मुंबईत आज दोन्ही शिवसेनेचे दसरा मेळावे;
उद्धव ठाकरे की एकनाथ शिंदे, कोणाच्या भाषणाकडे लक्ष?

 Top 15 News:  महाराष्ट्राच्या राजकारणात महत्त्वाच्या मानल्या जाणाऱ्या दसरा मेळाव्यांसाठी मुंबई सज्ज झाली आहे. उद्धव ठाकरे यांच्या नेतृत्वाखालील शिवसेनेचा मेळावा शिवाजी पार्कवर, तर एकनाथ शिंदे यांच्या शिवसेनेचा मेळावा गोरेगाव येथील नेस्को मैदानावर होणार आहे. दोन्ही मेळाव्यांतून नेते कोणते राजकीय मुद्दे मांडणार आणि कोणत्या घोषणा करणार, याकडे राज्याचे लक्ष लागले आहे. उद्धव ठाकरे, आदित्य ठाकरे आणि संजय राऊत, तर एकनाथ शिंदे, श्रीकांत शिंदे आणि उदय सामंत यांच्यासह दोन्ही गटांचे प्रमुख नेते यावेळी भाषण करणार आहेत.

विधान परिषदेच्या ५ जागांसाठी १८२ उमेदवार मैदानात;
२३ ऑक्टोबरला मतदान

महाराष्ट्र विधान परिषदेच्या तीन पदवीधर आणि दोन शिक्षक मतदारसंघांच्या निवडणुकीसाठी २३ ऑक्टोबर २०२६ रोजी मतदान होणार आहे. पाच जागांसाठी एकूण १८२ उमेदवार रिंगणात असून, १० लाख ६८ हजार ७२ मतदार मतदानाचा हक्क बजावणार आहेत. यासाठी राज्यात २ हजार ४१९ मतदान केंद्रांची व्यवस्था करण्यात आली आहे. मतदान सकाळी ८ ते सायंकाळी ४ या वेळेत होईल. २७ ऑक्टोबर रोजी मतमोजणी होणार असून, संपूर्ण निवडणूक प्रक्रिया ३१ ऑक्टोबरपर्यंत पूर्ण केली जाणार आहे. पुणे पदवीधर मतदारसंघात सर्वाधिक ४७ उमेदवार निवडणूक लढवत आहेत.

महाराष्ट्रात अवकाळी पावसाचा इशारा!
कोल्हापूर, सिंधुदुर्गसह अनेक जिल्ह्यांना अलर्ट

राज्यात ऑक्टोबर हिटचा चटका जाणवत असतानाच काही भागांत पावसाची शक्यता वर्तवण्यात आली आहे. २० ऑक्टोबर रोजी कोल्हापूर, सिंधुदुर्ग आणि कोल्हापूर घाटमाथ्यावर वादळी पावसाचा इशारा देण्यात आला आहे. तर रत्नागिरी, सातारा, सांगली आणि छत्रपती संभाजीनगरमध्ये विजांसह हलक्या सरींचा अंदाज आहे. बुधवारी ठाणे, रायगड, पुणे घाटमाथा, नाशिक, जळगावसह अनेक जिल्ह्यांत गडगडाटासह हलका पाऊस पडण्याची शक्यता आहे. त्यामुळे नागरिकांनी हवामानातील बदल लक्षात घेऊन काळजी घ्यावी.

दुष्काळग्रस्तांच्या मदतीसाठी सोलापूर जिल्हा प्रशासननाचा पुढाकार
मदतीसाठी  ‘वॉर रूम’ निर्मिती होणार 

सोलापूर जिल्ह्यातील दुष्काळग्रस्तांना तातडीने मदत मिळावी, यासाठी जिल्हा प्रशासनाकडून ‘वॉर रूम’ची निर्मिती करण्यात येणार आहे. या माध्यमातून पिण्याच्या पाण्याचे टँकर, जनावरांसाठी चारा आणि इतर समस्यांवर उपाययोजना केल्या जाणार आहेत. तसेच, सावकारांकडून होणारा त्रास आणि बँका, फायनान्स कंपन्यांकडून केली जाणारी सक्तीची वसुली रोखण्यासाठीही प्रशासन प्रयत्न करणार आहे. दुष्काळामुळे अडचणीत सापडलेल्या नागरिकांच्या समस्या तातडीने सोडविण्यावर या वॉर रूमच्या माध्यमातून भर दिला जाणार असल्याची माहिती सोलापूरचे जिल्हाधिकारी एस. कार्तिकेयन यांनी दिली.

आपण दोघेही वार, एक वार मुख्यमंत्री झाला पाहिजे’;
वडेट्टीवार-मुनगंटीवारांचा VIDEO व्हायरल Top 15 News: 

महाराष्ट्राच्या राजकारणात मुख्यमंत्रीपदावरून पुन्हा चर्चांना उधाण आले आहे. काँग्रेस नेते विजय वडेट्टीवार आणि भाजपचे ज्येष्ठ नेते सुधीर मुनगंटीवार यांच्या भेटीतील संवादाचा व्हिडीओ सोशल मीडियावर व्हायरल होत आहे. चंद्रपुरातील बदकम्मा महोत्सवादरम्यान दोघांची भेट झाली. यावेळी वडेट्टीवार यांनी ‘आपण दोघेही वार आहोत, आपल्यापैकी एक वार मुख्यमंत्री झाला पाहिजे,’ असे म्हटल्याचे व्हिडीओत दिसते. मुनगंटीवार यांनीही हसून त्याला प्रतिसाद दिला. या मिश्किल संवादामुळे राजकीय वर्तुळात चर्चांना सुरुवात झाली असली, तरी यातून दोन्ही नेत्यांच्या राजकीय भूमिकेबाबत कोणताही निष्कर्ष काढता येत नाही.

RNO – राज्यातील कायदा-सुव्यवस्थेचा बोजवारा उडाला
नाना पटोलेंचा फडणवीस सरकारवर हल्लाबोल

नागपूर पदवीधर मतदारसंघाचे महाविकास आघाडीचे उमेदवार अभिजीत वंजारी यांच्या प्रचारासाठी काँग्रेस नेते नाना पटोले यांनी गोंदिया जिल्ह्यातील देवरी येथे सभा घेतली. यावेळी त्यांनी वंजारी यांना विजयी करण्याचे आवाहन केले. याशिवाय, अभिनेता टायगर श्रॉफ यांच्यावरील गोळीबाराच्या घटनेवरून राज्यातील कायदा-सुव्यवस्थेचा मुद्दा उपस्थित करत मुख्यमंत्री देवेंद्र फडणवीस यांच्या राजीनाम्याची मागणी केली. प्रमोद महाजन कौशल्य विकास योजनेतील कथित ४०० कोटींच्या घोटाळ्यावरूनही त्यांनी सरकारला प्रश्न विचारले. तसेच, बोदलकसा धरण प्रकरणी सरकारला जबाबदार धरत दोषींवर कारवाई न झाल्यास आंदोलनाचा इशारा दिला.

RNO – ‘५ हजार देऊन शेतकऱ्यांची फसवणूक’;
सुप्रिया सुळेंची टीका

खासदार सुप्रिया सुळे यांनी छत्रपती संभाजीनगर येथे पत्रकार परिषद घेत राज्य सरकारवर विविध मुद्द्यांवरून टीका केली. दुष्काळग्रस्त शेतकऱ्यांना पाच हजार रुपयांची मदत देऊन सरकारने त्यांची फसवणूक केल्याचा आरोप करत त्यांनी हेक्टरी एक लाख रुपयांची मदत देण्याची मागणी केली. मात्र, दुष्काळाच्या मुद्द्यावर राजकारण करू नये, असे आवाहनही त्यांनी केले. यावेळी त्यांनी गोकुळ निवडणुकीतील विजयाबद्दल सतेज पाटील यांचे अभिनंदन केले. तसेच, राज्यातील कायदा-सुव्यवस्था आणि मायक्रोफायनान्स कंपन्यांकडून होणाऱ्या कथित त्रासावरूनही सरकारला जाब विचारला.

RNO – दसऱ्याच्या तोंडावर झेंडूच्या फुलांना कवडीमोल भाव;
चांदवडमध्ये किलोला अवघे २ ते ७ रुपये

दसरा सण तोंडावर असतानाच नाशिक जिल्ह्यातील चांदवड कृषी उत्पन्न बाजार समितीत झेंडू उत्पादक शेतकरी अडचणीत सापडले आहेत. बाजारात झेंडूच्या फुलांची मोठ्या प्रमाणात आवक झाली; मात्र किलोला अवघा २ ते ७ रुपये भाव मिळत असल्याने शेतकऱ्यांची निराशा झाली आहे. गेल्या दोन महिन्यांपासून पावसाने दडी मारल्याने पिकांच्या वाढीवर परिणाम झाला आहे. त्यातच उत्पादित फुलांना अपेक्षित दर मिळत नसल्याने शेतकऱ्यांवर दुहेरी संकट ओढवले आहे. सणासुदीच्या काळात चांगला भाव मिळेल, अशी अपेक्षा असताना कमी दरामुळे शेतकऱ्यांना आर्थिक फटका बसत आहे.

RNO – ‘मी राष्ट्रवादीतच राहणार’;
प्रताप पाटील चिखलीकरांचे स्पष्टीकरण

गेल्या आठ ते दहा दिवसांपासून सुरू असलेल्या पक्षांतराच्या चर्चांवर माजी खासदार प्रताप पाटील चिखलीकर यांनी स्पष्टीकरण दिले आहे. आपण कोणत्याही पक्षाशी पक्षांतराबाबत चर्चा केलेली नसून, राष्ट्रवादी काँग्रेसमध्येच राहून काम करणार असल्याचे त्यांनी स्पष्ट केले. अजित पवार यांच्या नेतृत्वाखाली पक्षाच्या चिन्हावर विधानसभा निवडणूक लढवून विजयी झाल्याची आठवणही त्यांनी करून दिली. नांदेड जिल्ह्यात राष्ट्रवादी काँग्रेस वाढवण्यासाठी प्रयत्न केल्याचे सांगतानाच, पक्षाच्या बैठकांमध्ये आपल्याला पक्षात घेऊ नये, अशा चर्चा होत असल्याबद्दल त्यांनी नाराजी व्यक्त केली.

RNO – ‘शेतकऱ्यांची अडवणूक खपवून घेणार नाही’;
आमदार चंद्रकांत रघुवंशी यांचा महावितरणला इशारा

दुष्काळाच्या पार्श्वभूमीवर शेतकऱ्यांना शेतीसाठी सहा तास अखंडित वीजपुरवठा द्यावा, असा इशारा आमदार चंद्रकांत रघुवंशी यांनी महावितरणच्या अधिकाऱ्यांना दिला. नंदुरबार तालुक्यातील शेतकऱ्यांना अनियमित वीजपुरवठा, जळालेले रोहित्र, जीर्ण खांब आणि तुटलेल्या तारांमुळे अडचणींचा सामना करावा लागत आहे. या समस्यांवर चर्चा करण्यासाठी आयोजित ‘शेतकरी जनसंवाद’ उपक्रमात त्यांनी अधिकाऱ्यांना तातडीने उपाययोजना करण्याच्या सूचना दिल्या. तसेच, स्मार्ट मीटर बसविण्याबाबत सक्ती होत असल्याच्या तक्रारींची दखल घेऊन ग्राहकांच्या समस्या सोडविण्याची मागणीही त्यांनी केली.

सौरव दास, आशुतोष रांका यांच्या कोठडीत वाढ;
कोर्टाने दिला मोठा निर्णय! Top 15 News: 

कॉक्रोच जनता पार्टीचे नेते सौरव दास आणि आशुतोष रांका यांच्या न्यायालयीन कोठडीत आणखी दोन दिवसांची वाढ करण्यात आली आहे. केंद्रीय मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी आंदोलन करणाऱ्या या दोघांना १३ ऑक्टोबर रोजी जंतर-मंतर परिसरात विनापरवानगी प्रवेश केल्याच्या आरोपावरून अटक करण्यात आली होती. त्यांच्या कोठडीत पाच दिवसांची वाढ करण्याची मागणी दिल्ली पोलिसांनी केली होती. मात्र, सुनावणीनंतर न्यायालयाने दोन दिवसांची कोठडी वाढवण्याचा निर्णय दिला. याच प्रकरणात अटक करण्यात आलेल्या अजिंक्य शिंदे याची शांतता राखण्याच्या अटीवर जामिनावर सुटका करण्यात आली होती.

कच्च्या तेलाच्या आयातीचा खर्च ४६% वाढला;
सहा महिन्यांत भारताचे ९०.६ अब्ज डॉलर खर्च

पश्चिम आशियातील संघर्ष आणि आंतरराष्ट्रीय बाजारपेठेतील वाढलेल्या किमतींमुळे भारताच्या कच्च्या तेलाच्या आयातीचा खर्च एप्रिल ते सप्टेंबर या सहा महिन्यांत ४६.३ टक्क्यांनी वाढून ९०.६ अब्ज डॉलरवर पोहोचला. गेल्या वर्षी याच कालावधीत हा खर्च ६१.९ अब्ज डॉलर होता. पेट्रोलियम नियोजन आणि विश्लेषण कक्षाच्या अहवालानुसार, तेल आयातीचे प्रमाण जवळपास स्थिर राहिले; मात्र किमती वाढल्याने खर्चात मोठी वाढ झाली. दरम्यान, देशातील पेट्रोलियम उत्पादनांचा एकूण वापर ३.३ टक्क्यांनी घटला, तर डिझेलचा वापर ४.९ टक्के आणि पेट्रोलचा वापर ७.१ टक्क्यांनी वाढला.

जगभरात Gen Z चा उद्रेक!
महागाई-बेरोजगारीविरोधात अनेक देशांत आंदोलनांचा भडका

महागाई, बेरोजगारी आणि सरकारी धोरणांविरोधात जगभरातील अनेक देशांत नागरिक रस्त्यावर उतरल्याचे चित्र आहे. फ्रान्स, इटली, अल्बेनिया, बेल्जियम आणि पोर्तुगालसह विविध देशांमध्ये निदर्शने झाली. काही ठिकाणी आंदोलनांना हिंसक वळण लागल्याचे वृत्त आहे. अर्जेंटिनामध्येही विद्यार्थी आणि कामगार संघटनांनी सरकारच्या धोरणांविरोधात आंदोलन केले. तरुणांमधील वाढता असंतोष, जीवनावश्यक वस्तूंचा वाढता खर्च आणि रोजगाराच्या संधींचा प्रश्न यामुळे अनेक देशांतील सरकारांसमोर आव्हान निर्माण झाले आहे. मात्र, या सर्व आंदोलनांना केवळ Gen Z चा उद्रेक म्हणणे योग्य ठरणार नाही; प्रत्येक देशातील आंदोलनाची कारणे वेगवेगळी आहेत.

संघात संधी नाकारली, सरफराज खानचं शतकाने उत्तर;
निवड समितीला दाखवली ताकद!

भारत-न्यूझीलंड कसोटी मालिकेसाठी भारतीय संघात स्थान न मिळाल्यानंतर सरफराज खानने रणजी ट्रॉफीमध्ये दमदार शतक झळकावले. मुंबईकडून खेळताना त्याने हिमाचल प्रदेशविरुद्ध ही कामगिरी केली. प्रथम श्रेणी क्रिकेटमधील हे त्याचे १८ वे शतक ठरले. सरफराजच्या खेळीमुळे मुंबईची धावसंख्या ४०० धावांच्या जवळ पोहोचली. याआधी त्याचा भाऊ मुशीर खानने ५७, तर सिद्धेश लाडने ८७ धावा केल्या. आता या कामगिरीनंतर सरफराजच्या भारतीय संघातील पुनरागमनाबाबत चाहत्यांमध्ये उत्सुकता आहे.

कुशल बद्रिकेच्या नाराजीनंतर अथर्व सुदामेचा मोठा निर्णय;
‘सुदाम्यांचे कांदेपोहे’ कार्यक्रमाची घोषणा! Top 15 News: 

मराठी अभिनेता कुशल बद्रिके आणि सोशल मीडिया इन्फ्लुएन्सर अथर्व सुदामे यांच्यातील कांदेपोह्यांचा किस्सा चर्चेत आला आहे. कुशलने व्हिडीओ शेअर करत अथर्वने घरी बोलावूनही कलाकारांना कांदेपोहे न दिल्याची तक्रार केली होती. त्यानंतर अथर्वने व्हिडीओ शेअर करत माफी मागितली आणि ‘सुदाम्यांचे कांदेपोहे’ या कार्यक्रमाची घोषणा केली. हा कार्यक्रम ९ नोव्हेंबरला पुण्यातील बालगंधर्व रंगमंदिरात होणार आहे. या दोघांच्या व्हिडीओमुळे हा प्रकार गंमतीशीर प्रमोशन असल्याचीही चर्चा सोशल मीडियावर रंगली आहे.