Three Indian Cricket Teams Playing On 17th June : भारतीय क्रिकेट चाहत्यांसाठी येणारा १७ जून हा दिवस कोणत्याही मोठ्या सणापेक्षा कमी नसणार आहे. या दिवशी क्रिकेट जगतात असा काही रोमांच पाहायला मिळणार आहे, ज्याची कल्पना चाहते नेहमी करत असतात. एकाच दिवशी भारताचे तीन वेगवेगळे क्रिकेट संघ (पुरुष सीनियर संघ, महिला संघ आणि इंडिया-ए) वेगवेगळ्या मैदानांवर देशाचे प्रतिनिधित्व करताना दिसणार आहेत. विशेष म्हणजे, या तीन सामन्यांपैकी दोन सामने भारत आणि अफगाणिस्तानच्या संघांमध्येच खेळवले जाणार आहेत.

१. इंडिया-‘ए’ करणार सकाळची धमाकेदार सुरुवात (सकाळी १०:०० वाजता)

दिवसातील पहिल्या सामन्यात भारताची युवा ब्रिगेड म्हणजेच ‘इंडिया-ए’चा संघ मैदानात उतरेल. श्रीलंकेत सुरू असलेल्या तिरंगी मालिकेत (Tri-Series) इंडिया-ए चा सामना अफगाणिस्तानच्या युवा संघाशी होणार आहे. हा सामना भारतीय वेळेनुसार सकाळी १०:०० वाजता सुरू होईल, ज्यामुळे चाहत्यांना सकाळपासूनच क्रिकेटचा आस्वाद घेता येईल.

२. लखनौमध्ये रंगणार ‘हिटमॅन’ आणि गिलचा थरार (दुपारी १:३० वाजता)

दुपार होताच भारताचा मुख्य पुरुष संघ मैदानाची सूत्रे हाती घेईल. शुबमन गिलच्या नेतृत्वाखाली भारतीय संघ अफगाणिस्तानविरुद्धच्या ३ सामन्यांच्या एकदिवसीय (ODI) मालिकेतील दुसरा सामना खेळण्यासाठी उतरेल. लखनौच्या अटल बिहारी वाजपेयी इकाना स्टेडियमवर हा सामना दुपारी १:३० वाजता सुरू होईल. पहिल्या सामन्यात ७ गडी राखून मिळवलेल्या दणदणीत विजयानंतर, भारतीय संघाची नजर मालिका जिंकण्यावर असेल.

हेही वाचा – IND vs PAK Video : भारत-पाक सामन्यात दोन्ही संघांच्या खेळाडूंमध्ये तुंबळ हाणामारी? व्हायरल व्हिडीओमुळे सोशल मीडियावर खळबळ

३. महिला टी-२० विश्वचषकात भारत विरुद्ध नेदरलँड्स (संध्याकाळी ७:०० वाजता)

१७ जूनची संध्याकाळ महिला क्रिकेटच्या नावे असेल. इंग्लंडमध्ये सुरू असलेल्या ‘वुमेन्स टी-२० विश्वचषक २०२६’ स्पर्धेत भारतीय महिला संघ आपला दुसरा ग्रुप सामना खेळण्यासाठी सज्ज आहे. पहिल्या सामन्यात पाकिस्तानचा ६४ धावांनी धुव्वा उडवल्यानंतर, आता भारतीय वाघिणींचा सामना नेदरलँड्सशी होणार आहे. लीड्सच्या हेडिंग्ले मैदानावर हा सामना भारतीय वेळेनुसार संध्याकाळी ७:०० वाजता सुरू होईल.