Top-10 Sports News 

1. ‘माझ्याकडे आजही चॅट्सचे पुरावे आहेत!’ खुशी मुखर्जीचा सूर्यकुमार यादववर नवा बॉम्ब

बोल्ड फॅशन सेन्समुळे चर्चेत राहणारी अभिनेत्री खुशी मुखर्जीने भारतीय क्रिकेट संघाचा माजी टी-२० कर्णधार सूर्यकुमार यादवसोबतच्या जुन्या चॅट वादावर अखेर मौन सोडले आहे. सूर्यकुमार यादवची प्रतिमा मलीन करण्याचा प्रयत्न करत असल्याचा आरोप करत ट्रोल करणाऱ्यांना खुशीने थेट उत्तर दिले आहे. “मी कोणतीही खोटी विधाने केलेली नाहीत. माझ्याकडे आजही त्या सर्व संभाषणांचे (चॅट्स) ठोस पुरावे सुरक्षित आहेत; पण मी ते आजवर सार्वजनिक केलेले नाहीत.” हे संभाषण त्या काळातील आहे जेव्हा सूर्यकुमार केवळ आयपीएल खेळत होता आणि त्याने भारतीय संघात आंतरराष्ट्रीय पदार्पणही केले नव्हते असा खुलासा तिने केलाय.

2. मिनी ऑक्शन मायदेशातच होणार; आयपीएल २०२७ च्या लिलावाबाबत बीसीसीआयचा मोठा निर्णय!

जगातील सर्वात लोकप्रिय आणि श्रीमंत क्रिकेट लीग असलेल्या इंडियन प्रीमियर लीग २०२७ च्या आगामी हंगामाची जोरदार तयारी सुरू झाली आहे. या पार्श्वभूमीवर BCCI ने खेळाडूंच्या मिनी लिलावाबाबत मोठा निर्णय घेतला आहे. गेल्या काही हंगामांपासून परदेशात आयोजित होणारा हा लिलाव यावेळी परदेशात नव्हे, तर भारतातच आयोजित केला जाणार आहे. १५ सप्टेंबर रोजी पार पडलेल्या आयपीएल गव्हर्निंग कौन्सिलच्या बैठकीत हा महत्त्वपूर्ण निर्णय घेण्यात आला आहे.

3. वेस्ट इंडिजविरुद्धच्या मालिकेसाठी टीम इंडियाची घोषणा! रोहित-विराटची वापसी अन् वैभवला मोठी संधी

वेस्ट इंडिजविरुद्ध मायदेशात होणाऱ्या मर्यादित षटकांच्या मालिकेसाठी बीसीसीआयच्या निवड समितीने भारतीय संघाची घोषणा केलीय. आगामी एकदिवसीय आणि टी-२० मालिकांसाठी निवडकर्त्यांनी दोन स्वतंत्र संघ निवडले आहेत. वनडे मालिकेचे कर्णधारपद शुबमन गिलकडे सोपवण्यात आले असून वरिष्ठ फलंदाज रोहित शर्मा आणि विराट कोहली संघात कायम आहेत. तर दुसरीकडे, टी-२० मालिकेची कमान श्रेयस अय्यरकडे देण्यात आली असून युवा फलंदाज वैभव सूर्यवंशीला संघात स्थान मिळाले आहे. (Top-10 Sports News) 

4. लग्नाचा मुहूर्त ठरला! रिंकू सिंह अन् प्रिया सरोज ४ डिसेंबर रोजी अडकणार विवाहबंधनात

भारतीय क्रिकेटपटू रिंकू सिंह आणि उत्तर प्रदेशातील मछलीशहर लोकसभा मतदारसंघाच्या समाजवादी पक्षाच्या खासदार प्रिया सरोज यांच्या चाहत्यांसाठी आनंदाची बातमी समोर आली आहे. लखनौ येथील रमाडा हॉटेलमध्ये दोघांचा विवाह सोहळा पार पडणार आहे. दोघेही ४ डिसेंबर २०२६ रोजी विवाहबद्ध होणार आहेत. या विवाहासाठी राजकीय, प्रशासकीय तसेच क्रिकेट विश्वातील अनेक मान्यवरांना आमंत्रित करण्यात येणार असल्याचे समजत आहे.

5. ऋषभ पंतची ‘रेस्ट ऑफ इंडिया’ च्या कर्णधारपदी नियुक्ती; १ ऑक्टोबरपासून रंगणार महासंग्राम

बीसीसीआयने ऐतिहासिक इराणी चषक २०२६ सामन्यासाठी पंतची ‘रेस्ट ऑफ इंडिया’ संघाच्या कर्णधारपदी नियुक्ती केली आहे. त्याच्या जोडीला मुंबईचा आक्रमक फलंदाज सर्फराझ खानकडे उपकर्णधारपदाची जबाबदारी देण्यात आली आहे. हा प्रतिष्ठेचा सामना १ ते ५ ऑक्टोबर दरम्यान श्रीनगरच्या शेर-ए-काश्मीर स्टेडियमवर रणजी चॅम्पियन जम्मू-काश्मीरविरुद्ध खेळवला जाणार आहे. ऋषभ पंतसाठी स्वतःचा फॉर्म आणि फिटनेस सिद्ध करण्यासाठी हा सामना महत्वाचा असणार आहे.

6. महिला आशियाई क्रीडा स्पर्धा २०२६ ला सुरुवात; बांगलादेश महिला संघाची थेट उपांत्य फेरीत धडक

महिला आशियाई क्रीडा स्पर्धा २०२६ मधील क्रिकेटच्या थराराला आजपासून सुरुवात झाली आहे. पहिल्याच दिवशी पावसाने जोरदार हजेरी लावली. बांगलादेश आणि चीन यांच्यातील पहिला उपांत्यपूर्व सामना मुसळधार पावसामुळे रद्द करण्यात आला. सामना रद्द झाल्यानंतरही बांगलादेश महिला संघाने थेट उपांत्य फेरीत धडक मारलीय. आयसीसी क्रमवारीत बांगलादेशचा संघ चीनपेक्षा खूप पुढे असल्यामुळे नियमानुसार सरस क्रमवारीच्या जोरावर बांगलादेशला थेट सेमीफायनलचे तिकीट बहाल करण्यात आलंय.

7. ‘भारतासाठी पुन्हा खेळायला आवडेल, पण…; पुनरागमनाबाबत भुवनेश्वर कुमारचं मोठं वक्तव्य

भारताचा अनुभवी वेगवान गोलंदाज भुवनेश्वर कुमार पुन्हा एकदा जोरदार चर्चेत आलाय. प्रदीर्घ काळानंतर आपल्या मनातील खंत, संघातून बाहेर पडतानाचा धक्का आणि पुनरागमनाची तीव्र इच्छा यावर उघडपणे भाष्य केलंय. “मी आता मैदानावर स्वतःला सिद्ध करण्यासाठी खेळत नाही. मी कारकिर्दीच्या अशा टप्प्यावर आहे जिथे संघातून वगळले तरी माझ्यावर कोणताही मानसिक परिणाम होणार नाही. पण हो, भारताची निळी जर्सी घालून पुन्हा एकदा देशासाठी मैदानात उतरायला मला नक्कीच आवडेल.”

8. टेनिसपटू अलेक्झांडर झ्वेरेव्हने पटकावले यूएस ओपन २०२६ चे जेतेपद; अमेरिकन चाहत्यांचे स्वप्न पुन्हा भंगले

जर्मनीचा अव्वल टेनिसपटू अलेक्झांडर झ्वेरेव्हने आपल्या कारकिर्दीतील सुवर्णकाळ सुरू ठेवत यूएस ओपन २०२६ चे पुरुष एकेरीचे जेतेपद पटकावले आहे. न्यूयॉर्कमध्ये रंगलेल्या अंतिम सामन्यात झ्वेरेव्हने २३ वर्षीय बेन शेल्टनचा ६-३, ७-६ (२), ५-७, ६-२ असा चार सेटच्या लढतीत पराभव केला. त्यामुळे अमेरिकन चाहत्यांचे स्वप्न पुन्हा एकदा भंगले आहे. २००३ मध्ये अँडी रॉडिकनंतर अमेरिकेचा कोणताही पुरुष खेळाडू ग्रँड स्लॅम जिंकू शकलेला नाही; शेल्टनच्या पराभवाने अमेरिकेची ही २३ वर्षांची प्रदीर्घ प्रतीक्षा कायम राहिली आहे. (Top-10 Sports News) 

9. भारताच्या लेकींनी चीनमध्ये फडकवला तिरंगा! यजमान चीनला धूळ चारत सलग तिसऱ्यांदा आशिया चषकावर कोरलं नाव

भारतीय कनिष्ठ महिला हॉकी संघाने चीनच्या हुलुनबुइर शहरात अद्वितीय पराक्रम गाजवत नवा इतिहास लिहिलाय. ‘एएचएफ महिला ज्युनिअर आशिया चषक २०२६’ स्पर्धेच्या अत्यंत अटीतटीच्या अंतिम सामन्यात भारताने यजमान चीनचा १-० असा पराभव केलाय. या रोमहर्षक विजयासह भारतीय संघाने सलग तिसऱ्यांदा ज्युनिअर आशिया चषकावर आपले नाव कोरत जेतेपदाची ऐतिहासिक हॅटट्रिक पूर्ण केली. तसेच या विजयामुळे भारताने आगामी ‘एफआयएच’ महिला ज्युनिअर हॉकी विश्वचषकाचे तिकीटही निश्चित केले आहे.

10. आशिया कप जिंकला, पण ट्रॉफी स्विकारण्यास नकार; टीम इंडिया पुरस्कार सोहळ्यातून बाहेर पडून ड्रेसिंग रूमकडे रवाना

दुबईच्या मैदानावर भारतीय महिला क्रिकेट संघाने दमदार कामगिरी करत महिला आशिया चषक २०२६च्या जेतेपदावर आपले नाव कोरले. सामन्यानंतर पार पडणाऱ्या पुरस्कार वितरण सोहळ्यामध्ये हायव्होल्टेज ड्रामा पाहायला मिळाला. आशियाई क्रिकेट परिषदेचे प्रमुख आणि पाकिस्तान क्रिकेट बोर्डाचे अध्यक्ष मोहसीन नक्वी यांच्या हस्ते विजेत्या भारतीय संघाला ट्रॉफी प्रदान करण्यात येणार होती. मात्र, भारतीय खेळाडूंनी त्यांच्या हस्ते ट्रॉफी स्वीकारण्यास नकार दिला. त्यानंतर टीम इंडिया पुरस्कार सोहळ्यातून बाहेर पडून ड्रेसिंग रूमकडे रवाना झाली. (Top-10 Sports News)