगी तत्त्वावर चालविण्यास देण्यात आला आहे. हंगाम संपून बराच कालावधी लोटला असतानाही वाहतूकदारांचे वाहतुकीचे तसेच तोडणी कामगारांचे लाखो रुपयांचे देयक अद्याप अदा करण्यात आलेले नसल्याचा आरोप आंदोलकांनी केला. या थकीत रकमेमुळे अनेक वाहतूकदार आर्थिक अडचणीत सापडल्याचेही त्यांनी सांगितले.

आंदोलनाची माहिती मिळताच कारखाना प्रशासन आणि पोलिस प्रशासनाने आंदोलनकर्त्यांशी चर्चा करून तोडगा काढण्याचा प्रयत्न केला. मात्र, उशिरापर्यंत कोणतीही ठोस हमी न मिळाल्याने आंदोलन सुरूच ठेवण्याचा निर्णय आंदोलकांनी घेतला. आमच्या घामाचे आणि कष्टाचे पैसे मिळाल्याशिवाय आंदोलन मागे घेतले जाणार नाही, अशी ठाम भूमिका आंदोलनकर्त्यांनी व्यक्त केली.

दरम्यान, थकीत देयकांच्या प्रश्नाकडे कारखाना प्रशासनाचे लक्ष वेधण्यासाठी बुधवारी (दि. ३) सकाळी ९ वाजता कारखाना परिसरात अर्धनग्न आंदोलन करण्यात येणार असल्याची माहिती युवक नेते शशिकांत तरंगे यांनी दिली. या आंदोलनात शेतकरी सभासद, ऊस उत्पादक, वाहतूकदार, ट्रॅक्टर मालक व कामगारांनी मोठ्या संख्येने सहभागी व्हावे, असे आवाहन करण्यात आले आहे.

 हेही वाचा : Eknath Shinde : मोठी घडामोड घडणार? एकनाथ शिंदेंनी बोलावली तातडीची बैठक