‘मला राजकारणच जमतं तेच करू द्या!’
फडणवीसांचा राज ठाकरेंना टोला;

Top 15 News:  मुख्यमंत्री देवेंद्र फडणवीस, उद्धव ठाकरे आणि राज ठाकरे हे तिघे ‘महाराष्ट्राच्या हास्यरेषा’ पुस्तकाच्या प्रकाशन सोहळ्यात एकाच व्यासपीठावर आले. यावेळी फडणवीस यांनी मिश्किल टिप्पणी केली. प्रत्येकाने आपापल्या क्षेत्रात उत्तम काम करावे. राज ठाकरे चांगले व्यंगचित्रकार, तर उद्धव ठाकरे चांगले छायाचित्रकार आहेत. मला राजकारण समजते, त्यामुळे त्यांनी मला राजकारणात चांगले काम करू द्यावे, असे फडणवीस म्हणाले. महाराष्ट्रात राजकीय मतभेद असले तरी संवादाची परंपरा कायम असल्याचेही त्यांनी सांगितले.

राज्यात पुन्हा पावसाचे संकट;
विदर्भासह मध्य महाराष्ट्राला येलो अलर्ट

महाराष्ट्रातील हवामानात पुन्हा बदल होण्याची शक्यता असून, हवामान विभागाने काही जिल्ह्यांना येलो अलर्ट जारी केला आहे. नाशिक, अहिल्यानगर, अमरावती, नागपूर, भंडारा, गोंदिया आणि गडचिरोली येथे विजांच्या कडकडाटासह पावसाचा अंदाज आहे. मराठवाड्यातही काही ठिकाणी मेघगर्जनेसह सरी कोसळू शकतात. बंगालच्या उपसागरातील हवामानातील घडामोडी आणि दक्षिण अंदमान समुद्रातील कमी दाबाच्या क्षेत्रामुळे राज्याच्या वातावरणावर परिणाम होण्याची शक्यता आहे. नागरिकांनी सतर्क राहण्याचे आवाहन करण्यात आले आहे.

शिंदेंना पुन्हा मुख्यमंत्री करा;
शिवसेना नेत्यांची मागणी, भाजपला इशारा

विधान परिषद निवडणुकीतील निकालानंतर महायुतीतील मतभेद उघड होऊ लागले आहेत. शिवसेना नेते अब्दुल सत्तार आणि रवींद्र धंगेकर यांनी एकनाथ शिंदे यांना पुन्हा मुख्यमंत्री करण्याची मागणी केली आहे. २०२४ ची विधानसभा निवडणूक शिंदेंच्या नेतृत्वाखाली लढवली असल्याने मुख्यमंत्रिपदावर त्यांचाच अधिकार असल्याचे सत्तार म्हणाले. तसेच महायुती टिकवायची की नाही, हे भाजपच्या हातात असल्याचा इशाराही त्यांनी दिला. त्यामुळे महायुतीतील मुख्यमंत्रिपदावरून राजकीय चर्चा पुन्हा रंगली आहे.

पुण्यात पाणी कपातीचा निर्णय महापालिकेच्या हाती;
१३ टीएमसी पाणी मंजूर

पुणे शहराला ऑगस्ट २०२७ पर्यंत खडकवासला प्रकल्पातून १३ टीएमसी पाणी मिळणार आहे. मात्र, दुष्काळी परिस्थितीमुळे पाणी कपात करावी लागणार असून, ती किती करायची, याचा निर्णय पुणे महापालिका घेणार आहे. यासाठी दोन दिवसांत अधिकाऱ्यांची बैठक घेण्यात येणार असल्याची माहिती महापौर मंजुषा नागपुरे यांनी दिली. पाणीबचत, पुनर्वापर आणि वापरावरील निर्बंधांबाबतही बैठकीत चर्चा झाली.

नागपूरच्या पराभवाची जबाबदारी स्वीकारली;
बावनकुळे करणार कारणांचा शोध

विधान परिषदेच्या पदवीधर आणि शिक्षक मतदारसंघांतील पराभव मान्य असल्याचे महसूलमंत्री चंद्रशेखर बावनकुळे यांनी सांगितले. नागपूरच्या जागेचा प्रभारी असल्याने पराभवाची जबाबदारीही त्यांनी स्वीकारली. महायुतीतील घटक पक्षांच्या कामगिरीचा आढावा घेऊन पक्षविरोधी भूमिका घेणाऱ्यांना समज दिली जाईल, असे त्यांनी स्पष्ट केले. मतदारांनी मतदान का केले नाही, याचाही अभ्यास केला जाणार असल्याचे बावनकुळे म्हणाले.

 महायुतीत २०२९ पर्यंत एकजूट कायम राहणार;
नितेश राणेंचा दावा, विरोधकांवर निशाणा Top 15 News: 

विधान परिषद निवडणुकीच्या निकालानंतर भाजपकडून पराभवाचे विश्लेषण केले जाणार असून, त्यानंतर वरिष्ठ नेते आणि मित्रपक्षांची बैठक होईल, असे नितेश राणे यांनी सांगितले. महायुतीत कोणतेही मतभेद नसल्याचा दावा करत त्यांनी २०२९ पर्यंत युती कायम राहणार असल्याचे स्पष्ट केले. अब्दुल सत्तार यांच्या मुख्यमंत्रिपदाच्या विधानावरही त्यांनी प्रतिक्रिया दिली. दरम्यान, काँग्रेसचे प्रदेशाध्यक्ष हर्षवर्धन सपकाळ आणि ठाकरे गटावर टीका करत राणे यांनी विविध राजकीय मुद्द्यांवरून विरोधकांना लक्ष्य केले. पूर्णेकर हत्या प्रकरण आणि अब्दुल सत्तार यांच्या ‘राणे चार आणे’ टिप्पणीवरही त्यांनी प्रत्युत्तर दिले.

 गोकुळ अध्यक्ष निवडीवरून सतेज पाटील आक्रमक;
‘सहकार क्षेत्रासाठी काळा दिवस’

गोकुळ दूध संघाच्या अध्यक्ष निवडीवरून सतेज पाटील यांनी महायुतीवर टीका केली. २५ पैकी १३ जागा मिळाल्याने शशिकांत चुयेकर यांच्या निवडीला सहकार्य अपेक्षित होते. मात्र, कोरमचा मुद्दा उपस्थित झाल्यानंतर १३ संचालकांनी समांतर बैठक घेऊन चुयेकर यांची अध्यक्षपदी निवड केली. ही निवड कायदेशीर असल्याचा दावा पाटील यांनी केला. प्रशासकांच्या काळात गोकुळला २४ कोटींचा तोटा झाल्याचे सांगत, कारभार निवडून आलेल्या अध्यक्षांकडे सोपवण्याची मागणी ते करणार आहेत. प्रा. जयंत पाटील यांनी या प्रक्रियेवर नाराजी व्यक्त करत आजचा दिवस सहकार क्षेत्रासाठी काळा दिवस असल्याचे म्हटले.

 टोरेंट प्रकल्पासाठी वृक्षतोडीला विरोध;
आठवले गटाचा निषेध

रायगड जिल्ह्यातील कर्जत तालुक्यात टोरेंट प्रकल्पासाठी साय डोंगरावर मोठ्या प्रमाणात वृक्षतोड केल्याचा आरोप होत आहे. पाली, कोथळ खलाटी परिसरातील या वृक्षतोडीचा रिपब्लिकन पार्टी ऑफ इंडिया आठवले गटाने निषेध केला. पक्षाचे जिल्हाध्यक्ष नरेंद्र गायकवाड यांनी कार्यकर्त्यांसह घटनास्थळी भेट देऊन पाहणी केली. वृक्षतोडीविरोधात विविध स्तरांतून विरोध होत असून, याप्रकरणी प्रशासन काय भूमिका घेणार, याकडे लक्ष लागले आहे.

 बीडमध्ये बोगस डॉक्टरचा पर्दाफाश;
आलिशान क्लिनिकवर छापा

बीड शहरातील संत भगवान बाबा चौक परिसरात आरोग्य विभागाने बोगस डॉक्टरवर कारवाई केली. ‘संजीवनी नस क्लिनिक’मध्ये आवश्यक वैद्यकीय पात्रता नसतानाही ऋषिकेश कानडे रुग्णांवर उपचार करत असल्याचा आरोप आहे. नस आणि हाडांचे आजार बरे करण्याच्या नावाखाली उपचार सुरू होते. कारवाईनंतर संबंधित व्यक्तीला पोलिसांच्या ताब्यात देण्यात आले असून, गुन्हा दाखल करण्याची प्रक्रिया सुरू आहे. जिल्ह्यात बोगस डॉक्टरांविरोधात आरोग्य विभागाने तपासणी मोहीम सुरू केली आहे.

  कराडमध्ये संजय गायकवाडांविरोधात काँग्रेस आक्रमक
युवक काँग्रेसचे अनोखे आंदोलन

आमदार संजय गायकवाड यांनी शेतकऱ्यांबाबत केलेल्या कथित असंवेदनशील वक्तव्याच्या निषेधार्थ कराडमध्ये युवक काँग्रेसने आक्रमक आंदोलन केले. यावेळी गायकवाड यांच्या पुतळ्याचे भटक्या कुत्र्यांकडून लचके तोडले जात असल्याचे प्रात्यक्षिक सादर करण्यात आले. येत्या २४ तासांत गायकवाड यांनी शेतकऱ्यांची माफी मागावी, अन्यथा पोलीस ठाण्यात तक्रार दाखल करून दिसेल त्या ठिकाणी काळे फासण्याचा इशारा युवक काँग्रेसचे तालुकाध्यक्ष महेश करचे यांनी दिला. आंदोलनात कार्यकर्ते मोठ्या संख्येने सहभागी झाले होते.

कर्नाटकातील शेतकऱ्यांना २,५०० रुपयांची मदत;
राज्यसरकारकडून १७ अटी लागू Top 15 News: 

कर्नाटक सरकारने २२६ दुष्काळग्रस्त तालुक्यांतील पात्र शेतकऱ्यांना पीक नुकसानीपोटी पहिल्या टप्प्यात जास्तीत जास्त २,५०० रुपयांची तात्पुरती मदत जाहीर केली आहे. सुमारे ४५ ते ५० लाख शेतकऱ्यांना याचा लाभ अपेक्षित आहे. मदतीसाठी फ्रुट्स प्रणालीतील नोंदणी, फार्मर आयडी, आधार पडताळणी आणि पीक सर्वेक्षण अनिवार्य आहे. गैरव्यवहार टाळण्यासाठी १७ अटी लागू केल्या आहेत. यासाठी राज्य सरकार १,२५० कोटी रुपये खर्च करणार असून, केंद्राचा निधी मिळाल्यानंतर अतिरिक्त भरपाई दिली जाणार आहे.

नसीरुद्दीन शाह-रिजिजू वाद पेटला;
CPM चा पलटवार

अभिनेते नसीरुद्दीन शाह आणि केंद्रीय मंत्री किरेन रिजिजू यांच्यातील शाब्दिक वादाला नवे वळण मिळाले आहे. शाह यांच्या विचारसरणीवर टीका करत रिजिजू यांनी त्यांना ‘दिमागी नक्षली’ म्हटले. यावर CPM नेते हन्नान मोल्लाह यांनी प्रत्युत्तर देत रिजिजू यांना ‘मेंटल क्रिमिनल’ संबोधले. सरकारवर प्रश्न उपस्थित करणाऱ्यांना नक्षलवादी किंवा देशद्रोही ठरवले जात असल्याचा आरोपही त्यांनी केला. शाह यांनीही सरकारच्या टीकाकारांना दिल्या जाणाऱ्या अशा विशेषणांवर आक्षेप घेतला होता.

एलॉन मस्क यांचा मोठा दावा!
भविष्यात नोकरीची गरजच उरणार नाही?

प्रसिद्ध उद्योगपती एलॉन मस्क यांनी AI आणि रोबोटिक्समुळे भविष्यात नोकरी करणे ही गरज न राहता आवडीची बाब बनेल, असा दावा केला आहे. ऑल-इन समिटमध्ये बोलताना त्यांनी ‘युनिव्हर्सल हाय इन्कम’ची संकल्पना मांडली. त्यांच्या मते, रोबोट्स आणि AI बहुतांश कामे करतील. त्यामुळे वस्तू व सेवा स्वस्त आणि सहज उपलब्ध होतील. मात्र, रोजगारातील घट, रोबोट्सची मालकी आणि संपत्तीचे समान वाटप ही या बदलासमोरील प्रमुख आव्हाने असतील.

हार्दिक पांड्या CSK मध्ये जाणार?;
३३ नंबरमुळे चर्चांना उधाण

आयपीएल २०२७ पूर्वी हार्दिक पांड्याच्या चेन्नई सुपर किंग्समधील संभाव्य एन्ट्रीची चर्चा रंगली आहे. CSK च्या प्रमोशनल व्हिडिओमध्ये ३३ क्रमांक दिसल्याने चाहत्यांनी हार्दिकशी संबंध जोडला. त्यातच रविचंद्रन अश्विनच्या ‘On, proper cooking’ या प्रतिक्रियेने चर्चांना आणखी हवा मिळाली. मात्र, हार्दिकच्या ट्रेडबाबत अद्याप अधिकृत पुष्टी झालेली नाही. CSK चे सीईओ कासी विश्वनाथन यांनीही या चर्चांवर स्पष्टीकरण दिल्याचे वृत्त आहे.

“माझा देवावर विश्वास नाही”
राधिका आपटेच्या वक्तव्यांची चर्चा Top 15 News: 

‘अक्का’ या आगामी वेब सीरिजच्या प्रमोशनदरम्यान अभिनेत्री राधिका आपटेने आपण नास्तिक असल्याचा खुलासा केला. देवापेक्षा निसर्गावर आपला विश्वास असल्याचे सांगत तिने मूर्तीपेक्षा निसर्ग जपण्याचे आवाहन केले. दुसरीकडे, अभिनेत्री कीर्ती सुरेशने देवावर श्रद्धा असल्याचे सांगितले; मात्र आपण धार्मिक नसल्याचेही स्पष्ट केले. राधिका आणि कीर्तीची प्रमुख भूमिका असलेली ‘अक्का’ ही सीरिज ३० ऑक्टोबरला नेटफ्लिक्सवर प्रदर्शित होणार आहे.