Satara: जिल्हा परिषदेची सर्वसाधारण सभा उद्या, दि. 5 रोजी दुपारी 2 वाजता छत्रपती शिवाजी महाराज सभागृहात होणार आहे. ही सभा विविध मुद्द्यांवर गाजणार असून, त्यात निधीवाटपाचा मुद्दा सर्वाधिक चर्चेत असण्याची शक्यता आहे. सत्ताधार्‍यांमधील अंतर्गत संघर्ष उफाळण्याची चिन्हे असल्याने, ही सभा वादळी होण्याची शक्यता आहे.

पुणे विभाग शिक्षक व पदवीधर मतदारसंघाच्या निवडणुकीच्या आचारसंहितेमुळे जिल्हा परिषदेच्या विषय समिती सभा, स्थायी समिती व सर्वसाधारण सभा पुढे ढकलण्यात आल्या होत्या. त्यामुळे प्रशासकीय मान्यता रखडल्या होत्या. आता अध्यक्ष डॉ. प्रिया शिंदे यांच्या अध्यक्षतेखाली गुरुवारी सर्वसाधारण सभा होणार आहे.

या सभेत जिल्हा नियोजन समिती अंतर्गत विकासकामांना प्रशासकीय मान्यता मिळणार आहेत. त्याचबरोबर 15 व्या वित्त आयोगातील बदलाला मंजुरी देऊन, त्याचा आराखडा विभागीय आयुक्तांकडे पाठवण्यात येणार आहे. जिल्हा नियोजन समिती व 15 व्या वित्त आयोगाच्या कामांवरुन सत्ताधारी व विरोधकांमध्ये संघर्षाची चिन्हे आहेत. शिक्षक व पदवीधर निवडणुकीतील आरोप-प्रत्यारोप, जिल्हा बँक निवडणुकीवरुन झालेल्या संघर्षावरुनही ही सभा गाजण्याची चिन्हे आहेत. गेल्या काही दिवसांमध्ये सत्ताधारी व विरोधकांमध्ये विविध मुद्द्यांवर संघर्ष दिसून येत आहे. सभेचे कामकाज शांंततेज होण्यासाठी सत्ताधारी कोणती रणनिती वापरणार याकडे लक्ष लागले आहे.

चार वर्षांनी अध्यक्षांच्या बंगल्यावर पार्टी बैठक

जिल्हा परिषदेत चार वर्षे प्रशासकीय राजवट असल्याने, मुख्य कार्यकारी अधिकार्‍यांच्या अध्यक्षतेखाली ठराव समितीची सभा होत होती. यावर्षी मार्चमध्ये प्रशासकीय राजवट संपून, जिल्हा परिषदेच्या कारभाराची सूत्रे पदाधिकार्‍यांनी हाती घेतली. त्यानंतर प्रथमच गुरुवारी सकाळी 11 वाजता डॉ. प्रिया शिंदे यांच्या शासकीय निवासस्थानी पार्टी मीटिंग होणार आहे. त्यामध्ये सभेतील रणनीती ठरणार आहे. बर्‍याच दिवसानंतर सर्वसाधारण सभा होत असल्याने, सत्ताधार्‍यांमधील अंतर्गत कलह कमी करुन, विरोधकांचा सामना कसा करायचा याची रणनीती या बैठकीत आखण्यात येणार आहे.