Virat Kohli needs just 64 runs in IND vs SA 1st ODI : टीम इंडियाता स्टार फलंदाज विराट कोहलीने वनडे क्रिकेटमध्ये अनेक मोठे विक्रम आपल्या नावावर केले आहेत. आता तो दक्षिण आफ्रिकेविरुद्धच्या पहिल्या वनडे सामन्यात आणखी एक नवीन आणि खास विक्रम प्रस्थापित करण्याच्या अगदी जवळ आहे. ३० नोव्हेंबर रोजी रांचीच्या जेएससीए आंतरराष्ट्रीय क्रिकेट स्टेडियममध्ये हा सामना होणार आहे. या सामन्यात कोहलीला इतिहास रचण्याची मोठी संधी आहे. विराट कोहली करणार हा खास विक्रम – विराट कोहलीने आजवर द्विपक्षीय वनडे मालिकांच्या इतिहासात १९६ डावांमध्ये ९९३६ धावा केल्या आहेत. जर कोहलीने रांचीतील सामन्यात ६४ धावा केल्या, तर तो द्विपक्षीय वनडे मालिकेत १०,००० धावा पूर्ण करणारा जगातील पहिला क्रिकेटपटू ठरेल. या यादीत दुसऱ्या क्रमांकावर एमएस. धोनी आहे, ज्याने २०१ डावांमध्ये ७६६९ धावा केल्या आहेत. दक्षिण आफ्रिकेविरुद्ध आणि रांचीमध्ये दमदार रेकॉर्ड – दक्षिण आफ्रिकेविरुद्ध कोहलीचा वनडे रेकॉर्ड उत्कृष्ट राहिला आहे. त्याने आतापर्यंत आफ्रिकेविरुद्ध ६५.३९ च्या सरासरीने १५०४ धावा केल्या आहेत, ज्यात ५ शतकांचा समावेश आहे. शिवाय, रांचीच्या मैदानावरही कोहलीचे आकडे खूप चांगले आहेत. रांचीत खेळलेल्या ५ सामन्यांतील ४ डावांमध्ये त्याने १९२ च्या सरासरीने ३८४ धावा केल्या आहेत. यामध्ये दोन शतके आणि एक अर्धशतक समाविष्ट आहेत. त्याने १५ नोव्हेंबर २०१४ रोजी श्रीलंकेविरुद्ध केलेले १३९ धावांचे नाबाद खेळी या मैदानावर भारतीय फलंदाजाने केलेला संयुक्तपणे सर्वोत्तम स्कोर आहे. हेही वाचा – IND vs SA : दव अन् फिरकीचा खेळ! रांचीमध्ये टॉस ठरेल गेम चेंजर, विराट-रोहितवर सर्वांच्या नजरा कामगिरी सुधारण्याची संधी – यापूर्वीच्या ऑस्ट्रेलियाविरुद्धच्या वनडे मालिकेत विराटला अपेक्षित कामगिरी करता आली नव्हती. पहिल्या दोन सामन्यांत तो शून्यावर बाद झाला होता, तर शेवटच्या वनडेत त्याने नाबाद ७४ धावांची खेळी केली होती. त्यामुळे, आता दक्षिण आफ्रिकेविरुद्धच्या या मालिकेत तो मोठी खेळी करण्यास उत्सुक असेल. वनडे मालिकेसाठी भारतीय संघात रोहित शर्मा, केएल राहुल आणि रवींद्र जडेजा यांसारखे स्टार खेळाडू परतले आहेत.
