प्रभात वृत्तसेवा पिंपरी – अदखलपात्र गुन्ह्याची नोंद घेतलेली असताना त्याच गुन्ह्यात खुनाच्या प्रयत्नांची कलमवाढ करण्याची मागणी करत एका व्यक्तीने दिघी पोलीस ठाण्यात राडा घातला. पोलिसांना अश्लील शिवीगाळ करत पोलीस ठाण्यात आत्महत्या करण्याची धमकी दिली. याबाबत संबंधित व्यक्तीला पोलिसांनी अटक केली आहे. ही घटना गुरुवारी (११ डिसेंबर) दुपारी एक वाजताच्या सुमारास घडली. कार्तिक सयाजी लोंढे (वय ३१, दिघी) असे अटक केलेल्या व्यक्तीचे नाव आहे. याप्रकरणी सहायक पोलीस उपनिरीक्षक सुभाष पिंगळे यांनी गुरुवारी (दि. ११) दिघी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी सहायक पोलीस उपनिरीक्षक सुभाष पिंगळे हे गुरुवारी दिघी पोलीस ठाण्यात ठाणे अंमलदार म्हणून कर्तव्यावर होते. दरम्यान कार्तिक लोंढे याची एका प्रकरणात अदखलपात्र गुन्ह्याची नोंद पोलिसांनी घेतली आहे. मात्र त्याच गुन्ह्यात खुनाच्या प्रयत्नाच्या गुन्ह्याची कलमवाढ करावी, अशी त्याची मागणी होती. त्यावरून त्याने पोलीस ठाण्यात राडा घातला. पोलीस ठाण्यात येऊन मोठमोठ्याने आरडा ओरडा करत पोलिसांना अश्लील शिवीगाळ आणि दमदाटी केली. त्यानंतर चुकीच्या पद्धतीने गुन्हा दाखल करण्याच्या मागणीसाठी त्याने अंगावर रॉकेल ओतून घेऊन आत्महत्या करतो, अशी पोलिसांना धमकी दिली. दिघी पोलीस या घटनेचा अधिक तपास करीत आहेत.
