Top 10 Sports News :

1. आयपीएलच्या संघांची ब्रँड व्हॅल्यू जाहीर ! 
मुंबई इंडियन्स ठरला सर्वात महागडा संघ

पाच वेळा चॅम्पियन ठरलेला मुंबई इंडियन्स संघ आयपीएलच्या इतिहासातील सर्वात मूल्यवान संघ बनला आहे. ‘स्पोर्टिको’च्या २०२६ च्या अहवालानुसार, मुंबई इंडियन्सचे एकूण मूल्य २.१ अब्ज डॉलर्स म्हणजेच तब्बल २० हजार कोटी रुपयांच्या पार गेले आहे. या शर्यतीत मुंबईने आरसीबी (१७ हजार कोटी) आणि चेन्नई सुपर किंग्सला (१६,५०० कोटी) मागे टाकले आहे. मुकेश अंबानींच्या रिलायन्स इंडस्ट्रीजने २००८ मध्ये ही फ्रँचायझी १११.९ दशलक्ष डॉलर्समध्ये खरेदी केली होती. आज तिच्या मूल्यात तब्बल १९ पटीने वाढ झाली आहे. संपूर्ण आयपीएलचे एकत्रित मूल्य आता १७ अब्ज डॉलर्सवर पोहोचले आहे.

2. उमा काश्वीने रचला इतिहास !
ठरली WPLमधील सर्वात तरुण खेळाडू

महिला प्रीमियर लीग २०२७ च्या मिनी लिलावात भारतीय क्रिकेटमधील एका नव्या प्रतिभावान चेहऱ्याने इतिहास रचला आहे. कोच्ची येथे पार पडलेल्या या लिलावात दिल्ली कॅपिटल्स संघाने अखेरच्या क्षणी बोली लावत कर्नाटकच्या १५ वर्षीय अष्टपैलू उमा काश्वी हिला १० लाख रुपयांच्या मूळ किमतीत आपल्या ताफ्यात दाखल केले. या करारासह उमा काश्वी महिला प्रीमियर लीगच्या इतिहासातील सर्वात तरुण खेळाडू ठरली आहे. तिच्या या अनपेक्षित निवडीने क्रिकेट जगताचे लक्ष वेधून घेतले आहे.

3. सोफी मोलिन्यू ठरली सर्वात महागडी खेळाडू
मिनी लिलावात युपी वॉरियर्सचा डंका

महिला प्रीमियर लीग २०२७ चा मिनी लिलाव काही दिवसांपूर्वी पार पडला. या लिलावात ऑस्ट्रेलियन महिला संघाला विश्वचषक जिंकून देणारी स्टार कर्णधार सोफी मोलिन्यू या लिलावात सर्वात महागडी खेळाडू ठरली. ५० लाख रुपयांच्या बेस प्राईसवर असलेल्या सोफीला युपी वॉरियर्स संघाने तब्बल १.१ कोटी रुपये मोजून आपल्या ताफ्यात दाखल केले. आरसीबीनेही तिच्यावर मोठा डाव लावला होता, मात्र अखेर युपीने बाजी मारली. (Top 10 Sports News) 

4. CSK मध्ये मोठे फेरबदल!
पाच दिग्गजांचा टीमला रामराम

आयपीएलच्या आगामी हंगामापूर्वी चेन्नई सुपर किंग्स संघात मोठे बदल पाहायला मिळत आहेत. चेन्नई सुपर किंग्सने देखील आपल्या कोचिंग स्टाफमधील पाच सदस्यांना निरोप दिला आहे. संघाच्या सोशल मीडिया अकाउंटवरून याबाबत माहिती देण्यात आली आहे. यामध्ये फलंदाजी प्रशिक्षक मायकेल हसी, गोलंदाजी प्रशिक्षक एरिक सिमन्स, सहाय्यक प्रशिक्षक राजीव कुमार, फिजिओ टॉमी सिमसेक आणि स्ट्रेंथ अँड कंडिशनिंग कोच ग्रेग किंग यांचा समावेश आहे.

5. पी. व्ही. सिंधूचे स्वप्न भंगलं
फ्रेंच ओपन जेतेपदाच्या सामन्यात आन से यंगकडून पराभव

भारताची दोन वेळची ऑलिम्पिक पदक विजेती स्टार बॅडमिंटनपटू पी. व्ही. सिंधू हिचे फ्रेंच ओपन सुपर ७५० स्पर्धेचे जेतेपद पटकावण्याचे स्वप्न अखेर अधुरे राहिले. अ‍ॅरिना ग्रँड पॅरिस येथे खेळल्या गेलेल्या महिला एकेरीच्या हायव्होल्टेज अंतिम सामन्यात सिंधूला दक्षिण कोरियाच्या जागतिक क्रमवारीत अव्वल स्थानी असलेल्या आन से यंग हिच्याकडून २१-१६, ११-२१, १२-२१ असा तीन गेमच्या चुरशीच्या लढतीत पराभव पत्करावा लागला. या पराभवामुळे १९९८ नंतर फ्रेंच ओपन स्पर्धा जिंकणारी पहिली भारतीय महिला खेळाडू बनण्याची सुवर्णसंधी सिंधूच्या हातातून निसटली.

6. मैदानावर पुन्हा पेटणार भारत-पाक युद्ध!
आशिया कपचे वेळापत्रक जाहीर

आशियाई क्रिकेट परिषदेने ‘मेन्स आशिया कप रायझिंग स्टार्स २०२६’ स्पर्धेचे अधिकृत वेळापत्रक जाहीर केले आहे. ही बहुप्रतिक्षित स्पर्धा कतारची राजधानी दोहा येथे रंगणार असून, आठ देशांच्या युवा संघांमध्ये विजेतेपदासाठी चुरस पाहायला मिळेल. क्रिकेट चाहत्यांसाठी आनंदाची बातमी म्हणजे यंदाही पारंपारिक प्रतिस्पर्धी भारत ‘अ’ आणि पाकिस्तान ‘अ’ या दोन्ही संघांना एकाच गटात ठेवण्यात आले आहे. २२ नोव्हेंबर रोजी वेस्ट एंड पार्क आंतरराष्ट्रीय क्रिकेट स्टेडियमवर भारत ‘अ’ आणि पाकिस्तान ‘अ’ यांच्यात थरारक महामुकाबला रंगणार आहे.

7. जपानमध्ये भारतीय पॅरा खेळाडूंनी रचला इतिहास!
११४ पदकांसह मोडला आधीचा राष्ट्रीय विक्रम

जपानमधील आयची-नागोया येथे पार पडलेल्या पॅरा आशियाई क्रीडा स्पर्धा २०२६ मध्ये भारतीय खेळाडूंनी अद्भूत कामगिरी करत नवा इतिहास रचला आहे. भारताने स्पर्धेत तब्बल ११४ पदकांची ऐतिहासिक कमाई करत देशाच्या पॅरा क्रीडा इतिहासातील आतापर्यंतचे सर्वोत्तम प्रदर्शन केले. आंतरराष्ट्रीय पातळीवर दाखवलेली ही सरस कामगिरी भारतीय पॅरा क्रीडा विश्वाची ताकद अधोरेखित करणारी ठरली आहे.

8. सोलापूरकर किरण नवगिरेवर मोठी बोली!
दिल्ली कॅपिटल्सच्या संघात दाखल

महिला प्रीमियर लीग २०२७ च्या मिनी लिलावात सोलापूरची आक्रमक फलंदाज किरण नवगिरे हिच्यावर अपेक्षेप्रमाणे जोरदार बोली लागली. तिला आपल्या ताफ्यात घेण्यासाठी मुंबई इंडियन्स आणि दिल्ली कॅपिटल्स यांच्यात जबरदस्त चुरस पाहायला मिळाली. यामध्ये दिल्ली कॅपिटल्सने ७५ लाख रुपयांची अंतिम बोली लावत बाजी मारली आणि या स्फोटक बॅटरला आपल्या संघात समाविष्ट केले. (Top 10 Sports News) 

9. आंतरराष्ट्रीय टी-२० क्रमवारी जाहीर
अभिषेक शर्मा बनला जगातील नंबर १ फलंदाज

भारतीय क्रिकेट संघाचा युवा सलामीवीर अभिषेक शर्मा याने आंतरराष्ट्रीय क्रिकेट परिषदेच्या ताज्या टी-२० क्रमवारीत ऐतिहासिक झेप घेत जागतिक अव्वल स्थान पटकावले आहे. त्याने भारताचाच सहकारी इशान किशनला मागे टाकले आहे. दुखापतीमुळे न्यूझीलंडविरुद्धचे सामने खेळू न शिकल्याने ईशान किशनला याचा फटका बसला आहे. ताज्या फलंदाजी क्रमवारीत भारताचे चार फलंदाज अव्वल दहाच्या यादीत आपले स्थान टिकवून आहेत.

10. फाफ डू प्लेसिसचा महेंद्रसिंग धोनीच्या बाबत मोठा खुलासा !
उलगडला IPL मधील कटू इतिहास

आयपीएलच्या इतिहासातील सर्वात यशस्वी कर्णधारांपैकी एक असलेल्या महेंद्रसिंग धोनीला २०१६ च्या हंगामानंतर रायझिंग पुणे सुपरजायंट्सच्या कर्णधारपदावरून अचानक काढून टाकण्यात आले होते असा खुलासा दक्षिण आफ्रिकेचा माजी कर्णधार फाफ डू प्लेसिस याने केला आहे. त्यावेळी या निर्णयाने ड्रेसिंग रूममधील सर्वच खेळाडू थक्क झाले होते, असे डू प्लेसिसने स्पष्ट केले. (Top 10 Sports News)