Top-10 Sports News १. इशान किशनच्या नेतृत्वात ईस्ट झोन १३ वर्षांनंतर चॅम्पियन!

अखेर १३ वर्षांची प्रतीक्षा संपली. इशान किशनच्या ईस्ट झोनने साऊथ झोनला पाणी पाजत दुलीप ट्रॉफीचा किताब आपल्या नावावर केलाय. फायनल मॅच अनिर्णित सुटली खरी, पण पहिल्या डावातील मजबूत आघाडीच्या जोरावर ईस्ट झोनला थेट विजेता घोषित करण्यात आलं. कॅप्टन इशानने पहिल्या डावात २७० धावा कुटून विजयाचा पाया रचला होता. दुसऱ्या डावातही त्याने ८० धावा चोपल्या. त्याच्या वादळी बॅटिंगच्या जोरावर त्याला ‘प्लेअर ऑफ द मॅच’चा किताब मिळाला. विशेष म्हणजे कॅप्टन म्हणून इशानने आतापर्यंत एकही फर्स्ट क्लास सामना गमावलेला नाही.

२. संजू सॅमसनची मोठी घोषणा! यूपीएससीच्या विद्यार्थ्यांसाठी जाहीर केली खास स्कॉलरशिप

क्रिकेटच्या मैदानात षटकार ठोकणाऱ्या संजू सॅमसनने आता थेट विद्यार्थ्यांच्या मदतीसाठी हात पुढे करत सर्वांची मने जिंकून घेतली आहेत. संजूने यूपीएससी परीक्षेची तयारी करणाऱ्या होतकरू आणि आर्थिकदृष्ट्या गरजू विद्यार्थ्यांसाठी विशेष स्कॉलरशिपची घोषणा केली आहे. पैशांच्या अडचणीमुळे कोणत्याही हुशार मुलाचं आयएएस-आयपीएस होण्याचं स्वप्न अर्धवट राहू नये, हा यामागचा त्याचा मुख्य उद्देश आहे. या उपक्रमातून विद्यार्थ्यांना कोचिंग आणि अभ्यासाच्या खर्चात मोठी मदत मिळणार आहे.

३. बीसीसीआयच्या मनमानी कारभाराला सुप्रीम कोर्टाचा दणका! थेट विचारला जाब

बीसीसीआयच्या कारभाराचा विषय पुन्हा एकदा थेट सुप्रीम कोर्टात पोहोचलाय आणि कोर्टाने बोर्डाला चांगलाच पेचात पकडलंय. देशभरात ‘नॅशनल स्पोर्ट्स गव्हर्नन्स अ‍ॅक्ट २०२५’ लागू झाला असताना, बीसीसीआय आणि राज्य क्रिकेट संघटनांना यातून मोकळीक का, असा रोखठोक सवाल सरन्यायाधीश सूर्यकांत यांच्या खंडपीठाने विचारला आहे. क्रिकेट पदाधिकाऱ्यांच्या खुर्चीच्या नियमांवर बोट ठेवत कोर्टाने वकिलांना झापलं आणि म्हंटलं की, संघटनांकडून यावर स्पष्ट भूमिका काय ते नीट समजून सांगा.

४. नकाशावरून पेटला वाद: अफगाणिस्तानच्या प्रोमोत PoK भारतात दाखवल्यानं पाकिस्तान भडकला!

भारत-अफगाणिस्तान टी-२० मालिकेच्या एका प्रोमो व्हिडिओवरून चांगलाच वाद पेटलाय. अफगाणिस्तान क्रिकेट बोर्डाने शेअर केलेल्या व्हिडिओमध्ये पाकव्याप्त काश्मीर आणि गिलगिट-बाल्टिस्तान भारताच्या नकाशात दाखवण्यात आलं होतं. हे पाहताच पाकिस्तानात प्रचंड संताप उसळला आणि तिथल्या लोकांनी थेट पीसीबीकडे तक्रार करत कारवाईची मागणी केली. वाद अंगाशी येतोय हे पाहताच अफगाणिस्तान बोर्डाने तो वादग्रस्त व्हिडिओ तातडीने हटवला आणि त्याऐवजी नवा व्हिडिओ जारी केला. दरम्यान, १३ सप्टेंबरपासून सुरू होणारी ही मालिका दिल्लीच्या अरुण जेटली स्टेडियमवर खेळवली जाणार असून, कागदावर अफगाणिस्तानची ही ‘होम सीरिज’ असणार आहे.

५. गंभीरच्या लाडक्या हर्षित राणाला दुखापत; अफगाणिस्तान मालिकेसाठी विदर्भाच्या यश ठाकूरला लॉटरी!

भारत-अफगाणिस्तान टी-२० मालिकेआधी टीम इंडियात मोठा बदल झालाय. मुख्य प्रशिक्षक गौतम गंभीरचा लाडका गोलंदाज हर्षित राणा दुखापतीमुळे संघातून बाहेर पडला आहे. ७ सप्टेंबरला सराव करताना हर्षितच्या मांडीचा स्नायू दुखावला, त्यामुळे त्याला बाहेर बसावं लागलंय. निवडकर्त्यांनी फिटनेसच्या अटीवर राणाला संघात घेतलं होतं, पण हा डाव पुरता फसला. आता त्याच्या जागी विदर्भाच्या यश ठाकूरला संघात संधी मिळाली आहे. यशने जुलैमध्ये झिम्बाब्वेविरुद्ध पदार्पण करत दोन मॅचमध्ये चार विकेट्स घेतल्या होत्या. आता अफगाणिस्तानविरुद्धच्या मालिकेसह २०२६ च्या आशियाई क्रीडा स्पर्धेसाठीही यशची थेट भारतीय संघात एन्ट्री झाली आहे. पहिला टी-२० सामना १३ सप्टेंबरला दिल्लीत रंगणार आहे.

६. भारताचा मोठा विजय! ज्युनियर हॉकी आशिया कपमध्ये पाकिस्तानचा १९-० ने उडवला धुव्वा

चीनमध्ये सुरू असलेल्या ज्युनियर महिला हॉकी आशिया कप २०२६ च्या उपांत्यपूर्व फेरीत भारतीय संघाने पाकिस्तानला तब्बल १९-० ने नमवून थेट उपांत्य फेरीत धडक मारली आहे. सामन्याच्या ७ व्या मिनिटाला पूजा साहूने पहिला गोल करत खातं उघडलं, त्यानंतर भारतीय मुलींनी मैदानावर गोलचा पाऊस पाडला. मध्यांतरापर्यंत भारताने १०-० अशी मजबूत आघाडी घेतली होती, तर दुसऱ्या हाफमध्ये आणखी ९ गोल डागले. भारताकडून तब्बल १३ खेळाडूंनी गोल केले; यात पूजा मलिकने सर्वाधिक ३, तर रोशनी, सानिका, मधू आणि सुप्रिया यांनी प्रत्येकी २-२ गोल नोंदवले. पाकिस्तानला संपूर्ण सामन्यात एकही गोल करता आला नाही. सलग तिसऱ्यांदा विजेतेपद पटकावण्याच्या इराद्याने उतरलेली टीम इंडिया आता १२ सप्टेंबरला उपांत्य फेरीचा सामना खेळेल.

७. यूएस ओपनमध्ये सर्वात मोठा उलटफेर! बेन शेल्टनने गतविजेत्या अल्काराझला लोळवलं

यूएस ओपन २०२६ मध्ये टेनिस चाहत्यांना मोठा धक्का बसलाय. अमेरिकेच्या बेन शेल्टनने गतविजेत्या कार्लोस अल्काराझचा ५ सेट्सच्या थरारक मॅचमध्ये पराभव केला. तब्बल साडेचार तास चाललेल्या या मॅरेथॉन सामन्यात शेल्टनने जबरदस्त खेळ दाखवला. पहिला सेट अल्काराझने जिंकला खरा, पण नंतर शेल्टनने जोरदार मुसंडी मारत पुढचे दोन सेट खिशात घातले. चौथ्या सेटमध्ये अल्काराझने वापसी करत सामना २-२ असा बरोबरीत आणला. शेवटी निर्णायक पाचव्या सेटच्या टायब्रेकरमध्ये शेल्टनने बाजी मारली. या पराभवामुळे अल्काराझची सलग १८ सामन्यांची विजयी मालिका खंडित झाली असून शेल्टनने दिमाखात उपांत्य फेरीत प्रवेश केलाय.

८. ७२ वर्षांच्या माजी फुटबॉलपटूने २० वर्षांच्या तरुणीशी बांधली लग्न गाठ; सोशल मीडियावर एकच चर्चा!

मलेशियाचे दिग्गज माजी फुटबॉलपटू दातुक अब्दह अलिफ यांनी वयाच्या ७२ व्या वर्षी आयुष्याची नवी इनिंग सुरू केली आहे. त्यांनी अवघ्या २० वर्षांच्या तरुणीसोबत निकाह केला असून, दोघांमधील ५२ वर्षांच्या अंतरामुळे इंटरनेटवर ही बातमी वाऱ्यासारखी पसरली आहे. २७ ऑगस्टला मोजक्या लोकांच्या उपस्थितीत हा सोहळा पार पडला.
अब्दह यांचे भाऊ युनूस यांनी, दोन्ही कुटुंबांच्या सहमतीने हे लग्न झाल्याचं सांगितलं. सध्या हे नवदाम्पत्य हनीमूनवर आहे. १९८० च्या मॉस्को ऑलिम्पिक संघात खेळलेले अब्दह बऱ्याच वर्षांनंतर आपल्या या आगळ्यावेगळ्या लग्नामुळे पुन्हा एकदा भलतेच चर्चेत आलेत.

९. सात्विक-चिरागचा चायनात नादच खुळा! थरारक फायनल जिंकून पटकावलं चायना मास्टर्स चषक

भारताच्या सात्विक आणि चिरागच्या जोडीने चायना मास्टर्स २०२६ च्या फायनलमध्ये चीनच्या जोडीला त्यांच्याच घरात पाणी पाजलं! सुरुवातीला पहिला गेम ११-२१ असा गमावल्यानंतर वाटलं सामना हातून गेला. पण पठ्ठ्यांनी हार मानली नाही. दुसऱ्या गेममध्ये चिरागचे कडक स्मॅश आणि सात्विकच्या भन्नाट खेळाने २१-१३ अशी जोरदार मुसंडी मारली. तिसऱ्या निर्णायक गेममध्ये १७-१७ असा श्वास रोखून धरणारा थरार रंगला होता. मात्र, मोक्याच्या क्षणी सात्विक-चिरागने डोकं शांत ठेवत सलग ४ पॉईंट्स घेतले आणि २१-१७ ने गेम खिशात टाकला. या विजयासह या स्टार जोडीने कारकिर्दीतलं १० वं बीडब्ल्यूएफ जेतेपद पटकावत तिरंगा डौलाने फडकवला!

१०. शफाली वर्माला डिवचणं पाकच्या कॅप्टनला भोवलं; आयसीसीने केली कारवाई!

भारताविरुद्धच्या सामन्यात मानहानिकारक पराभव झाल्यानंतर पाकिस्तानची कॅप्टन फातिमा सना हिच्या अडचणी चांगल्याच वाढल्या आहेत. भारतीय ओपनर शफाली वर्माला आऊट केल्यानंतर फातिमाने पॅव्हेलियनमध्ये जाण्याचा आक्रमक आणि असभ्य इशारा केला होता. या चिथावणीखोर वर्तनामुळे आयसीसीने तिच्यावर मॅच फीच्या १० टक्के दंड ठोठावला असून १ डिमेरिट पॉइंटही दिला आहे. फातिमाने आपली चूक कबूल केली आहे. गेल्या २४ महिन्यांत तिच्या खात्यात जमा झालेला हा दुसरा डिमेरिट पॉइंट ठरला. आयसीसीच्या नियमांनुसार, २४ महिन्यांत ४ डिमेरिट पॉइंट झाले तर खेळाडूवर बंदी येते. त्यामुळे फातिमाने पुन्हा अशी आगाऊपणाची चूक केली, तर तिला थेट मॅचमधून बाहेर बसावं लागेल.