Tiger Shroff : मुंबईत जुहू परिसरातील पुष्पा पार्क येथे अभिनेता ‘टायगर श्रॉफ‘ आणि त्याच्या चालकावर अज्ञात हल्लेखोरांनी गोळीबार केल्याची अत्यंत खळबळजनक घटना समोर आली आहे. या अचानक झालेल्या हल्ल्यात अभिनेता टायगर श्रॉफ, त्याचा चालक आणि एक रिक्षाचालक जखमी झाल्याची प्राथमिक माहिती मिळाली आहे.

मिळालेल्या माहितीनुसार, तीन अनोळखी व्यक्ती दुचाकीवरून आले आणि त्यांनी अचानक टायगर श्रॉफवर गोळीबार केला. या हल्ल्याचे नेमके कारण अद्याप अस्पष्ट आहे. पोलिस आरोपींचा शोध सुरु केला असून, या गोळीबाराची जबाबदारी लॉरेन्स बिश्नोई गँगने घेतली असल्याची माहिती समोर आली आहे.

बॉलिवूडमध्ये आपल्या दमदार अ‍ॅक्शन, जबरदस्त स्टंट्स आणि फिटनेसच्या जोरावर स्वतःची वेगळी ओळख निर्माण करणारा अभिनेता म्हणजे टायगर श्रॉफ. प्रसिद्ध बॉलिवूड अभिनेते जॅकी श्रॉफ यांचा मुलगा आहे. टायगर श्रॉफ याने २०१४ मध्ये ‘हिरोपंती’ या चित्रपटातून हिंदी चित्रपटसृष्टीत पदार्पण केलं. या चित्रपटात त्याच्यासोबत अभिनेत्री क्रिती सेनॉन मुख्य भूमिकेत होती.

ही बातमी नक्की वाचा: Tiger Shroff : मोठी बातमी.! अभिनेता टायगर श्रॉफवर गोळीबार; 3 अज्ञात व्यक्तींकडून अभिनेत्यावर गोळीबार

पहिल्याच चित्रपटातून टायगरने आपल्या अभिनयाची, डान्सची आणि अ‍ॅक्शनची छाप प्रेक्षकांवर पाडली. या चित्रपटासाठी त्याला सर्वोत्कृष्ट पदार्पणाच्या पुरस्कारानेही गौरवण्यात आलं. यानंतर टायगरने ‘बागी’, ‘अ फ्लाइंग जट्ट’, ‘मुन्ना मायकेल’, ‘बागी २’, ‘स्टुडंट ऑफ द इयर २’, ‘वॉर’, ‘बागी ३’, ‘हिरोपंती २’ आणि ‘गणपत’ यांसारख्या चित्रपटांमध्ये काम केलं.

विशेषतः ‘बागी’ फ्रँचायझीमुळे त्याला अ‍ॅक्शन हिरो म्हणून मोठी लोकप्रियता मिळाली. २०१९ मध्ये प्रदर्शित झालेल्या ‘वॉर’ या चित्रपटात त्याने हृतिक रोशनसोबत काम केलं. या चित्रपटाला बॉक्स ऑफिसवर चांगलं यश मिळालं आणि टायगरच्या कारकिर्दीतील तो महत्त्वाचा चित्रपट ठरला.

टायगर श्रॉफची ओळख केवळ अभिनेता म्हणून मर्यादित नाही. तो एक उत्तम डान्सर असून मार्शल आर्ट्स आणि फिटनेससाठीही ओळखला जातो. चित्रपटांमधील अनेक कठीण स्टंट्स तो स्वतः करण्याला प्राधान्य देतो.

अ‍ॅक्शन, डान्स आणि शारीरिक कौशल्य यांच्या जोरावर त्याने बॉलिवूडमध्ये स्वतःचं वेगळं स्थान निर्माण केलं आहे. अनेक चढ-उतारांचा सामना करत टायगर आजही हिंदी चित्रपटसृष्टीत सक्रिय असून, त्याच्या आगामी चित्रपटांविषयी चाहत्यांमध्ये उत्सुकता असते.