न्यूयॉर्क : जगातील लोक आनंदी राहण्यासाठी अशा अनेक गोष्टी करतात, ज्या इतरांना विचित्र वाटू शकतात. यातील एका व्यक्तीने असे काम केले आहे, जे जाणून तुम्ही म्हणाल की हे फक्त लहान मुलांबाबतच घडते. मात्र जर एखाद्या व्यक्तीचे बालपणीचे स्वप्न त्यावेळी पूर्ण झाले नसेल तर तो कोणत्याही वयात पूर्ण करू शकतो. त्याचप्रमाणे अमेरिकेतील एका 50 वर्षीय व्यक्तीने डिस्नेलँडला जाऊन आपले स्वप्न पूर्ण केले आहे. पण तुम्हाला हे जाणून आश्चर्य वाटेल की या व्यक्तीने डिस्नेलँडला सलग सर्वाधिक भेट देण्याचा विश्वविक्रम केला आहे. या व्यक्तीचे नाव गिनीज बुक ऑफ वर्ल्ड रेकॉर्डमध्येही नोंदवले गेले आहे.

* गिनीज बुकमध्ये नाव नोंदवले गेले
जेफ रिट्झ असे या व्यक्तीचे नाव असून तो मूळचा कॅलिफोर्नियाचा रहिवासी आहे. त्यांनी सलग 2995 दिवस डिस्नेलँडला भेट दिली आहे. त्याने आपली गोष्ट इंस्टाग्रामवर शेअर केली आणि गिनीज बुकमध्ये नाव नोंदवल्याबद्दल आनंद व्यक्त केला. जेफने 1 जानेवारी 2012 रोजी कॅलिफोर्नियामधील उद्यानांचा दौरा सुरू केला.

* दु:ख विसरायला उद्यानात जायचा
जेफ बेकारीच्या दिवसात तिथेच राहत असे. उद्यानात गेल्याने माणूस आपले दु:ख विसरतो असे त्याला वाटायचे. तो रोज उद्यानात जायचा आणि नंतर रात्रीही तिथेच राहायचा. डिस्नेलँडला ‘पृथ्वीवरील सर्वात आनंदी ठिकाण’ म्हटले जाते. कदाचित हेच कारण असेल, ज्यामुळे जेफ आनंदी होण्यासाठी येथे येऊ लागला.

* सर्वाधिक भेटी केलेला रेकॉर्ड
गिनीज वर्ल्ड रेकॉर्ड्सनुसार, “डिस्नेलँडला सर्वाधिक सलग भेटींची संख्या 2,995 आहे, जी 13 मार्च 2020 पर्यंत जेफ रीट्झ (यूएसए) यांनी मिळवली आहे. जेफ हा हवाई दलातील अनुभवी असून त्याच्याकडे डिस्नेलँडचा वार्षिक पास आहे.”