Maharashtra Politics :काल मुंबईत महाराष्ट्राची हास्यरेषा या पुस्तकाच्या प्रकाशन कार्यक्रमासाठी मुख्यमंत्री देवेंद्र फडणवीस, माजी मुख्यमंत्री उद्धव ठाकरे आणि मनसे प्रमुख राज ठाकरे एका मंचावर आले होते. एरवी एकमेकांवर सडकून टीका करणारे हे नेते एका मंचावर आल्याने सर्वांच्याच भुवया उंचावल्या. महाराष्ट्रात आगामी काळात वेगळे राजकीय चित्र दिसू शकते अशी चर्चा आता रंगू लागली आहे.

या व्यासपीठावरुन तिन्ही नेत्यांनी केलेल्या मिश्किल विधानांमुळे राजकीय चर्चांना उधाण आले आहे. अशातच उद्धव ठाकरे आणि उपमुख्यमंत्री एकनाथ शिंदे भविष्यात एकत्र दिसतील या विधानाने खळबळ उडवून दिली आहे.

“भविष्यात उद्धव ठाकरे आणि एकनाथ शिंदे देखील एकत्र येऊ शकतात. हे राजकारण आहे.” देवेंद्र फडणवीस आणि ठाकरे बंधू एकत्र येण्याच्या प्रश्नावर एका वृत्तवाहिनीला बाईट देताना शिवसेना नेते आणि महानगरप्रमुख रवींद्र धंगेकर यांनी हे वक्तव्य केले.

पुन्हा एकनाथ शिंदे यांना राज्याचे मुख्यमंत्रीपद दिले पाहिजे, अशी मागणी देखील रवींद्र धंगेकर यांनी केली. विधान परिषदेच्या निवडणुकीच्या पराभवानंतर भाजप आणि शिवसेनेत अंतर्गत कलह उफाळून आल्यानंतर रवींद्र धंगेकरांच्या वक्तव्याला महत्व प्राप्त झाले आहे.

पुन्हा बन यांच्यावर टीका

“भारतीय जनता पार्टीचे प्रवक्ते नवनाथ बन यांच्याबद्दल मी काय बोलणार नाही ते पगारी नोकर आहेत.” अशी बोचरी टीका त्यांनी केली. पुण्यातील पदवीधर आणि शिक्षक निकालावरुन नवनाथ बन यांनी रवींद्र धंगेकर यांना लक्ष करत त्यांच्यावर गंभीर आरोप केले होते. या दोन्ही नेत्यांमधील वाद विकोपाला गेले असून एकमेकांवर आरोप प्रत्यारोप केले जात आहेत. या प्रकरणी वरिष्ठांकडून दोन्ही नेत्यांना महायुतीचे धर्माचे पालन करण्याचे आवाहन केले जात असल्याची माहिती सूत्रांकडून मिळत आहे.

राज ठाकरेंचं वक्तव्य आणि धंगेकर म्हणाले…

कार्यक्रमात राज ठाकरे यांनी आशिष शेलारांच्या वक्तव्यावर मिश्किल टिप्पणी केली. “२०२९ पर्यंत मुख्यमंत्री देवेंद्र फडणवीसांना ठेवा म्हणजे झालं.” त्यांच्या याच वक्तव्याचा दाखल देत राज ठाकरे यांना भविष्यातील बाबी समजतात. त्यामुळे २०२९ च्या नेतृत्वबदल संदर्भात बोलले ते खरे असू शकते, असे मत रवींद्र धंगेकरांनी व्यक्त केले.

Healthy Cookies: बाजारातील बिस्किटांना पर्याय! बेसन आणि ओट्सपासून बनवा घरगुती कुकीज