Top 10 News : १) फडणवीस-नार्वेकरांसोबत जयंत पाटलांचा विमान प्रवास; राजकीय चर्चांना उधाण

महाराष्ट्राच्या राजकारणात पुन्हा एकदा चर्चांना उधाण आणणारी घडामोड समोर आलीय. मुख्यमंत्री देवेंद्र फडणवीस, विधानसभा अध्यक्ष राहुल नार्वेकर आणि शरद पवार गटाचे आमदार जयंत पाटील यांनी मुंबई ते कोल्हापूर असा एकत्रित विमान प्रवास केल्याची माहिती मिळतेय. मुख्यमंत्री फडणवीस आज कोल्हापूर आणि सांगली दौऱ्यावर असून, त्यासाठी त्यांनी मुंबईहून कोल्हापूरकडे प्रस्थान केले. याच विमानातून राहुल नार्वेकर आणि जयंत पाटील यांनीही प्रवास केला. जयंत पाटील हे त्यांच्या इस्लामपूर मतदारसंघाकडे जात होते. सत्ताधारी आणि विरोधी पक्षातील प्रमुख नेते एकाच विमानातून प्रवास करत असल्याचे समोर आल्यानंतर राजकीय चर्चांना उधाण आलेय. (Top 10 News)

२) बारामतीत पुन्हा शिकाऊ विमान कोसळलं; लँडिंगवेळी थरार

बारामती विमानतळ परिसरात पुन्हा एकदा शिकाऊ विमानाचा अपघात झाल्याने मोठी खळबळ उडालीय. दुपारी सुमारे १२ वाजून ३५ मिनिटांनी विमान लँडिंग करत असताना धावपट्टीजवळ कोसळल्याची घटना घडलीय. हे विमान बारामतीतील विमान प्रशिक्षण केंद्रातील असल्याचे सांगितले जातेय. या दुर्घटनेत पायलट किरकोळ जखमी झाला असून सुदैवाने कोणतीही जीवितहानी झालेली नाही. अपघाताचा थरारक व्हिडीओही समोर आलाय. घटनेची माहिती मिळताच संबंधित यंत्रणा घटनास्थळी दाखल झाली असून अपघाताचे नेमके कारण शोधण्यासाठी तपास सुरू करण्यात येणार आहे. विशेष म्हणजे, बारामती परिसरात यापूर्वीही शिकाऊ विमानांचे अपघात झाले आहेत. १३ मे २०२६ रोजीही येथे प्रशिक्षणार्थी विमान कोसळले होते. त्यामुळे वारंवार होणाऱ्या या दुर्घटनांमुळे विमान प्रशिक्षण केंद्रांच्या सुरक्षेचा प्रश्न पुन्हा ऐरणीवर आलाय. (Top 10 News)

३) पुण्यात पोलिसांचा पबवर छापा; ८० ते १०० तरुण-तरुणी ताब्यात

पुण्यात रात्री उशिरापर्यंत सुरू असलेल्या पार्टीवर गुन्हे शाखेने मोठी कारवाई केलीय. विमानतळ परिसरातील ‘द हौज कम्युन’ या पबवर रविवारी पहाटे तीनच्या सुमारास पोलिसांनी अचानक छापा टाकला. प्रशासनाच्या नियमानुसार पब रात्री दीड वाजेपर्यंतच सुरू ठेवण्याची परवानगी असताना, तो पहाटे तीन वाजेपर्यंत सुरू असल्याचे पोलिसांच्या निदर्शनास आले. कारवाईच्या वेळी पबच्या डान्स फ्लोअरवर सुमारे ८० ते १०० तरुण-तरुणी पार्टी करताना आढळून आले. पोलिसांनी त्यांना ताब्यात घेऊन चौकशी सुरू केलीय. नियमांचे उल्लंघन केल्याप्रकरणी पबचालक आणि व्यवस्थापकाविरोधात गुन्हा दाखल करण्याची प्रक्रिया सुरू आहे. तसेच पबला दारू विक्रीचा अधिकृत परवाना होता का आणि परवानगीची वेळ संपल्यानंतरही पब कोणाच्या परवानगीने सुरू होता, याचा तपासही पोलीस करत आहेत. (Top 10 News)

४) भाजप आमदार फेसबुक लाईव्हवर ढसाढसा रडले; VIDEO व्हायरल

उत्तर प्रदेशातील सीतापूर जिल्ह्यातील सेउता मतदारसंघाचे भाजप आमदार ज्ञान तिवारी फेसबुक लाईव्हदरम्यान मुलीसोबत ढसाढसा रडताना दिसले. त्यांच्या मुलीचे २०२४ मध्ये अनुज त्रिवेदी याच्याशी लग्न झाले होते. मात्र, या व्यक्तीने कथितरित्या वेगवेगळ्या नावांचा वापर करून अनेक तरुणींशी लग्न केल्याचा धक्कादायक आरोप आमदारानी केलाय. तब्बल २५ महिलांची फसवणूक केल्याचा दावा त्यांनी केला असून, या प्रकरणाची चौकशी करून आरोपीवर कठोर कारवाई करण्याची मागणी केलीय. आमदारांनी आपण या प्रकरणी एफआयआर दाखल करणार असल्याचे सांगितले. “मी आमदार म्हणून नाही, तर एक वडील म्हणून बोलत आहे,” असे म्हणताना ते भावुक झाले. मुलगी डॉक्टर असून स्वावलंबी असल्याचे सांगत, तिच्या पाठीशी आयुष्यभर उभे राहण्याचा निर्धारही त्यांनी व्यक्त केला. (Top 10 News)

५) बंगालमध्ये खळबळ! ममता बॅनर्जींच्या ताफ्यावर चिखलफेक, चप्पल-बॉटल भिरकावल्या

पश्चिम बंगालच्या माजी मुख्यमंत्री ममता बॅनर्जी यांच्या ताफ्यावर हल्ला झाल्याची धक्कादायक घटना समोर आलीय. उत्तर २४ परगणा जिल्ह्यातील हलिशहर येथे दौऱ्यावर असताना संतप्त गर्दीने त्यांच्या ताफ्याला घेराव घातला. ममता बॅनर्जी एका मृत तृणमूल काँग्रेस कार्यकर्त्याच्या कुटुंबीयांची भेट घेण्यासाठी गेल्या होत्या. यावेळी जमावाने त्यांच्या कारच्या दिशेने चिखलफेक केली, तसेच पाण्याच्या बाटल्या आणि चप्पलाही भिरकावल्याचा दावा करण्यात आलाय. संतप्त नागरिकांनी ममता बॅनर्जी यांच्या विरोधात घोषणाबाजीही केली. परिस्थिती चिघळत असल्याचे पाहून पोलिसांनी तातडीने हस्तक्षेप करत ममता बॅनर्जी यांना सुरक्षित ठिकाणी हलवले. या घटनेनंतर ममता बॅनर्जी यांनी पोलिसांच्या भूमिकेवर गंभीर आरोप केलेत. “माझ्या आयुष्यात असा हल्ला कधीच पाहिला नाही,” असे म्हणत त्यांनी पोलिस भाजपच्या लोकांना संरक्षण देत असल्याचा आरोप केलाय. (Top 10 News)

६) SBI मध्ये १५०० हून अधिक पदांवर भरती; अर्जासाठी ‘ही’ शेवटची तारीख!

बँकेत सरकारी नोकरीच्या शोधात असलेल्या तरुणांसाठी मोठी संधी आहे. स्टेट बँक ऑफ इंडिया (SBI) ने ज्युनिअर असोसिएट अर्थात क्लर्क पदांच्या १,५३८ जागांसाठी भरती जाहीर केलीय. या भरतीसाठी ऑनलाइन अर्ज प्रक्रिया ७ ऑगस्टपासून सुरू झाली असून, अर्ज करण्याची अंतिम तारीख २७ ऑगस्ट २०२६ आहे. उमेदवाराकडे मान्यताप्राप्त विद्यापीठाची पदवी असणे आवश्यक आहे. अंतिम वर्षातील विद्यार्थीही ठरावीक अटींसह अर्ज करू शकतात. उमेदवाराचे वय २१ ते २८ वर्षांदरम्यान असावे. निवड झालेल्या उमेदवारांना २४ हजार ५० ते ६४ हजार ४८० रुपयांपर्यंत वेतन मिळू शकते. निवड प्रक्रिया प्रिलिम्स, मेन्स परीक्षा आणि स्थानिक भाषा प्रावीण्य चाचणीद्वारे होणार आहे. सामान्य आणि ओबीसी उमेदवारांसाठी अर्ज शुल्क ७५० रुपये, तर काही आरक्षित प्रवर्गांसाठी शुल्क माफ आहे. महाराष्ट्रात या भरतीत १६५ जागा उपलब्ध आहेत. (Top 10 News)

७) Tata Motors चा मेगा प्लॅन! बाजारात धुमाकूळ घालण्यासाठी येत आहेत 5 हायटेक कार्स

टाटा मोटर्स आगामी काळात भारतीय ऑटोमोबाईल बाजारात मोठा धमाका करण्याच्या तयारीत आहे. कंपनीकडून पाच नवीन आणि अपडेटेड कार्स आणल्या जाण्याची शक्यता आहे. यामध्ये नवीन नेक्सॉन व्हेरिएंट, सफारी EV, टिगोर फेसलिफ्ट, पंच फ्लेक्स-फ्युएल आणि Avinya X या मॉडेल्सचा समावेश आहे. नवीन नेक्सॉन पेट्रोल आणि CNG पर्यायांमध्ये अधिक फीचर्ससह येऊ शकते. तर सफारी EV ही टाटाची पहिली 7-सीटर इलेक्ट्रिक SUV असणार असून, तिची रेंज 550 ते 600 किलोमीटरपर्यंत असण्याची शक्यता आहे. टिगोर फेसलिफ्ट पेट्रोल, CNG आणि EV पर्यायांत येऊ शकते. पंच फ्लेक्स-फ्युएल E85 इंधनावर धावण्यास सक्षम असेल. तर Avinya Xच्या माध्यमातून टाटा प्रीमियम इलेक्ट्रिक SUV सेगमेंटमध्ये प्रवेश मजबूत करणार आहे. त्यामुळे आगामी काळात टाटा मोटर्सच्या कारची रेंज अधिक आधुनिक आणि पर्यावरणपूरक होणार आहे. (Top 10 News)

८) फोन घेण्याचा विचार करताय? आताच घ्या! iPhoneसह Android फोनवरही बंपर ऑफर्स

फ्लिपकार्टच्या Freedom Saleमध्ये स्मार्टफोन खरेदी करणाऱ्या ग्राहकांसाठी अनेक मोठ्या ऑफर्स उपलब्ध आहेत. iPhone 17 प्रभावी किंमतीत ₹79,900, तर iPhone 16 ₹61,999 मध्ये मिळत आहे. स्लिम डिझाइनसाठी प्रसिद्ध iPhone Airची प्रभावी किंमत ₹97,900 असून, iPhone 17 Pro ₹1,22,900 आणि 17 Pro Max ₹1,37,900 मध्ये उपलब्ध असल्याचे सांगण्यात आलेय. Android फोनवरही मोठ्या सवलती मिळत आहेत. Nothing Phone 4a ₹37,999, तर Phone 4a Pro ₹43,999 मध्ये खरेदी करता येईल. नुकताच लॉन्च झालेला Nothing Phone 4b ₹30,999 मध्ये उपलब्ध आहे. याशिवाय Oppo K14x ₹16,499, Oppo K14 ₹18,999 आणि Vivo X200T 12GB+512GB बँक ऑफरसह ₹62,999 मध्ये मिळत आहे. त्यामुळे फोन खरेदी करण्याचा विचार असेल तर Freedom Saleमधील ऑफर्स नक्की तपासा. (Top 10 News)

९) मला अक्षरशः बिघडवलंय.! ‘टॉक्सिक’मधील इंटिमेट सीन्सवर कियाराचं स्पष्ट उत्तर

‘KGF’ स्टार यशचा बहुप्रतिक्षित ‘टॉक्सिक : अ फेरी टेल फॉर ग्रोन-अप्स’ चित्रपट सध्या चर्चेत आहे. ८ ऑगस्टला बेंगळुरूमध्ये चित्रपटाचा ट्रेलर लाँच करण्यात आला. यावेळी अभिनेत्री कियारा अडवाणीने तिच्या भूमिकेबद्दल आणि चित्रपटातील इंटिमेट सीन्सवर झालेल्या ट्रोलिंगवर भाष्य केलं. कियारा म्हणाली की, दिग्दर्शिका गीतू मोहनदास आणि यश यांनी सुरुवातीपासूनच तिला ‘नादिया’च्या भूमिकेसाठी योग्य मानलं आणि तिच्यावर विश्वास ठेवला. या भूमिकेमुळे अभिनेत्री म्हणून स्वतःला वेगळ्या पद्धतीने सादर करण्याची संधी मिळाल्याचंही तिने सांगितलं. इंटिमेट सीन्सबाबत बोलताना कियारा म्हणाली, “यश आणि गीतू यांनी मला अक्षरशः बिघडवलं आहे.” तिच्या या वक्तव्याची सोशल मीडियावर जोरदार चर्चा सुरू आहे. दरम्यान, यशनेही कियाराच्या भूमिकेचं समर्थन केल्याचं सांगितलं जातंय. (Top 10 News)

१०) चीनच्या खेळाडूला धूळ चारत अश्मिता चालिहाने जिंकले ‘कोरिया मास्टर्स २०२६’ चे विजेतेपद!

भारतीय महिला बॅडमिंटनपटू अश्मिता चालिहाने इतिहास रचत ‘कोरिया मास्टर्स सुपर ३००’ चे विजेतेपद पटकावलेय. हे तिचे पहिलेवहिले BWF वर्ल्ड टूर विजेतेपद ठरले. अंतिम सामन्यात पहिला सेट १४-२१ असा गमावल्यानंतर २६ वर्षीय अश्मिताने जोरदार पुनरागमन केलेय. तिने अप्रतिम आक्रमक खेळ दाखवत चीनच्या चौथ्या मानांकित हान कियान शी हिला पुढील दोन्ही सेटमध्ये २१-१४, २१-१४ अशा फरकाने नमवले. ५३ मिनिटे चाललेल्या या थरारक सामन्यातील विजयाने भारतीय बॅडमिंटनचे जागतिक स्तरावरील वर्चस्व पुन्हा एकदा सिद्ध केलेय. (Top 10 News)